Read Piratapuyo San Marcos 4 Bible Online

San Marcos 4 - Piratapuyo bible

San Marcos 4

¹Sa ye pari turi ditara dʉhtʉ cahapʉ Jesu buhe dʉcahye. Sa ye topʉre buhe dʉcaro masa peyequina tiquiro cahapʉ tiquina cahmecoagʉ̃ ihñano Jesu pehe yucʉsapʉ buhe pahsahye. Sa ye masa pehe ditara dʉhtʉ cahapʉ ducuahye.

²Sa yero Jesu peye tiquiro tʉhotuye mehna piti dahre yahuahye tiquinare buhero.

³—‍Ahri quitire tʉhoya mʉsa, niahye tiquiro. —‍Oteriquiro otero wahahye.

⁴Tiquiro sa otegʉ̃ apeye pjeri maha dʉhtʉ cahapʉ bora quehe sahye. Sa bora quehe saye pjerire minicjʉa ahta, ihya cãhye.

⁵Sa ye apeye pjeri ʉtã pjeri watoa bora quehe sahye. Ʉtã pjeri watoa dihta marieda cjũno ijiepegʉ̃ duita pihnimahye.

⁶Sa pihnidi ijieperota, asʉ̃ tutuaro asigʉ̃ nʉhcori marieda, ñaia wahahye.

⁷Apeye pjeri taa watoa bora quehe sahye. Taa pehe dia yʉhdʉa waha, oteri pehere wejẽ cãhye. Sa yero dʉca mariedahye.

⁸Apeye pjeri quehnoari dihtare bora quehe sahye. Quehnoano pihniñe ijiro quehnoano dʉca tiahye. Apeye cjʉ treinta pjeri, apeye cjʉ sesenta pjeri, apeye cjʉ cien pjeri dʉca tiahye.

⁹Ahrire quehnoano tʉhoya mʉsa, niahye Jesu. Jesu quiti mehna tiquiro buherire yahuahye

¹⁰Sa ye tiquina sehsaro ijiye doce buheyequina, apequina Jesu mehna ijiyequina ti quitire masi duaye, Jesure sinituahye.

¹¹Tiquina sa sinituri bato Jesu ohõ saha ni yahuahye: —‍Cohãcjʉ̃ masa pʉhtoro tiquiro ijiyere, panopʉ apequina tiquina masiedarire mʉsare masigʉ̃ yere Cohãcjʉ̃. Apequina pehere sa yerare tiquiro. Tiquinare quiti mehnata buheitja.

¹²Sa ye tiquina ihñaepeta ihñedariquina yero saha tojoare. Sa ye tʉhoepeta masisi. Tiquina masiñe quehnoañe pehere camesaboaya. Tiquina sa camesagʉ̃ ihñano tiquina ñañe yerire boboaya Cohãcjʉ̃. (Sa ijiepegʉ̃ta tiquina pehe ne tʉho duerare,) niahye Jesu. Jesu oteriquiro quitire yahu pehoahye

¹³Tiquiro sa nidi bato ohõ saha ni yahu nemoahye tiquinare: —‍¿Ahri quitire tʉhoena niajari mʉsa? ¿Mʉsa ahri quitire tʉhoerana, dʉhse apeye quitire tʉhonatari mʉsa? niahye Jesu tiquinare. Sa ni tuhasa ohõ saha ni yahu nemoahye tiquinare:

¹⁴—‍Oteriquiro tiquiro oteri pjeri quehnoañe buheye yero saha ijire.

¹⁵Sa yero maha dʉhtʉ caha bora quehe sari pjeri quehnoañe buheye yero saha ijire. Sa yero masa quehnoañe buheyere tiquina tʉhogʉ̃ ihñano Satana pehe ahta, ti buheye quehnoañe buheyere masi dutierare tiquinare, minicjʉa ti pjerire tiquina dote nediro saha yero.

¹⁶Sa ye ʉtã pjeri watoa bora quehe sari pjeri quehnoañe buheye yero saha ijire. Sa ye masa quehnoañe buheyere tʉho, bucueye mehna duita tire tʉho ñehe maa wahare.

¹⁷Sa tʉho ñehepeta ʉtã pjeri watoa ijiye cjʉ nʉhcori marieñe cjʉ yero saha ahriquina masa gʉ̃hʉ tutuerare. Sa tutueraye, ñano yʉhdʉye, yeequina tiquina ijiri buhiri apequina tiquinare ñano yegʉ̃ ihñañe yee pehere duhu cãhre. Apequina tiquinare ñano yegʉ̃ tire ihcãno sahaeraye, yeere duhu cãhre.

¹⁸Sa ye taa watoa bora quehe sari pjeri quehnoañe buheye yero saha ijire.

¹⁹Sa ye masa quehnoañe buheyere tʉhoepeta, ahri yehpa cjẽne pajiro bʉjʉa witi tʉhotuye, niñeru pehere cahĩne. Apee boro gʉ̃hʉre peye tutuaro cahmene. Tiquina sa ni tʉhotugʉ̃ ti pehe quehnoañe buheyere cahmotare. Ti sa cahmotagʉ̃ masa quehnoañe pehere yerare.

²⁰Sa ye quehnoari yehpapʉ bora quehe sari pjeri quehnoañe buheye yero saha ijire. Sa ye masa quehnoañe buheyere tʉhoye tire cahmene. Sa masiñequina ijiye, Cohãcjʉ̃ tiquiro cahmeno sahata quehnoañene yere tiquina. Ihquẽquina meheno quehnoañene yere treinta pjeri dʉca tiro saha. Apequina bui cjũno quehnoañene yere sesenta pjeri dʉca tiro saha. Apequina pajiro quehnoañene yere cien pjeri dʉca tiro saha, ni yahuahye Jesu tiquinare. Jesu sihãria quitire buheahye

²¹Sa ni tuhasa ohõ saha ni nemoahye: —‍Ne sihãriare dihi sutu docapʉ cũedare. Sa ye tiare cumuno docapʉ cũedare. Ʉhmʉanopʉ duhu peore quehnoano buhrio dutiye.

²²Ijipihtiye tiquina masiedarire came masa masieta. Sihãria buhriogʉ̃ mari ihña masino saha panopʉre tiquina masiedarire masieta masa.

²³Ahrire quehnoano tʉhoya mʉsa.

²⁴Mehenogã masi duana mehenogã masinata. Pajiro masi duana pajiro masinata. Sa yena mʉsa tʉhona quehnoano tʉho nʉnʉña.

²⁵Quehnoano tʉho nʉnʉriquiro quehnoano masinota. Tʉho nʉnʉeniquiro, “Mehenogã tʉhoaja”, tiquiro niepegʉ̃ta ti pehe butia waharota, niahye Jesu tiquinare. Jesu trigore oteriquiro quitire buheahye

²⁶Sa ni tuhasa ohõ saha ni yahu nemoahye: —‍Cohãcjʉ̃ masa pʉhtoro tiquiro ijiye trigore oteriquiro yero saha ijire.

²⁷Ote tuhasa bohrearo tiquiro oteri pihniñene ihñare tiquiro. “¿Dʉhse pihni wijia ta dʉcajari?” ni ihña masiedare oteriquiro tiquiro basi.

²⁸Ti oteri ti basi dʉca tire. Pari pũgã wijia mʉhtare. Came pari paro wijia, bʉcʉare.

²⁹Ti parori bʉcʉa tuhasagʉ̃ ihñano, pehere peheri pje ijigʉ̃. (Tiquiro ote, ti bʉcʉarire tiquiro masiedaro saha Cohãcjʉ̃ yequina masa tiquina wahari gʉ̃hʉre yahu peho masiedare masa,) ni buheahye Jesu. Mostaza pje quitire yahuahye Jesu

³⁰Sa ni tuhasa ohõ saha ni buhe nemoahye queoye mehna buhero: —‍¿Ne Cohãcjʉ̃ masa pʉhtoro tiquiro ijiye yabe boro yero saha ijiajari, mʉsa tʉhotugʉ̃? ¿Dise quiti mehna tire yahunatari?

³¹Mostaza pjegã yero saha ijire Cohãcjʉ̃ pʉhtoro ijiye. Ti pjegã tiquiro otegʉ̃re meheni pjegã waro ijire.

³²Sa ijieperota ti pjegã quehnoano pihnine. Sa yero pajidʉ wahare. Sa ye tʉ dʉpʉri bʉjʉye dʉpʉri bʉcʉagʉ̃ ihñañe minicjʉa ti dʉpʉripʉ suhti suhare, niahye Jesu. (Sa nino ohõ saha nino niahye. Mostaza pjegã pajidʉ tʉ bʉcʉariro saha ʉhmʉse cjʉ̃nore mari pʉhtorore masiñequina meheñequinagã tiquina iji mʉhtaepegʉ̃ta camepʉre peyequina wahaeta.) Quiti mehna tiquiro buherire yahuahye Jesu

³³Sa yero ti quiti tiquiro nidiro saha peye quitire tiquina tʉho ñeheno puno quehnoañe buheyere buheahye tiquinare.

³⁴Quiti marieno yahuerahye tiquinare. Sa yero tiquina sehsaro ijiyequinare Jesu quehnoano yahu pehoahye tiquiro buheyequinare. Jesu wihnonore yʉsʉ dutiahye

³⁵Sa ye ti decore ñamicahapʉ Jesu tiquiro buheyequinare ohõ saha niahye: —‍Isa, si pahrẽpʉ pehãʉhna, niahye tiquinare.

³⁶Tiquiro sa nigʉ̃ tʉhoye yucʉsapʉ sajã, masare yehpapʉ ducuyequinare tota cũ, tiquiro buheyequina dihita Jesure ne pehã wahahye. Sa ye apeye yucʉsari mehna apequina tiquina bato pehãhye.

³⁷Tiquina sa pehãgʉ̃ wihnono tutuaro wẽahye. Sa wẽno yucʉsare tutuaro pahcõri quẽ sajãhye. Mehenogã dʉhsamahye tiquina miniboriro.

³⁸Sa wahari watoa Jesu yucʉsa ohoturopʉ suhti puti buipʉ carĩno niahye. Sa ye tiquina tiquirore wahcõahye. —‍¿Buhegʉ, mʉhʉ cuerajari? Mari minina tana niajʉ́, niahye tiquina tiquirore.

³⁹Tiquina sa nigʉ̃ta Jesu pehe wahcã, wihnonore, —‍To punota wẽ duhuya, niahye. Sa ninota pahcõri gʉ̃hʉre, —‍Yʉsʉahya, niahye. Tiquiro sa nigʉ̃ta wihnono yʉhdʉa wahahye. Sa ye pahcõri gʉ̃hʉ yʉsʉ dijiaa wahahye.

⁴⁰—‍¿Dʉhse yena cue maca cãna niajari mʉsa? ¿Mʉsa yʉhʉre wacũ tutuerajari? niahye Jesu.

⁴¹Sa wahagʉ̃ ihñañe acʉa yʉhdʉa wahahye. —‍¿Yohou, dʉhse ijiriquiro boro masʉno ijiajari ahriquiro? Ahri wihnono, pahcõri gʉ̃hʉ tiquiro dutigʉ̃ yʉhdʉdʉcaerare tiquirore, niahye tiquina pehe.