Read Pinyin Rèvə̀leshònə̀ 9 Bible Online

Rèvə̀leshònə̀ 9 - Pinyin bible

Rèvə̀leshònə̀ 9

¹Angèrə̀ nòmbàa pɨtaanə̀ a toŋə̀ ntàŋnə̀ e. Ǹdzəənə̀ tsaʼnə saŋə a furə̀nə a nɨ̀pwuurə̀ nkunə̀ a àtwuə̀ ɨ̀shyə̂. Pɨ ŋâ a kyi nɨ̀ntaamə̀ tɨ ndẅùutə ambo saŋə ghu.

²À lə̀ nyaʼkə̀ ntswùə̀ nɨ̀ntaamə̀ tsa, ndyə̂ ɨ furə̀ amwuə mbə tsaʼa ndyə̂ nɨ ɨ furə̀nə amwuə ɨ̀mǔ nɨ ɨ noʼnə. Ndyə̂ wə̀ lə̀ ghɨ̀rə̀ lo kò nẅùumə̀ nɨ à mənə ntâ a chi nkyàʼà e ɨlyiʼə, ɨlyiʼə ɨ̀tsùmə̀ tyiʼə̀ nsinə̀ sinə̀nə.

³Ngẅùumə lə̀ furə̀ amwuə ndyə̂ wa nshwuʼə̀ ntô àtwuə̀ ɨ̀shyə̂. Pɨ ŋâ a zèrə nɨ ɨ̀tɨ̀ŋnə̀ tsaʼa pɨ̀ngaamə ɨ̀shyə̂ pɨ̀tɨ̀ŋnə̀.

⁴Pɨ lə̀ shwəŋə̀ ambo ngẅùumə za lo kò pobə ghɨ̀rə̀ a ghobə ànwùə̀ tɨ̀pòŋə̀ àtse aŋunə nɨ̀yìinə kə̀ àzwuumə̀ yè fî àtse nɨ a mənə nkoʼò kə̀ mɨ̀tɨ̀ghə. La pobə̂ ghɨ̀rə̀ pə aŋunə pànə̀ pa nɨ ka pobə pə a ghobə nɨ àlènə̀ Nẅùə̀ a nɨ̀zènə pobə.

⁵Ka pɨ̀ lə̀ ŋâ e ngẅùumə za nɨ ɨ̀tɨ̀ŋnə̀ a nɨ zhwuutə̀ pànə̀ pɨ̀ghu. Pɨ lə̀ ŋâ a ghobə nɨ ɨ̀tɨ̀ŋnə̀ pə lo pobə̂ tsɨ̀nkə̀ ngəʼə̀ àtwuə̀ pobə aŋunə ŋwɨgrə̀ ɨtaanə̀ ndàʼà. Ngəʼə̀ nɨ pànə̀ pa pɨ zuʼù nkwùə̀ nɨ ngẅùumə za ɨ̀ lwuumə̀nə a ghobə ɨ̌ pə tsaʼa ngəʼə̀ zhyə̀ nɨ àngaamə ɨ̀shyə̂ à tə lwuumə̀ a ŋwùə̀ a zuʼù a zèrə.

⁶Aŋunə ŋwɨgrə̀ zèrə zə ɨtaanə̀, pobə̌ tàʼà a nɨ̀wɨghə̀ la zəənə̀ a ghobə apə̀, kòŋə̀ a nɨ kwɨghə̀ la nɨ̀wɨghə̀ â nyankə̀ a ghobə.

⁷Ngẅùumə yɨ̀ghu lə̀ pə tsaʼa pɨləəmə nɨ pɨ tsùnkə̀nə lo pèrə̂ lèrə̀ a ntsòo. Ɨ̀pwuumə̀ pɨ̀tse lə̀ pə a ɨ̀twuə̀ pobə tsaʼa pɨ̀tɨ̀làarə̀ pɨ nɨ̀fò nɨ pɨ tsùŋə̀nə nɨ goldə̀. Mɨ̀sɨghə̀ ɨ̀mobə pə tsaʼa mɨ̀sɨghə̀ mɨ pànə̀ pɨ mɨsoŋə.

⁸Ɨ̀nyùŋə̀ ɨzobə ɨ̀ pə tsaʼa ɨ̀nyùŋə̀ àtwuə̀ pə̀ngyə̌, mɨsoŋə ɨ̀mobə pə tsaʼa mɨsoŋə mɨ puʼmbyìinə̀.

⁹Zèrə lə̀ pə nɨ ɨ̀pàʼà ntsòo a ghàŋə̀ pobə nɨ pənə tsaʼa ɨ̀pàʼà ntsòo ɨ̀tɨ̀ŋnə. Mɨ̀pàrə̀ ɨ̀mobə mə ndzòrə̀ tsaʼa pɨ̀kaligə̀ pɨ̀noʼnə nɨ pɨləəmə pɨ̀noʼnə mənə nsùŋə̀ ndèrə̀ a ntsòo.

¹⁰Zèrə lə̀ pə nɨ mɨ̀saʼà aŋunə mɨnkwuunə ɨ̀mobə nɨ mɨ lə̀ pənə tsaʼa mɨ àngaamə ɨ̀shyə̂. Mɨnkwuunə mɨ̀ghu pə nɨ ɨ̀tɨ̀ŋnə̀ a nɨ tsɨ̀nkə̀ ngəʼə̀ àtwuə̀ pə̀ənə̀ aŋunə ŋwɨgrə̀ ɨtaanə̀.

¹¹Pobə lə̀ pə nɨ ɨ̀fò nɨ à lə̀ mənə mbuʼtə̀ a ghobə. Ɨ̀fò wə̀ à lə̀ pə angèrə̀ nɨ à furə̀nə amwuə nɨ̀ntaamə̀ tɨ ndẅùutə tsa. Nɨ̀linə̀ ɨ̀tse pə amwuə àshwəŋnə̀ pɨ̀Hibrù lo Abadònə̀, nkɨ mbə amwuə àshwəŋnə̀ pɨ̀Greek lo Àpolyònə̀ (ɨ̀sùmə ɨ̀ pə lo “ŋònə̀ nɨ à wa ntsə̀ŋə̀”).

¹²Lenəla, ntsàambyə̀ ngəʼə̀ yɨ̀ ntɨ̀ŋnə̀ za ɨ̀ làŋə̀. Nɨ̀ zhyə̂ lo mɨ̀tse mɨmbaa pirə̀ pòŋə̀ tô.

¹³Angèrə̀ nòmbàa ntuurə̀ a toŋə̀ ɨ̀ze ntàŋnə̀, ǹdzuʼù ngyə̀ nɨ ɨ̀ furə̀nə amwuə mɨ̀lẅuə̀ ma nɨ̀kwàa nɨ mɨ pənə aŋunə alyiʼə mɨ̀shwàʼà Nẅùə̀ nɨ pɨ tsùŋə̀nə nɨ goldə̀ a pə a mbyə̀ Nẅùə̀.

¹⁴Ngyə̀ za ɨ̀ shwəŋə̀ ambo angèrə̀ nòmbàa ntuurə̀ wa nɨ à lə̀ twuʼtə̀nə ntàŋnə̀ za lo, “Kyàatə̀ pəngèrə̀ pa nɨ̀kwàa nɨ pɨ korə̀nə a ghobə a ntswùə̀ nchyə yi ẅùunə nɨ pɨ pa nfuŋə̀ nɨ Euphrates!”

¹⁵Lenəla, angèrə̀ wa à lə̀ kyàatə̀ pəngèrə̀ pa nɨ̀kwàa nɨ pɨ lə̀ nùŋə̀nə a ghobə mmə mbyabə̀ nkwùə̀ ghu, nɨ njyə̂ ghu, nɨ ŋwɨgrə̀ ghu, ghobə nguʼu ghu a nɨ ghàbə̀ pànə̀ pɨ àtwuə̀ ɨ̀shyə̂ aŋunə ɨ̀pàa ɨtarə zhwuutə̀ a taʼà pàa.

¹⁶Pɨ lə̀ shwəŋə̀ ambo mɨ̀ŋə̀ lo ndwùnə̀ pɨ̀soyì nɨ lə̀ koʼnə pɨləəmə pa lə̀ pə pànə̀ ntswùʼə̀ nkɨrə ɨpaa.

¹⁷Lə̌ tsaʼnə ndə̀ zəənə̀nə pànə̀ pa nɨ pɨ lə̀ koʼnə àtwuə̀ pɨləəmə amwuə ndzə̀əmə̀ za nɨ ɨ̀ lə̀ làŋə̀nə a ɨ̀myə̂ mɨ̀ŋə̀ la: Pànə̀ pɨ̀ghu nɨ pɨ lə̀ pənə àtwuə̀ pɨləəmə pa lə̀ ẅî ɨ̀pàʼà ntsòo a ghàŋə̀. Ɨ̀pàʼà ntsòo pə̀ lə̀ mə mbàŋə̀ tsaʼa ɨ̀mǔ, mmə nsinə̀ nkɨ mmə mbàŋə̀ tsaʼa àmwuʼə. Ɨ̀twuə̀ pɨləəmə pa shwuə̀ ɨ̀twuə̀ pɨ̀puʼmbyìinə̀. Ɨ̀mǔ nɨ ndyə̂ ghobə ɨ̀mǔ nɨ ɨ lə̀ mənə mbàŋə̀ tsaʼa àmwuʼə lə̀ mə nfurə̀ a ntswùə̀ pobə.

¹⁸Mɨ̀ngəʼə̀ mɨ̀tɨ̀ŋnə̀ mə mɨntarə nɨ mɨ lə̀ pənə ɨ̀mǔ nɨ ndyə̂ ghobə ɨ̀mǔ nɨ ɨ mənə mbàŋə̀ tsaʼa àmwuʼə nɨ lə̀ mənə nfurə̀ a ntswùə̀ pɨləəmə pa lə̀ ghàbə̀ pànə̀ pɨ mɨsoŋə aŋunə ɨlyiʼə ɨtarə nzhwuutə̀ a taʼà alyiʼə.

¹⁹Mɨ̀tɨ̀ŋnə̀ pɨ ləəmə pa lə̀ pə la aŋunə mɨ̀ntswùə̀ ɨ̀mobə pobə mɨnkwuunə ɨ̀mobə. Mɨnkwuunə ɨ̀mobə lə̀ pə tsaʼa mɨ̀nyoorə̀ nɨ mɨ pənə nɨ ɨ̀twuə̀. Pobə lə̀ mə ndòo a mèrə ntsə̀ŋə̀ pànə̀ ghu.

²⁰Àpwùʼə̀ pànə̀ nɨ ka mɨ̀ngəʼə̀ mə mɨntarə lə̀ zhwuutə̀ e a ghobə lə̀ twuunə̀ a ghobə a nɨ pə̀ŋə̀ mɨ̀ntɨŋmə̀ ɨ̀mobə aŋunə nɨ̀ghuʼtə̀ ɨ̀pwuumə̀ pa nɨ pobə lə̀ tsùŋə̀nə la. Ka pobə lə̀ waʼà a ghobə a nɨ ghuʼtə̀ ɨ̀zhwùə̀ tɨ̀pòŋə̀. Ka pobə lə̀ kɨ ngwaʼà a ghobə a nɨ ghuʼtə̀ pɨ̀tse pɨ̀nẅùə̀; pɨ̀nẅùə̀ nɨ pobə lə̀ tsùŋə̀nə nɨ goldə̀, kə̀ nɨ silbà, kə̀ nɨ bronzə̀, kə̀ nɨ nɨ̀ghòorə kə̀ àtùmə àtɨ̀ghə. Pɨ̀nẅùə̀ nɨ ka pobə mə ndzəənə̀ a ghobə ɨlyiʼə, ka kɨ mə zuʼù a ghobə a ànwùə̀, nkɨ ka mə yìinə̀ a ghobə.

²¹Ka pobə lə̀ pə̀ŋə̀ a ghobə ntɨŋmə̀ ɨ̀ghobə aŋunə nɨ̀zhwuutə̀ pə̀ənə̀ kə̀ a nɨ kwabə̀ àngaamə, kə̀ a nɨ ghɨ̀rə̀ ɨ̀nwùə̀ məghàbə̀ kə̀ a nɨ zə̀ərə̀.