Read Pinyin Rèvə̀leshònə̀ 8 Bible Online

Rèvə̀leshònə̀ 8 - Pinyin bible

Rèvə̀leshònə̀ 8

¹Nkwùə̀ nɨ mômbyə̂ ndzìrə̀ wa à lə̀ nyanə̀nə a shwùurə̀ nòmbàa sàmbaa, ɨlyiʼə lə̀ zhwemnə̀ a nɨ̀pwuurə̀ nɨ tuʼu tsaʼa pɨ àtùmə awà.

²Ǹtyiʼə̀ ndzəənə̀ pəngèrə̀ pa sàmbaa pèrə təəmə̀ a mbyə̀ Nẅùə̀, pɨ ŋâ mɨ̀ntàŋnə̀ sàmbaa ambo pobə.

³Ghùtse angèrə̀ a twuʼtə̀ àkaŋə̀ nɨ pɨ pa ntòonə̀ alyiinə amwuə nɨ pɨ tsùŋə̀nə a zèrə nɨ goldə̀. À lə̀ tô ntəəmə̀ a alyiʼə mɨ̀shwàʼà Nẅùə̀. Pɨ ŋâ e nɨ alyiinə yè noʼnə lo â pwuutə̀ ghobə àchàʼtə̀ Nẅùə̀ pànə̀ pɨ Nẅùə̀ ŋŋâ tsaʼa nchàʼtə Nẅùə̀ aŋunə alyiʼə mɨ̀shwàʼà Nẅùə̀ nɨ pɨ tsùŋə̀nə nɨ goldə̀. Alyiʼə mɨ̀shwàʼà zə̀ a lə̀ pə a mbyə̀ aləŋə nɨ̀fò za.

⁴Ndyə̂ alyiinə wa nɨ angèrə̀ wa à lə̀ tòonə̀nə la ɨ lə̀ mə nfurə̀ amwuə àkaŋə̀ za nɨ angèrə̀ wa à lə̀ twuʼtə̀nə àpô ze mbwuutə̀ ghobə ɨ̀chàʼtə̀ Nẅùə̀ nɨ angèrə̀ wa à lə̀ mənə nchàʼtə̀ aŋunə pànə̀ pɨ Nẅùə̀ la, ntyiʼə̀ nkoʼò ndèrə̀ a mbyə̀ Nẅùə̀.

⁵Angèrə̀ wa a tyiʼə̀ ndòo àkaŋə̀ za nɨ pɨ pa ntòonə̀ alyiinə amwuə la ndẅenə̀ a zèrə nɨ ɨ̀mǔ nɨ à lə̀ kônə aŋunə alyiʼə mɨ̀shwàʼà za mmàʼà a amwuə àtwuə̀ ɨ̀shyə̂. Zèrə a lə̀ ghɨ̀rə̀ mbə̀ŋə̀ ɨ̀ pitə̀, nkwùrə̀, ŋŋwàŋə̀, ɨ̀shyə̂ ɨ̀ nə̀ʼnə̀.

⁶Pəngèrə̀ pa sàmbaa nɨ pɨ lə̀ twuʼtə̀nə mɨ̀ntàŋnə̀ ma sàmbaa lə̀ chwuʼtə̀ mbɨ̀ŋmə̀ a nɨ toŋə̀ a mèrə.

⁷Ntsàambyə̀ angèrə̀ à lə̀ toŋə̀ ɨze ntàŋnə̀. Mɨẅuunə pobə ɨ̀mǔ nɨ ɨ ẅìrə̀kə̀nə nɨ àləəmə̀ pìʼnə̀ a nɨ kẅìnə̀ a àtwuə̀ ɨ̀shyə̂. Ẅèrə lə̀ ghàbə̀ àtwuə̀ ɨ̀shyə̂ nkwùə̀ ɨtarə ntòonə̀ a taʼà àpàa, ngàbə̀ mɨ̀tɨ̀ghə nkwùə̀ ɨtarə ntòonə̀ a taʼà àpàa, nkɨ ntòonə̀ a nɨ̀yìinə ntsùmə̀.

⁸Àpaatə̀ angèrə̀ a lə̀ kɨ ntoŋə̀ ɨze ntàŋnə̀. Pɨ màʼà àzwuumə̀ àtse tsaʼa mbarə̀ ngẅùunə nɨ ɨ̀ mənə nsɨghə̀ amwuə nchyə ghu nɨŋnə̀nə. A lə̀ ghàpə̀ nchyə ghu ɨlyiʼə ɨtarə, mbə̀ŋə̀ a taʼà pàa a pàŋə̀ tsaʼa àləəmə̀.

⁹Taʼà àpàa àzwuumə̀ àtsùmə̀ nɨ a pənə yè tɨ̀ŋnə̀ amwuə ɨ̀pàa ɨtarə amwuə nchyə ghu à lə̀ kwɨghə̀. À lə̀ kɨ ntsə̀ŋə̀ a taʼà àpàa ɨ̀paŋə̀ amwuə ɨ̀pàa ɨtarə.

¹⁰Angèrə̀ nòmbàa pɨtarə à lə̀ toŋə̀ ɨze ntàŋnə̀. Maa maa saŋə mmə nkyàʼà tsaʼa nkàʼà a tyiʼə̀ nfurə̀ a nɨ̀pwuurə̀ nkunə̀. À lə̀ ghàpə̀ mɨnchyə mɨ̀ẅùunə aŋunə pɨ̀pàa pɨtarə nkunə̀ aŋunə taʼà pàa, nkɨ nkunə̀ aŋunə pɨ̀nɨ̀mwurə̀ ɨ̀shyə̂.

¹¹Nɨ̀linə̀ nɨ sàŋə̀ wə̀ à lə̀ pə “Nɨlẅuunə.” Taʼà pàa nchyə amwuə ɨ̀pàa ɨtarə nɨ à lə̀ kunə̀nə aŋunə a pə̀ŋə̀ ntyiʼə̀ ndẅùə̀. Pànə̀ pɨ̀noʼnə nɨ pɨ lə̀ nônə a ẅèrə lə̀ kwɨkə̀ ntiinə ɨ lə̀ mənə ndẅùə̀.

¹²Angèrə̀ nòmbàa nɨ̀kwàa à lə̀ toŋə̀ ɨze ntàŋnə̀. Àzwuumə̀ àtse a ghàbə̀ a nẅùumə̀ aŋunə pɨ̀pàa pɨtarə ntsòo a taʼà pàa, nɨ taʼà pàa məŋwɨgrə̀ amwuə pɨ̀pàa pɨtarə, nɨ taʼà pàa saŋə amwuə pɨ̀pàa pɨtarə. Pɨ lə̀ tsòo amwuə ndwuumə̀ nɨ taʼà pàa ɨghobə amwuə ɨ̀pàa ɨtarə à lə̀ pə amwuə ndzùmə. Ka ɨlyiʼə lə̀ laanə̀ e aŋunə taʼà pàa amwuə ɨ̀pàa ɨtarə nɨ njyə̂ ka kɨ laanə̀ e aŋunə taʼà pàa amwuə ɨ̀pàa ɨtarə nɨ ɨ̀twuʼə̀.

¹³Ǹkɨ nchi nnaŋə̀ ndzəənə̀ àzaamə̀ a mə ntàarə̀ a àtɨ̀ghə àtɨ̀ghə mmə nshwəŋə̀ nɨ ngyə̀ ɨ̀tɨ̀ŋnə̀ lo, “Wə̂ ngəʼə̀, wə̂ ngəʼə̀, wə̂ ngəʼə̀ yɨ̀noʼnə nɨ ɨ̌ tô ambo pànə̀ nɨ pɨ pənə amwuə àtwuə̀ ɨ̀shyə̂ ntiinə nkwùə̀ ɨpaa pyə̀ pəngèrə̀ pɨtarə toŋə̀ ɨ̀mobə mɨ̀ntàŋnə̀!”