Read Piratapuyo San Lucas 22 Bible Online

San Lucas 22 - Piratapuyo bible

San Lucas 22

¹Sa ye ti pjere pugʉ̃ yeye moremehneñe pãre tiquina ihyati bose deco mehenogã dʉhsahye. Ti bose deco pascua wame tiahye.

²Sa ye pahia pʉhtoa, judio masare buheyequina mehna Jesure wejẽ duaye, tiquina wejẽatire wacũ macahye. Jesure wejẽ duepeta, masa pehere cueahye, “Usuari”, niñe.

³Sa ye watĩno Juda Iscariotere ñano tiquiro ye dutigʉ̃ Juda pehe yʉhtiahye tiquirore. Juda doce buheyequina mehna cjʉ̃no ijimahye.

⁴Sa yero tiquiro pahia pʉhtoare, Cohãcjʉ̃ wʉhʉ cjẽna surara pʉhtoa mehna gʉ̃hʉre yahuro wahahye. Tiquina cahapʉ esa, tiquinare Jesure tiquiro ihñoatire yahuahye tiquinare.

⁵Tiquiro sa nigʉ̃ tʉhoye, tiquina bucue, “Mʉhʉre niñerure wapa yenatja”, niahye tiquina Judare.

⁶Tiquina sa nigʉ̃ Juda “Aʉ, tiquirore mʉsare ihñoutja”, ni, masa tiquina ihñeno watoa Jesure ihña tuhtiyequinare tiquiro ihñoati ñamine cohtero niahye. Jesu buheyequina mehna tiquiro ihya bato tiati deco ijiahye

⁷Pugʉ̃ yeye moremehneñe pãre ihyati bose deco iji dʉcari deco ijiahye. Sa yero pascua cjẽ ijiatire ovejare tiquina ihyatiquinare tiquina wejẽdi deco ijiahye.

⁸Ti pjeta Pedrore, Ñu gʉ̃hʉre Jesu yahuahye: —‍Bose decopʉ mari ihyatire quehnona wahaya, niahye Jesu tiquinare.

⁹—‍¿Noho boropʉ mari ihyatire quehnoyu dutigʉ ohoajari mʉhʉ ʉsãre? ni sinituahye tiquina tiquirore.

¹⁰Tiquina sa nigʉ̃ Jesu yʉhtiahye: —‍Jerusalẽpʉ mʉsa esagʉ̃ aco sutu wʉariquiro mʉsare piti carota. Tiquiro piti cagʉ̃ tiquiro mehna wahaya.

¹¹Sa wahana tiquiro siho sajãri wʉhʉpʉ esana wʉhʉ upʉrore ohõ saha ni yahuya. “ ‘¿Nohopʉ yʉhʉ buheyequina mehna pascua cjẽ ihyayere ihyanatari?’ nidi buheriquiro”, niña wʉhʉ upʉrore.

¹²Mʉsa sa nigʉ̃ tʉhoro ʉhmʉano cjã tucũre pajiri tucũre mari cahmeñe mehna tiquina quehnori tucũre ihñonota wʉhʉ upʉro. Topʉ mari ihyatire dahreya mʉsa, niahye Jesu tiquinare.

¹³Tiquiro sa nigʉ̃ tiquina ti macapʉ wahahye. Topʉ tiquina esagʉ̃ tiquinare tiquiro nidiro sahata wahahye. Sa ye tiquina pascua cjẽ ihyatire dahreahye.

¹⁴Ihyari pje ijigʉ̃ Jesu doce tiquiro buheyequina mehna ihya dujiahye.

¹⁵Topʉ ihyaropʉ dujiro Jesu tiquinare yahuahye: —‍Mʉsare niita niaja. Ahri pascua bose decore mari dahreaja Cohãcjʉ̃ tiquiro yequinare tiquiro yʉhdʉotire wacũna. Came Cohãcjʉ̃ tiquiro pʉhtoro ijiropʉ tiquiro yequinare yʉhdʉo tuhasarota. Tiquiro sa yʉhdʉoato pano ahri deco cjẽne pari turi ihyasi yʉhʉ. Sa yegʉ yojopʉre yʉhʉ ñano yʉhdʉato pano ahri pascua cjẽ ihyayere mʉsa mehna tutuaro ihya duahti yʉhʉ, niahye Jesu.

¹⁶

¹⁷Sa ninota Jesu sihnidi pare ne, Cohãcjʉ̃re “Quehnoare”, ni sini, tiquinare yahuahye: —‍Mʉsare niita niaja. Cohãcjʉ̃ ijipihtiyequina pʉhtoro tiquiro ijiato pano ahri vinore ne pari turi sihnisi yʉhʉ. Sa yena ahri vinore ne, mʉsa basi iti sihniña, niahye Jesu.

¹⁸

¹⁹Sa ni tuhasa pãre ne, Cohãcjʉ̃re “Quehnoare”, niahye. Sa yero tiare nuha, itiahye tiquinare. Tiare itiro, tiquinare yahuahye: —‍Ahri yʉhʉ pagʉ ijire. Yʉhʉ pagʉ yʉhʉre ihña tuhtiyequinare tiquina ohori pagʉ ijirota mʉsare yʉhʉ yʉhdʉoati. Sa yena yʉhʉre mʉsa wacũatire ahrire ihyaya, niahye Jesu.

²⁰Sa ihya tuhasa sata tiquiro tiquinare sihnidi pa gʉ̃hʉre ohoahye. Sa ohoro, tiquinare yahuahye: —‍Mʉsa ñañe yeyere cohãgʉ tagʉ yariʉtja. Sa yegʉ yʉhʉ diire cohãʉtja. Cohãcjʉ̃ “Mʉsare yʉhdʉoutja”, tiquiro nidiro esa tuhagʉ̃ yʉhʉ yariaro mehna tiquiro nidiro sohtori tirota.

²¹’Yojopʉre tʉhoya mʉsa. Yʉhʉre ihña tuhtiyequinare yʉhʉre ihñoatiquiro yojopʉre yʉhʉ mehna ohõ dujire.

²²Cohãcjʉ̃ tiquiro dutiriro sahata yʉhʉ masʉ Cohãcjʉ̃ ohorigʉ yariʉtja. Tiquiro sa yaria dutiepegʉ̃ta yʉhʉre ihña tuhtiyequinare ihñoatiquiro pũrita ña yʉhdʉaro yʉhdʉrota, niahye Jesu tiquinare.

²³Tiquiro sa nigʉ̃ tiquina pehe tiquina basi ohõ saha ni sinituahye: —‍¿Jesure ihña tuhtiyequinare ihñoatiquiro mari mehna cjʉ̃no diquiro boro ijiagari? ni, yahuducuahye tiquina basi. —‍¿Mari mehna cjʉ̃no diquiro pehe ijiagari pʉhtoro? ni yahuducuahye Jesu buheyequina tiquina basi

²⁴Came Jesu buheyequina ohõ saha ni yahuducuahye: —‍¿Mari mehna cjʉ̃no diquiro pehe ijiagari pʉhtoro? ni yahuducuahye tiquina basi.

²⁵Tiquina sa ni yahuducugʉ̃ tʉhoro Jesu tiquinare yahuahye: —‍Cohãcjʉ̃re cahmeeñequina pʉhtoa pehe tiquina masare dutiye, purĩno mehna dutire. Sa ye pʉhtoare “Tiquina masare yedohoyequina ijire”, nimene apequina masa tiquinare.

²⁶Mʉsa pehe sa yesi mʉsa basi. Mʉsa mehna cjʉ̃no mʉsa wahmi pehere tiquiro bahʉro yero saha ijiro cahmene. Mʉsa mehna cjʉ̃no pʉhtoro iji duaro cahacjʉ̃no yero saha ijiro cahmene tiquirore.

²⁷¿Diquiro ijiajari pʉhtoro? ¿Ihya dujiriquiro pehe pʉhtoro ijiajari? ¿O ihyayere itiriquiro pehe pʉhtoro ijiajari? Ihya dujiriquirota ijiaga pʉhtoro. Tiquiro sa ijiepegʉ̃ta yʉhʉ pehe cahacjʉ̃no yero saha mʉsare yedohogʉ ahtaʉ.

²⁸’Masa yʉhʉre tiquina ñano yepegʉ̃ta mʉsa pehe yʉhʉre duhuerare.

²⁹Sa yegʉ yʉhʉ Pacʉ yʉhʉre tiquiro pʉhtoro sõriro sahata mʉsa gʉ̃hʉre pʉhtoa sõgʉtja yʉhʉ.

³⁰Yʉhʉ pʉhto yʉhʉ ijigʉ̃ yʉhʉ ihyari mesapʉ mʉsa gʉ̃hʉ ihya, sihninata. Sa yena mʉsa pʉhtoa dujiyere dujinata. Mʉsa topʉ dujina Israe masare doce cururi cjẽnare besenata mʉsa ñañequinare, quehnoañequinare, niahye Jesu tiquiro buheyequinare. Pedro Jesure tiquiro cohãtire yahuahye Jesu

³¹Sa ni tuhasa Pedrore Jesu ohõ saha ni yahuahye: —‍Simo Pedro yʉhʉre tʉhoya. Mʉsare ijipihtinare watĩno yʉhʉre cohãgʉ̃ ye duare. Trigo wese cjʉ̃no trigore tiquiro wejẽ site cohãriro sahata mʉsare ijipihtinare watĩno ñano ye duare. Sa ye duaro, Cohãcjʉ̃re sinidi.

³²Tiquiro sa sinigʉ̃ ihñagʉ̃ yʉhʉ pehe Cohãcjʉ̃re sini basaʉ mʉhʉre. Yʉhʉre mʉhʉ wacũ tutua duhueratire sini basaʉ mʉhʉre. Sa yegʉ mʉhʉ yʉhʉ mehna cjʉ̃ pari turi ijigʉ yeequinare yedohoya mʉhʉ, yʉhʉre tiquina wacũ tutua nemoati, niahye Jesu Pedrore.

³³Tiquiro sa nigʉ̃ Pedro yʉhtiahye: —‍Pʉhto, yʉhʉre tiquina peresu yepegʉ̃ta, yʉhʉre tiquina wejẽ duepegʉ̃ta mʉhʉ mehna cjʉ̃ ijiitja, niahye Pedro.

³⁴Jesu yʉhtiahye: —‍Pedro, mʉhʉre niita niaja. Mia ñami canaca tiquiro yahuato pano “Jesure masiedaja”, nigʉta mʉhʉ apequinare. Ihtia taha sa nigʉta mʉhʉ, niahye Jesu Pedrore. Jesure tiquina ñano ye dʉcato mehenogã dʉhsahye

³⁵Sa ni tuhasa Jesu tiquiro buheyequinare yahuahye: —‍¿Sohõ ijiri pje niñeru ajuro mariena, pajiri ajuro mariena, dahpo suhti mariena mʉsare yʉhʉ ohogʉ̃ apee boro dʉhsari mʉsare? ni sinituahye Jesu. —‍Ne ʉsãre yabe dʉhsaerari, ni yʉhtiahye tiquina.

³⁶—‍Ti pjere mʉsare dʉhsaerapegʉ̃ta yojopʉ pehere niñeru ajurore cʉona tire neña. Pajiri ajurore cʉona gʉ̃hʉ neña. Sa yena mʉsare ñoseni pjĩ mariedagʉ̃ mʉsa suhtire duana ti pjĩne dúya.

³⁷Ahrire mʉsare nii niaja. Cohãcjʉ̃ yere tiquina ojoari pũpʉ tiquina nidiro sahata yʉhʉre sa waharo cahmene. Ohõ saha niahye ti pũpʉ: “ ‘Tiquiro dutiyere yʉhdʉdʉcayequina mehna cjʉ̃no ijire’, nieta masa”, ni, ojoahye, niahye Jesu.

³⁸—‍Ihñaña pʉhto. Pʉa pjĩ ñoseñe pjĩnine cʉoaja ʉsã, niahye tiquiro buheyequina. —‍To punota ijire, ni yʉhtiahye Jesu. Getsemaní wame tiri wesepʉ Jesu Cohãcjʉ̃re siniahye

³⁹Sa ye Jesu tiquiro sa yeducuriro sahata Olivo wame tidʉ cʉnʉpʉ wahahye. Tiquiro sa wahagʉ̃ tiquiro buheyequina tiquiro mehna wahahye.

⁴⁰Topʉ esaro tiquiro tiquinare yahuahye: —‍Cohãcjʉ̃re siniña mʉsa ñano yeratire, niahye Jesu tiquinare.

⁴¹Sa ni tuhasa tiquiro dihita mehenogã waha nemo, dʉsepe curi mehna quehe sa, Cohãcjʉ̃re siniahye:

⁴²—‍Mai, yʉhʉ ñano yʉhdʉatire ye dueragʉ yeracãhña. Yʉhʉ sa niepegʉ̃ta yʉhʉ cahmeñe pehere yeracãhña. Mʉhʉ pehe masine. Mʉhʉ cahmeno saha yeya yʉhʉre, ni siniahye Jesu Cohãcjʉ̃re.

⁴³Tiquiro sa sinigʉ̃ ʉhmʉsepʉ ahtariquiro angel Jesure bajua, yedohoahye tiquirore.

⁴⁴Sa yero Jesu ñano jeripohna ti, tutuaro mehna Cohãcjʉ̃re siniahye. Sa yero tiquiro asi ti cuhsaye dii pjeri yero saha tiquirore wijia, yehpapʉ bora quehe sahye.

⁴⁵Cohãcjʉ̃re sini bato ti, wahcãdʉca sa, tiquiro buheyequina cahapʉ wihiahye. Tiquiro wihigʉ̃ tiquiro buheyequina tutuaro bʉjʉa witiyequina ijiye, carĩñe niahye.

⁴⁶Sa yero Jesu tiquinare ohõ saha ni yahuahye: —‍¿Dʉhsena carĩajari mʉsa? Wahcãña. Cohãcjʉ̃re siniña mʉsa, “Ñano yeari”, nina, niahye Jesu tiquinare. Jesure ihña tuhtiyequina tiquirore peresu yeahye

⁴⁷Tiquiro sa ni yahuducuri watoa masa peyequina wihiahye. Juda doce buheyequina mehna cjʉ̃no ijimediquiro masare ʉhmʉ tã cãhtariquiro ijiahye. Sa yero tiquiro Jesu cahapʉ wihi, wahsupu ihmiahye tiquirore.

⁴⁸Tiquiro sa ihmigʉ̃ Jesu tiquirore sinituahye: —‍¿Juda, yʉhʉ masʉre Cohãcjʉ̃ ohorigʉre yʉhʉre ihña tuhtiyequinare ihñogʉ yʉhʉre wahsupu ihmiñe mehna sa yeajari mʉhʉ? niahye Jesu.

⁴⁹Tiquiro sa nidi bato Jesu buheyequina masa Jesure tiquina ñeheatire masiñe, tiquirore sinituahye: —‍¿Pʉhto, ʉsã ñoseñe pjĩni mehna tiquina mehna cahmequema? niahye tiquina.

⁵⁰Tiquina sa nidi bato ihcãquiro Jesu buheyequina mehna cjʉ̃no pehe pahia pʉhtoro cahacjʉ̃nore tiquiro ñoseni pjĩ mehna tiquiro cahmonore poto pehe ijiri cahmonore dʉte pahrẽ cãhye.

⁵¹Tiquiro sa yegʉ̃ ihñano Jesu tiquirore ohõ saha niahye: —‍Sa yeracãhña, niahye. Ni, cahacjʉ̃no cahmono ijiriropʉ ña ohõahye. Tiquiro ña ohõgʉ̃ta cahmono mʉnano sahata ijiahye tja.

⁵²Sa ye tuhasa pahia pʉhtoare Cohãcjʉ̃ wʉhʉ cjẽna surara pʉhtoare, bʉcʉna gʉ̃hʉre tiquirore ñeheñe ahtariquinare Jesu sinituahye: —‍¿Dʉhse ijiro boro mʉsa ñoseñe pjĩni, yucʉ tiãri mehna yaqueriquirore tiquina yeriro saha mʉsa yʉhʉre ñehena ahtajari?

⁵³Decoripe Cohãcjʉ̃ wʉhʉpʉ mʉsa mehna yʉhʉ ijigʉ̃, mʉsa yʉhʉre ñehedari. Sa ijiepegʉ̃ta yojopʉre mʉsa ya deco yʉhʉre mʉsa ñano yeati deco ijire. Yojopʉ watĩno tiquiro ñano yeati deco gʉ̃hʉ ijire, niahye Jesu. —‍Tiquirore masiedaja, niahye Pedro Jesure

⁵⁴Tiquina Jesure ñehe tuhasa pahia pʉhtoro ya wʉhʉpʉ neahye tiquina tiquirore. Tiquina topʉ neagʉ̃ Pedro yoaropʉ tiquinare ihña nʉnʉ tãhye.

⁵⁵Pʉhtoro ya wʉhʉpʉ esa, topʉ wʉhʉ cahapʉ ijiri paapʉ, quehnoari paa decopʉ peca wijiãhye apequina. Tiquina wijiãgʉ̃ ihñano Pedro peca cahapʉ dujiyequina mehna dujiahye.

⁵⁶Tiquiro dujiri bato ihcãcoro cahacjõno tiquirore quehnoano ihña, apequinare ohõ saha ni yahuahye: —‍Ahriquiro gʉ̃hʉ tiquiro mehna ijiri, niahye ticoro.

⁵⁷Ticoro sa nigʉ̃ tʉhoro Pedro yʉhtiahye: —‍Numio, tiquirore ne masiedaja yʉhʉ, nimahye tiquiro.

⁵⁸Came cjũnogã apequiro Pedrore ihña, ohõ saha ni yahuahye: —‍Mʉhʉ gʉ̃hʉ tiquina mehna cjʉ̃ ijire, niahye tiquiro. —‍Ne ijieraja, nimahye Pedro.

⁵⁹Ihcã hora bato apequiro apequinare ohõ saha ni yahuahye: —‍Ijirota ijire. Ahriquiro Galilea cjʉ̃no ijire. Sa yero potota Jesu mehna ijiri ahriquiro gʉ̃hʉ, niahye tiquiro apequinare.

⁶⁰Tiquiro sa nigʉ̃ Pedro yʉhtiahye: —‍Ne, mʉhʉ nidiquirore masiedaja yʉhʉ, ni yʉhtiahye Pedro. Tiquiro sa ni yahuducuri watoa canaca yahuahye.

⁶¹Tiquiro yahugʉ̃ta Jesu wʉhʉ cahapʉ ijiriquiro Pedrore majare ihñadoqueoahye. Tiquiro sa yegʉ̃ Pedro pehe Jesu tiquiro nidire wacũahye. “Mia ñami canaca tiquiro yahuato pano, ‘Yʉhʉ Jesure masiedaja’, nigʉta mʉhʉ. Ihtia taha sa nigʉta mʉhʉ”, Jesu tiquiro nidire wacũahye Pedro.

⁶²Sa wacũno Pedro topʉ wijia ta, tutuaro utiahye. Jesure bʉjʉpe, quẽahye tiquina

⁶³Sa ye Jesure cohteyequina surara tiquirore bʉjʉpe, quẽpeahye.

⁶⁴Sa quẽpeye, tiquiro caperire dʉhte cahmota, tiquirore sinituahye: —‍¿Diquiro mʉhʉre quẽari? Ihñedapegʉta yahuya ʉsãre, ni sinitupeahye tiquina.

⁶⁵Sa ye peye ñano ni yahuducuahye tiquina tiquirore. Jesure pʉhtoa sinituahye

⁶⁶Bohrearopʉ judio masa bʉcʉna, pahia pʉhtoa, judio masare buheyequina gʉ̃hʉ cahmecoahye. Tiquina sa cahmecoanopʉ apequina tiquina cahapʉ Jesure ne cãhtahye.

⁶⁷—‍Yahuya ʉsãre. ¿Cristota ijiajari mʉhʉ? ni sinituahye tiquina Jesure. Tiquina sa nigʉ̃ Jesu yʉhtiahye: —‍Mʉsare yʉhʉ yahugʉ̃, yʉhʉre tʉhosi mʉsa.

⁶⁸Mʉsare yʉhʉ sinitugʉ̃ yʉhʉre yʉhtisi mʉsa. Sa yena yʉhʉre wiosi mʉsa.

⁶⁹Mʉsa wioerapegʉ̃ta came cjũnogã ijipihtiye decori yʉhʉ masʉ Cohãcjʉ̃ ohorigʉ Cohãcjʉ̃ tutuariquiro tiquiro poto pehepʉ dujigʉtja, niahye Jesu.

⁷⁰Tiquiro sa nigʉ̃ tiquina ijipihtiyequina sinituahye tja pari turi: —‍¿Sa nigʉ Cohãcjʉ̃ macʉta ijiajari mʉhʉ? niahye tiquina. —‍Mʉsa nino sahata ijiaja, ni yʉhtiahye Jesu tiquinare.

⁷¹Tiquiro sa nigʉ̃ tiquina ohõ saha ni yahuducuahye tiquina basi: —‍Ahriquiro Cohãcjʉ̃re pajiro tiquiro ñano yahuducugʉ̃ mari basi tʉhou. Sa ye topequinata yahusãahdo ahriquirore, niahye tiquina basi.