Read Piratapuyo San Marcos 5 Bible Online

San Marcos 5 - Piratapuyo bible

San Marcos 5

¹Sa ye tiquina si pahrẽpʉ Gerasa cjẽna ya yehpapʉ pehã sahye. Sa yero Jesu pehe yucʉsapʉ sañariquiro maja sadʉcahye. Tiquiro sa maja sadʉcari bato watĩa cʉoriquiro masa coperi ʉtã coperi watoapʉ ijiriquiro wijia ta, tiquiro cahapʉ ahtahye.

³Watĩa cʉoriquiro masa coperi watoa ijiriquiro ijiahye. Apequina pehe tiquirore come da pajiri da mehna ñehe dʉhte masiedahye.

⁴Sa ye peye tahari masa tiquirore dahpocãri apõñe behtori mehna, come dari mehna dʉhtemahye. Tiquiro omocari gʉ̃hʉre dʉhtemahye. Sa yero tiquiro pehe come darire nuha, dahpocãri apõñe behtori gʉ̃hʉre nuha site mʉjahye. Sa ye tutuariquiro tiquiro ijiro mehna masa pehe tiquirore ñehe masiedahye.

⁵Ñami ijigʉ̃, deco ijigʉ̃ ʉtã coperi watoapʉ cʉnʉpʉ sa sañuducue tiahye tiquiro. Sa yero ʉtã mehna tiquiro basi tiquiro pagʉre quẽe tiahye.

⁶Sa yero yoaropʉ Jesure ihñadoqueo tiquiro cahapʉ oma maa cãhta, dʉsepe curi mehna quehe sahye tiquirore ño peoro taro.

⁷—‍Watĩa duhuya tiquirore, niahye Jesu. Tiquiro sa nigʉ̃ tʉhoro watĩa cʉoriquiro ohõ saha niahye: —‍¿Jesu, Cohãcjʉ̃ tutuariquiro macʉ, yabere yegʉ tʉʉ niajari mʉhʉ yʉhʉre? Cohãcjʉ̃ tiquiro ihñonopʉ siniaja yʉhʉ mʉhʉre. Yʉhʉre ñano yeracãhña, ni sañuducuahye watĩa cʉoriquiro Jesure.

⁹—‍¿Dʉhse wame tiajari mʉhʉ? niahye Jesu tiquirore. —‍Ʉsã peyequina ijiaja. Sa yena “Peyequina watĩa” wame tiaja.

¹⁰Ʉsã ahri dihtapʉ ijinare ape siepʉ waha dutieracãhña, niahye watĩa cʉoriquiro.

¹¹Ti pjere yesea peyequina tiquina cahapʉ cʉnʉ dahpotopʉ ihyaye niahye.

¹²Topʉ tiquina ihyaducugʉ̃ ihñañe, ohõ saha ni siniahye watĩa: —‍Sisequina yesea cahapʉ waha dutiya ʉsãre. Tiquina mehna iji dutiya ʉsãre, ni siniahye watĩa tiquirore.

¹³Tiquina sa nigʉ̃ tʉhoro tiquinare waha dutiahye Jesu. Tiquiro sa waha dutigʉ̃ watĩa masʉno mehna ijiriquina waha, yesea dos mil yesea cahapʉ esahye. Tiquina cahapʉ tiquina esari bato yesea pehe ijipihtiyequina ditara dʉhtʉ cahapʉ oma buha, ti ditarapʉ bora ñojoa, mini yaria pihtia wahahye.

¹⁴Tiquina sa minigʉ̃ ihñañe, yeseare cohteyequina pajiri macapʉ, daye macarigãpʉ gʉ̃hʉre tire yahuye waha, oma cãa wahahye. Tiquina sa yahugʉ̃ tʉhoye masa pehe peyequina tiquiro yerire ihñañe wahahye.

¹⁵Sa ye Jesu cahapʉ wihiye, watĩa cʉoriquiro tiquiro suhti tiriquiro, tʉho masiniquiro tiquiro dujigʉ̃ ihñañe, ihña maria waha, cueahye.

¹⁶Sa ye watĩa cʉomediquiro, yesea gʉ̃hʉre tiquina sa waharire ihñariquina apequinare yahu pehoahye.

¹⁷Tiquina sa yahu pehogʉ̃ tʉhoye, Jesure tutuaro mehna ape siepʉ waha dutiahye.

¹⁸Sa yero yucʉsapʉ Jesu tiquiro sajãgʉ̃ ihñano, “Mʉhʉ mehna waha duaja”, ni tutuaro sinimahye watĩare cʉomediquiro Jesure.

¹⁹Tiquiro sa nigʉ̃ Jesu tiquirore yahuahye: —‍Yʉhʉ mehna wahaeracãhña. Mʉhʉ ya wʉhʉpʉ mʉhʉ caha ijiyequina cahapʉ yʉhʉ mʉhʉ pʉhto mʉhʉre yʉhʉ yerire yahugʉ wahaya. Mʉhʉre yʉhʉ paja ihñarire yahugʉ wahaya tiquinare, niahye tiquirore.

²⁰Tiquiro sa nigʉ̃ watĩa cʉomediquiro pehe Decapoli wame tiri macapʉ Jesu tiquirore yʉhdʉorire yahu dʉcahye. Tiquiro sa ni yahugʉ̃ tʉhoye ijipihtiyequina masa tʉho maria wahahye. Jairo maconore yʉhdʉoro, dii mʉna wihoro dohatiducuricoro gʉ̃hʉre yʉhdʉoahye Jesu

²¹Sa ye pari turi Jesu tiquiro majare pehã sagʉ̃ masa peyequina tiquiro cahapʉ ditara dʉhtʉ cahapʉ cahmecoahye.

²²Sa yero ʉsã judio masa buheri wʉhʉre ihña ihboriquiro Jairo wame tiriquiro ahta, Jesure ihña, tiquiro dahpocãri cahapʉ dʉsepe curi mehna quehe saro, ohõ saha niahye:

²³—‍Yʉhʉ macogã yariaro nidi. Sa yegʉ ticorore mʉhʉ omoca mehna ña peogʉ, yʉhdʉogʉ ahtaya. Mʉhʉ sa yegʉ̃ ticoro masanota, niahye tiquiro Jesure.

²⁴Tiquiro sa nigʉ̃ Jesu gʉ̃hʉ pehe tiquiro mehna wahahye. Mahapʉ tiquiro wahagʉ̃ masa peyequina tiquirore nʉnʉ tã cã bihsaro esadʉca sahye.

²⁵Sa yero numino doce cʉhmari waro decoripe dii mʉna dohatiducuricoro topʉ ijiahye. To pano peyequina duturua ticorore ñano yʉhdʉgʉ̃ yeahye.

²⁶Sa yero duturuare ijipihtiye ticoro niñeru mehna wapa yemahye ticoro aco ye dutiro. Tiquina sa yepegʉ̃ta ticoro mʉnanota ijiducu cãhye. Sa yero ticoro tiquinare ihñari bato to pano ijiriro yʉhdʉoro ñano wahahye.

²⁷Ticoro sa ñano yʉhdʉri bato Jesu yeyere tʉhoye, apequina yahuahye ticorore. Sa yero ticoro Jesu bato masa peyequina watoa ahta, Jesu suhtirore ñehe tuhuahye.

²⁸“Yʉhʉ tiquiro suhtiro dihitare ñehe tuhugo quehnoa wahagota”, ni tʉhotuahye.

²⁹Sa yero ticoro sa ñehe tuhuri bato ticoro dii mʉna dohatiyere yʉhdʉgʉ̃ ticoro pagʉre quehnoari pagʉ tʉhotuahye.

³⁰Sa yero Jesu tiquiro tutuaye mehna dohatiyere tiquiro cohãrire masino, masa watoa majaredʉca sa ihñahye. —‍¿Noa yʉhʉ suhtirore ñehe tuhuajari? niahye tiquiro.

³¹Tiquiro sa nigʉ̃ tʉhoye tiquiro buheyequina ohõ saha niahye: —‍Bihsarĩne. Sa ye masa peyequina mʉhʉre pihare. “¿Noa yʉhʉre ñehe tuhuajari?” nigʉ, ¿dʉhse nigʉ sa niajari mʉhʉ? niahye tiquina pehe tiquirore.

³²Sa yero Jesu tiquirore ñehe tuhuricorore macahye.

³³Tiquiro sa macano watoa ticoro pehe ticoro pagʉ quehnoa wahagʉ̃ tʉhoturo, cue nanare dʉsepe curi mehna quehe sahye tiquiro caha tiquirore ño peoro.

³⁴Sa yero ticoro potota yahu pehoahye tiquirore. Ticoro sa ni yahuri bato Jesu ticorore yahuahye: —‍Maco, yʉhʉre mʉhʉ wacũ tutuaye mehna quehnoago tojoare yojopʉre. Bucueye mehna wahaya. Dohatiye mariego ijiya, niahye Jesu ticorore.

³⁵Tiquiro sa ni yahuducuri bato judio masare buheri wʉhʉre ihña ihboriquiro ya wʉhʉ cjẽna yahuye wihiahye. —‍Mʉhʉ maco yaria wahari. Sa yegʉ buheriquirore piji cãhteracãhña, niahye tiquina.

³⁶Tiquina sa niepegʉ̃ta sa tʉhotu cãhno, Jesu ti wʉhʉre ihña ihboriquirore ohõ saha ni yahuahye: —‍Bʉjʉa witieracãhña. Yʉhʉre wacũ tutuaya. Ti dihitare yeya, niahye ti wʉhʉre ihña ihboriquirore.

³⁷Sa ni tuhasa Santiago, tiquiro bahʉro Ñu, Pedro tiquina dihitare “Yʉhʉ mehna ahtaya”, niahye Jesu.

³⁸Sa yero judio masa buheri wʉhʉre ihña ihboriquiro ya wʉhʉpʉ esahye. Ti wʉhʉpʉ masa peyequina ñano bisi ñehe quea utigʉ̃, tiquina sañuducugʉ̃ tʉhoahye Jesu.

³⁹—‍Ñano ni, ñehe quea utieracãhña mʉsa. Ticorogã mʉsa sa ni utigʉ̃ yarierare. Carĩno nine, niahye Jesu tiquinare.

⁴⁰Tiquiro sa nigʉ̃ tʉhoye “Sa ni maca cãhno nine ahriquiro”, ni bʉjʉahye tiquina pehe tiquirore. Sa yero tiquiro tiquinare sopecahapʉ wio peho cãhye. Sa wio tuhasaro ticorogã pacʉsʉmʉare, tiquiro mehna cjẽna gʉ̃hʉre ticorogã cahapʉ neahye Jesu.

⁴¹Sa yero Jesu ticoro omocare ñehe, “Talita cum”, niahye tiquiro. “Talita cum”, nino, “ ‘Mehenicorogã wahcãña’, niaja yʉhʉ”, nino nine.

⁴²Tiquiro sa nigʉ̃ ticorogã wahcãdʉca sa, tiniahye. Doce cʉhmari cʉoricoro ijiahye ticoro. Ticorore tiquiro sa yegʉ̃ ihñañe tiquina ihña maria wahahye.

⁴³Sa yero Jesu tutuaro mehna tiquiro sa yerire yahu site dutierahye. Sa ye tuhasa ticorore ihyayere oho dutiahye.