Read Piratapuyo San Juan 10 Bible Online

San Juan 10 - Piratapuyo bible

San Juan 10

¹Came queoye mehna buhero ohõ saha nidi Jesu: —‍Ijirota niaja mʉsare. Ovejare cohteri sahrĩno sopecaha sajãedariquiro, sopecaha marienopʉ sajãriquiro pehe yaque bʉcʉro ijire.

²Sopecaha sajãriquiro pehe ovejare cohteriquiro ijire.

³Sopecahare cohteriquiro sopecahare põore ovejare cohteriquiro sajãtore. Ovejare cohteriquiro yahuducugʉ̃ tʉho cãhtare tiquiro nuñequina oveja pari. Tiquinare pijioro tiquina wame mehna pisuducure tiquiro. Sa yero tiquinare sahrĩnopʉ ijiriquinare piji wiodocore sopecahapʉ.

⁴Tiquiro yequinare ijipihtiyequinare piji wio tiquinare sa ʉhmʉ tãducure. Oveja pehe tiquiro yahuducuyere tʉho masiñe tiquiro bato nʉnʉ tãre.

⁵Apequirore tiquina ihña masieniquirore nʉnʉ tãedare tiquina. Sa ye apequina tiquina yahuducuyere tʉhoye, cue oma sitea wahare, nidi Jesu tiquinare.

⁶Ahri queoyere tiquiro sa yahuepegʉ̃ta tiquiro yahuyere masiedari tiquina. Jesu ovejare quehnoano cohteriquiro yero saha tiquiro yequinare quehnoano cohtere

⁷Pari turi Jesu tiquinare yahuri tja: —‍Ijirota niaja mʉsare. Ovejare cohteri sahrĩno sopecaha yero saha ijiaja yʉhʉ.

⁸Ijipihtiyequina yʉhʉ pano ahtayequina ni mehoñene buheyequina yaqueyequina yero saha ijire. Tiquina sa ijiepegʉ̃ta oveja yero saha ijiyequina yeequina pehe apequinare ne tʉho cãedare.

⁹Yʉhʉ ovejare cohteri sahrĩno sopecaha yero saha ijiaja. Sopecaha sajãñequina yero saha ijire yʉhʉre wacũ tutuayequina. Sa yegʉ tiquinare pecapʉ wahaboriquinare yʉhdʉoutja. Ovejare cahmotari sahrĩno tiquinare cahmotariro sahata yʉhʉ yʉhdʉoyequinare cahmotaʉtja. Sa ye tiquina cahmeñene cʉoeta tiquina, nidi Jesu.

¹⁰Sa ni tuhasa ohõ saha ni nemori: —‍Mʉsare ni meho buheyequina ovejare yaqueyequina yero saha ijire. Apequina yaque duaye, apequina wejẽ duaye ahtare. Oveja yero saha ijiyequinare, yeequina ijipihtiye decori Cohãcjʉ̃ mehna ijiatiquinare yegʉ ahtaʉ yʉhʉ. Sa yegʉ yeequina decoripe tiquina bucueatire ahtaʉ yʉhʉ.

¹¹Ovejare quehnoano cohteriquiro yero saha ijiaja yʉhʉ. Ovejare quehnoano cohteriquiro yariatiquiro ijieperota tiquiro yequina ovejare cohtere, “Sijoro wahari”, nino. Yeequina Cohãcjʉ̃ mehna tiquina sa ijiducuatire yegʉ yariʉtja yʉhʉ.

¹²Oveja upʉro cahacjʉ̃no pehe oveja upʉro ijierare. Sa yeye oveja tiquiro yequina ijierare. Sa yero yairo ovejare tiquiro ihyaro ahtagʉ̃ ihñano tiquiro cahacjʉ̃no pehe ovejare cohã doco cã, oma cãa wahare. Tiquiro sa cohã docori bato, yairo ovejare tiquiro ñehegʉ̃ ihñañe oveja pari oma site cãa wahare.

¹³Tiquiro cahacjʉ̃no pehe tiquiro wapataye dihitare cahmene. Sa yero tiquiro ovejare quehnoano cohte coaerare, nidi Jesu.

¹⁴Sa ni tuhasa ohõ saha ni nemori: —‍Ovejare quehnoano cohteriquiro yero saha ijiaja yʉhʉ. Sa yegʉ yeequinare masiaja yʉhʉ. Sa yeye yeequina pehe yʉhʉre masine.

¹⁵Sata yʉhʉ Pacʉ gʉ̃hʉ yʉhʉre masine. Sa yegʉ yʉhʉ gʉ̃hʉ yʉhʉ Pacʉre masiaja. Oveja yero saha ijiyequina yeequina Cohãcjʉ̃ mehna tiquina sa ijiducuatire yariʉtja yʉhʉ.

¹⁶Apequina oveja ape sahrĩno cjẽna yero saha ijiyequina apequina masa gʉ̃hʉ yeequina ijieta. Tiquina gʉ̃hʉre neagʉtja. Sa ye yʉhʉ yahuducugʉ̃ tʉho cãeta tiquina gʉ̃hʉ. Sa ye yeequina ijipihtiyequina ihcã curuata ijieta. Sa yegʉ yʉhʉ dihita yeequinare cohteitja, nidi Jesu.

¹⁷Sa ni tuhasa ohõ saha ni nemori: —‍Yeequina Cohãcjʉ̃ mehna tiquina sa ijiducuatire yariʉtja yʉhʉ. Yʉhʉ yariari bato masa mʉjagʉtja. Sa yeacjʉ yʉhʉ ijigʉ̃ yʉhʉ Pacʉ yʉhʉre cahĩne.

¹⁸Yʉhʉ wejẽ dutieragʉ̃ yʉhʉre wejẽ masiedaboaya tiquina. Yʉhʉ cahmeno sahata yʉhʉre wejẽeta. Sa yegʉ yeequina Cohãcjʉ̃ mehna tiquina sa ijiducuatire yariʉtja. Yaria masiaja yʉhʉ. Sa yegʉ masa mʉja masiaja. Yʉhʉ Pacʉ yʉhʉre tireta ye dutiri, nidi Jesu.

¹⁹Tiquiro sa nigʉ̃ tʉhoye judio masa pʉa curua tu wari. Apequina sijoro tʉhotu, apequina gʉ̃hʉ sijoro tʉhoturi.

²⁰—‍Tiquiro watĩno cʉore. Sa yero tʉho masiedare. ¿Dʉhsena tiquirore pari turi tʉhoajari mʉsa? nidi apequina peyequina judio masa.

²¹Apequina pehe ohõ saha nidi: —‍Watĩno cʉoriquiro ijiro sa ni yahuducueraboaya. Caperi bajueriquirore ihñagʉ̃ ye masiedare watĩnore cʉoriquiro. Sa yero watĩnore cʉoerare Jesu, nidi apequina judio masa. Judio masa Jesure cahmedahye

²²Ape deco ʉsã acaye judio masa Jerusalẽpʉ bose deco yeye nidi pari turi. Cohãcjʉ̃ wʉhʉre panopʉ Cohãcjʉ̃re tiquina ohorire tiquina wacũati deco ijiri. Ti pjere pohecʉ ijiri.

²³Ti decore Salomo wame tiri tucũpʉ Cohãcjʉ̃ wʉhʉpʉ ijiri tucũpʉ Jesu ihña tinino nidi.

²⁴Ti tucũpʉ tiquiro ijigʉ̃ ihñañe ʉsã acaye judio masa tiquiro cahapʉ cahmecoa, tiquirore sinituri. —‍Yoabutiari pje ʉsãre quehnoano yahueraga mʉhʉ. Poto ʉsãre quehnoano yahu madoqueohya mʉhʉ. ¿Cohãcjʉ̃ ohorigʉ Cristota ijiajari mʉhʉ? nidi tiquina Jesure.

²⁵Tiquina sa nigʉ̃ tʉhoro ohõ saha ni yʉhtiri Jesu: —‍Mʉsare yahu tuhasamajagʉ. Yʉhʉ sa yahuepegʉ̃ta yʉhʉre tʉho duerare mʉsa. Yʉhʉ Pacʉ yʉhʉre tiquiro dutiriro sahata tiquiro tutuaye mehna ye ihñoaja. Sa yegʉ yʉhʉ Cristo ijiyereta mʉsare ihñogʉ niaja.

²⁶Yʉhʉ sa ihñoepegʉ̃ta yʉhʉre tʉho duerare mʉsa. Mʉsa pehe yeequina ijierare. Sa yena apequiro yequina oveja yero saha ijina, yʉhʉ pehere tʉhoerare mʉsa.

²⁷Ovejare cohteriquirore tiquiro yequina tiquina tʉhoriro saha yʉhʉre yeequina tʉhore. Sa yegʉ tiquinare masiaja yʉhʉ. Sa ye tiquina yʉhʉ mehna wahare.

²⁸Sa yegʉ ijipihtiye decori Cohãcjʉ̃ mehna ijigʉ̃ yeaja tiquinare. Sa ye tiquina pecapʉ wahasi. Sa yegʉ yeequinare yʉhʉ cohtegʉ̃ apequina pehe ne yʉhʉre ehma masiedare yeequinare.

²⁹Yʉhʉ Pacʉ yʉhʉre yeequinare ohoriquiro ijipihtiyequina yʉhdʉoro tutuariquiro ijire. Sa ye yʉhʉ Pacʉ pehe yeequinare tiquiro cohtegʉ̃ apequina pehe tiquiro gʉ̃hʉre ne ehma masiedare tiquinare.

³⁰Yʉhʉ, yʉhʉ Pacʉ mehna ihcʉ̃ta ijiaja, nidi Jesu judio masare.

³¹Tiquiro sa nigʉ̃ tʉhoye judio masa pehe tiquirore tiquina doque wejẽati ʉtã pacare pari turi nemedi tja.

³²Tiquina sa yegʉ̃ ihñano Jesu sinituri tiquinare: —‍Yʉhʉ Pacʉ tutuaye mehna peye tahari ye ihñomi mʉsare. ¿Dise boro pehere yʉhʉ yeri buhiri yʉhʉre ʉtã paca mehna doque wejẽ duajari mʉsa? ni sinituri Jesu.

³³Tiquiro sa nigʉ̃ tʉhoye ohõ saha nidi tiquina: —‍Cohãcjʉ̃ tutuaye mehna mʉhʉ ye ihñori buhiri mʉhʉre ʉtã mehna doque wejẽ dueraja ʉsã. Cohãcjʉ̃re mʉhʉ ñano yahuducuri buhiri mʉhʉre ʉtã paca mehna doque wejẽ duaja ʉsã. Masʉ ijiepegʉta “Cohãcjʉ̃ ijiaja yʉhʉ”, mʉhʉ niñe buhiri mehna mʉhʉre ʉtã paca mehna doque wejẽ duaja ʉsã, ni yʉhtiri tiquina.

³⁴Tiquina sa ni yʉhtigʉ̃ tʉhoro Jesu tiquinare yahuri: —‍Mʉsa gʉ̃hʉre “Cohãmana”, ni pisuri Cohãcjʉ̃. Sata ni ojoahye tiquiro dutiyere tiquina ojoari pũpʉ.

³⁵Cohãcjʉ̃ yere tiquina ojoari pũ potota ijigʉ̃ mari masiaja. “Ni mehoñe ijire”, ti pũre ni masiedaja mari. Sa yero tiquiro yere tʉhoyequinare potota tiquiro “Cohãmana”, ni pisure.

³⁶Cohãcjʉ̃ yʉhʉre besetjiãno, ahri yehpapʉre ohori. Sa yegʉ yʉhʉ “Cohãcjʉ̃ macʉ ijiaja”, yʉhʉ nidi buhiri “Cohãcjʉ̃re ñano yahuducuro nine Jesu”, nine mʉsa yʉhʉre. ¿Dʉhsena yʉhʉre sa niajari mʉsa?

³⁷Yʉhʉ Pacʉ tiquiro cahmediro sahata tiquiro tutuaye mehna yʉhʉ ye ihñoedagʉ̃ pũritare yʉhʉ buherire “Poto tjire” niedaboaga mʉsa.

³⁸Yʉhʉ Pacʉ tiquiro tutuaye mehna yʉhʉ ye ihñoepegʉ̃ta yʉhʉ pehere tʉho duerare mʉsa. Sa tʉho duerapenata tiquiro tutuaye mehna yʉhʉ ye ihñogʉ̃ ihñana yʉhʉ yerire “Poto tjire”, niña mʉsa. Mʉsa sa nina, yʉhʉ Pacʉ mehna ʉsã ihcãno saha ijigʉ̃ masinata mʉsa. Sa yena tʉhonata mʉsa, nidi Jesu tiquinare.

³⁹Tiquiro sa nigʉ̃ tiquina pari turi tiquirore ñehe duamedi. Tiquina sa ñehe duagʉ̃ ihñano tiquiro duhti wijiaa wahari.

⁴⁰Sa wijiariquiropʉta Ñu masare tiquiro wame ye mʉhtariropʉ Jordã asʉ̃ mʉja taro pehepʉ pari turi Jesu wahari tja. Topʉ esaro tojoa cãri tiquiro.

⁴¹Sa ye masa peyequina tiquirore ihñañe esari. Ohõ saha nidi tiquina basi: —‍Ñu pehe Cohãcjʉ̃ tutuaye mehna ye ihñoedari. Sa ye ihñoedapegʉ̃ta ijipihtiye Jesure tiquiro yahuri pehe queorota ijire, nidi masa tiquina basi.

⁴²Sa ye topʉre masa peyequina wacũ tutua dʉcari Jesure.