Read Piratapuyo San Lucas 17 Bible Online

San Lucas 17 - Piratapuyo bible

San Lucas 17

¹Sa ye Jesu yahuahye tiquiro buheyequinare: —‍Masare ñañe yegʉ̃ yeye peye ijire. Sa yeye masa ñañene yere. Ti sa ijiepegʉ̃ta masʉnore ñañene yegʉ̃ yeriquiro pehe ña yʉhdʉaro yʉhdʉrota.

²Masʉnore tiquiro wamʉapʉ pajiria ʉtãre dʉhte yo, pajiri mapʉ tiquirore cohãgʉ̃ ñano wahaboaga tiquiro. Apequiro pehe ahriquinagã mehna cjʉ̃nogãre ñañene yegʉ̃ yero pajiri mapʉ tiquina cohãriquiro yʉhdʉoro ñano yʉhdʉrota. Tiquirore tutuaro buhiri dahrero cahmene.

³Quehnoano yeya mʉsa. Mʉsa acayʉro ñano tiquiro yegʉ̃ ihñana “Yeracãhña”, niña tiquirore. Sa yena tiquiro ñañene bʉjʉa witigʉ̃, quehnoañene camesagʉ̃ mʉsa pehe tiquiro ñañe yeyere boya.

⁴Sa yero mʉsa acayʉro ihcã decota siete tahari mʉsare ñano tiquiro yegʉ̃ mʉsare tiquiro bo dutigʉ̃ boya. “Pari turi mʉhʉre ñano yesi”, siete tahari tiquiro nigʉ̃ tope taharita tiquiro ñano yerire boya, niahye Jesu. Cohãcjʉ̃re wacũ tutuayere yahuahye Jesu

⁵Sa ye Jesu buheyequina tiquirore ohõ saha niahye: —‍Cohãcjʉ̃re ʉsãre quehnoano wacũ tutua nemogʉ̃ yeya, niahye tiquina Jesure.

⁶Tiquina sa nigʉ̃ Jesu yʉhtiahye: —‍Mostaza capegã meheni pjegã ijire. Ti yero saha Cohãcjʉ̃re mehenogã wacũ tutuana, ohõ saha wahagʉ̃ ye masinata mʉsa: Ahdʉ yucʉgʉre ohõ saha ni masine: “Mʉhʉ yucʉgʉ mʉhʉ basi duhtu cã, pajiri mapʉ bora ñojoaña”, ni masine mʉsa. Mʉsa sa nigʉ̃ tʉ yucʉgʉ pehe mʉsa dutiro sahata waharota, niahye Jesu. Dahra cohteriquiro tiquiro dahrayere yahuahye Jesu

⁷Came ahri quitire yahuahye Jesu: —‍Mʉsare dahra cohteriquiro ijiro wesepʉ tanare. Sa yero ovejare ihña ihbore. ¿Dahra cohteriquiro tiquiro tojoa wihigʉ̃ dʉhse niboagari mʉsa tiquirore? ¿“Sojaro mehna ahtaya. Mʉhʉ ihyaye ohõpʉ ijire”, niboagari mʉsa?

⁸Sa niedare mʉsa. Tiquirore ohõ saha nine mʉsa: “Yʉhʉ ihyayere doha quehnoña. Sa yegʉ yʉhʉ ihya sihnigʉ̃ yʉhʉre cohteya. Yʉhʉ bato mʉhʉ gʉ̃hʉ ihya sihniña”, nine mʉsa dahra cohteriquirore.

⁹Dahra cohteriquiro mʉsa dutiyere tiquiro yegʉ̃ tiquirore “Quehnoare”, niedare mʉsa. Tiquiro dahraye dihitare yero niaga tiquiro.

¹⁰Mʉsa gʉ̃hʉ tiquiro yero saha ijire. Cohãcjʉ̃ dutiriro sahata ye pehona ohõ saha ni, tʉhotuya mʉsa. “Ʉsã gʉ̃hʉ dahra cohtena dihita ijiaja. Ihyo ijina ijiaja ʉsã. Ʉsã dahraye dihitare yei ʉsã”, ni, tʉhotuya mʉsa, niahye Jesu tiquiro buheyequinare. Pʉa omopequina cami bʉcʉ mʉna wihare yʉhdʉoahye Jesu

¹¹Ape deco Jerusalẽpʉ Jesu waharo niahye. Topʉ waharo Samaria yehpa, Galilea yehpa, ti pʉa yehpa watoa yʉhdʉ cãhye.

¹²Ape macapʉ wahari mahapʉ tiquiro tinigʉ̃ pʉa omopequina cami bʉcʉ mʉna wiha pehe tiquirore piti cahye. Sa ye yoa cjũnopʉ ducuye pisuahye: —‍Jesu, pʉhto, ʉsãre paja ihñaña, niahye tiquina.

¹⁴Sa nigʉ̃ tiquinare ihña, yahuahye Jesu: —‍Pahire mʉsa pagʉrire quehnoañe pagʉri mʉsa waharire ihñona wahaya, niahye tiquinare. Sa nidi bato tiquina wahari watoa quehnoa wahahye.

¹⁵Sa yero ihcãquiro tiquina mehna cjʉ̃no quehnoano tiquiro pagʉ wahagʉ̃ ihñano, Jesu cahapʉ majare tojoa tahye. Sa tojoa taro tutuaro mehna Cohãcjʉ̃re ño peoahye. “Cohãcjʉ̃ tutuariquiro, quehnoariquiro ijire”, ni, ño peoahye tiquiro.

¹⁶Sa nino tiquiro Jesu dahpocãri caha dʉsepe curi mehna quehe sa, “Quehnoare”, niahye tiquiro. Samaria cjʉ̃no ijiahye.

¹⁷Tiquiro sa yeri bato Jesu ohõ saha ni sinituahye: —‍Pʉa omopequina ijiri masa quehnoa wahariquina. ¿Apequina nueve dʉhsayequina pehe nohopʉ ijiagari tiquina?

¹⁸Ahriquiro ape yehpa cjʉ̃no dihita Cohãcjʉ̃re “Quehnoare”, nino taro tojoa tari. ¿Dʉhse ijiro boro apequina ahtaerajari? niahye Jesu.

¹⁹Sa ni tuhasa Jesu yahuahye dʉsepe curi mehna quehe sariquirore. —‍Wahcãdʉcaya. Wahaya. Mʉhʉ Cohãcjʉ̃re wacũ tutuagʉ, yʉhdʉre mʉhʉ, niahye Jesu tiquirore. Cohãcjʉ̃ tiquiro pʉhtoro ijiatire yahuahye Jesu

²⁰Ti pjere meheñequinagã fariseo masa Jesure sinituahye: —‍¿Dʉhse ijigʉ̃ Cohãcjʉ̃ pʉhtoro iji dʉcarotari? niahye tiquina. Tiquina sa nigʉ̃ Jesu yʉhtiahye: —‍Cohãcjʉ̃ tiquiro pʉhtoro iji dʉcagʉ̃ masa ihña masiedare.

²¹“Cohãcjʉ̃ pʉhtoro ijiye ohõpʉ ijire”, ni masiedare. “Sohõpʉ ijire”, ni masiedare. Cohãcjʉ̃ tiquiro pʉhtoro ijiye masa tiquina tʉhotuyepʉ ijire, niahye Jesu fariseo masare.

²²Sa ni tuhasa Jesu tiquiro buheyequinare ohõ saha ni yahuahye: —‍Came yʉhʉ masʉ Cohãcjʉ̃ ohorigʉ ahri yehpapʉ yʉhʉ tojoa tatire tutuaro cahmenata mʉsa. Mehenogã yʉhʉre ihña duepenata yʉhʉre ihñasi mʉsa. Mʉsa yʉhʉre sa ihña duepegʉ̃ta ti pjere ahtasi yʉhʉ.

²³Apequina mʉsare ohõ saha nieta. “Tiquirore ihñaña. Cristo ijire. Ahriquirore ihñaña. Cristo ijire”, nieta mʉsare. Tiquina sa niepegʉ̃ta tiquinare tʉhoeracãhña.

²⁴Ʉpo miadoqueoro wacũeno mehna ti mia sitedoqueoro sahata yʉhʉ gʉ̃hʉ masʉ Cohãcjʉ̃ ohorigʉ wacũeno mehna tojoa taʉtja.

²⁵Ahrire yʉhʉ yeato pano yʉhʉ tutuaro ñano yʉhdʉta. Sa ye yojopʉ cjẽna yʉhʉre cahmesi.

²⁶Noé tiquiro ijiri pje cjẽna tiquina ijiriro sahata yʉhʉ masʉ Cohãcjʉ̃ ohorigʉ yʉhʉ tojoa tagʉ̃ sata ijieta masa.

²⁷Noé tiquiro ijiri pjere ijipihtiyequina masa sa ihyaducue tiahye. Sa ye sihniducue tiahye. Ʉmʉa, numia mehna omoca dʉhtee tiahye. Noé pajiria yucʉsapʉ tiquiro sajãto pano Cohãcjʉ̃ tiquinare tiquiro mioato pano ti ijipihtiyere masa yeducue tiahye. Sata ijirota yʉhʉ tojoa tagʉ̃ gʉ̃hʉre.

²⁸Lote tiquiro ijiri pje cjẽna tiquina ijiriro sahata yʉhʉ tojoa tagʉ̃ ijieta masa. Lote tiquiro ijie tiri pjere masa ihya, sihni, dú, dua, weserire ote, wʉhʉse yeahye.

²⁹Tiquina sa yeri watoa Sodoma wame tiri macapʉ ijiriquiro Lote tiquiro wahari deco ʉhmʉse cjã peca, peca asiye paca ʉtã pjeri gʉ̃hʉ acoro ahtaro saha tiquina bui bora pje, tiquinare wejẽ pehoe tiahye.

³⁰Yʉhʉ masʉ Cohãcjʉ̃ ohorigʉ wacũeno mehna yʉhʉ tojoa tagʉ̃ tiquina yero sahata yeyequina ijieta masa ti pjere.

³¹’Ti pjere ihcãquiro tiquiro ya wʉhʉ bui cjã paapʉ quehnoari paapʉ ijiriquiro wʉhʉ puhiapʉ tiquiro ye ijigʉ̃ tire neno wahaeracãhdo tiquiro sojaro mehna wahato saha. Sa yero wesepʉ ijiriquiro gʉ̃hʉ ti pjere tiquiro ya wʉhʉpʉ piheracãhdo tiquiro sojaro mehna wahato saha.

³²Lote namono ticoro waharire wacũña mʉsa.

³³Masʉno yʉhʉre wacũno marieno tiquiro esa tuharo tiquiro cahmeno saha yero, pecapʉ waharota. Sa yero yeere sa yeducuriquiro ijipihtiye decori yʉhʉ mehna ʉhmʉsepʉ ijirota.

³⁴’Ti ñamine pʉaro ihcã cuñanopʉ carĩñequinare ihcãquiro yʉhʉre cahmeniquirore neitja. Sa yero yʉhʉre cahmedariquiro topʉ tojoarota.

³⁵Ti pjere pʉaro numia ihcãnopʉ tiquina trigore tu mʉtoñe numiare ihcãcoro yʉhʉre cahmenicorore neitja. Sa yero yʉhʉre cahmedaricoro topʉta tojoarota.

³⁶[Sa ye wesepʉ pʉaro dahrayequina tiquina ijigʉ̃ ihcãquirota neitja. Ihcãquiro topʉ tojoarota,] niahye Jesu.

³⁷Sa nigʉ̃ tiquiro buheyequina pehe sinituahye tiquirore. —‍¿Nohopʉ sa waharotari? ni sinituahye tiquina. Tiquina sa nigʉ̃ Jesu yʉhtiahye: —‍Masa tiquina ñano yeducuriropʉ, topʉ Cohãcjʉ̃ buhiri dahrerota tiquinare, niahye Jesu.