Read Piratapuyo San Juan 11 Bible Online

San Juan 11 - Piratapuyo bible

San Juan 11

¹Sa ye Betania wame tiri maca cjʉ̃no Lázaro wame tiriquiro dohatiro niahye. Ti macapʉ tiquiro wahmiosãnumia gʉ̃hʉ María, Marta mehna ijiri.

²María pehe Jesure ehme sitiye pio wisõaticoro, ticoro poari mehna tiquirore tu coseaticoro ijire. Ticoro bahʉro Lázaro pehe dohatiro niahye.

³Sa ye tiquina numia apequinare Jesure yahu dutiye ohoahye. —‍Pʉhto, mʉhʉ cahĩniquiro dohatiro nine, ni yahu dutiye ohoahye Lázaro wahmiosãnumia.

⁴Ti quitire tʉhoro ohõ saha nidi Jesu: —‍Yojopʉre Lázaro tiquiro dohatiye tiquiro yariati ijierare. Cohãcjʉ̃ tutuayere masare ihñoatire yojopʉre tiquiro dohatire. Sa ye yʉhʉ tutuagʉ yʉhʉ ijigʉ̃ gʉ̃hʉre masa ihñaeta, nidi Jesu.

⁵Jesu Martare, ticoro bahoro gʉ̃hʉre, Lázaro gʉ̃hʉre tutuaro cahĩdi.

⁶Sa nino Lázaro tiquiro dohatigʉ̃ tʉhoeperota topʉ Jesu pʉa deco tojoari.

⁷Pʉa deco bato Jesu ohõ saha nidi ʉsãre tiquiro buhenare: —‍Pari turi Judea yehpapʉ tojoa wahaʉhna tja, nidi ʉsãre.

⁸—‍Buhegʉ, canʉagãta judio masa mʉhʉre ʉtã paca mehna doque wejẽ duamedi. ¿Dʉhsegʉ pari turi tojoaa waha duajari mʉhʉ? nii ʉsã pehe.

⁹Ʉsã sa nigʉ̃ tʉhoro tiquirore tiquina wejẽ masiedarĩne yahuro, queoye mehna buhero ohõ saha nidi ʉsãre: —‍Pajiro tʉhotueracãhña. Ihcã decore doce horari waro ijire. Asʉ̃ deco cjʉ̃no ijigʉ̃ quehnoano ihñaja mari. Sa yena decore tinina, ne pʉha boraeraja mari.

¹⁰Nahitianopʉ tiniñequina pʉha boraa wahare. Asʉ̃ deco cjʉ̃no mariedagʉ̃ quehnoano ihñedare tiquina, nidi Jesu. (Sa nino ohõ saha nino niahye: “Yojopʉre yʉhʉ Pacʉ yere yʉhʉ yahu pehoato dʉhsarĩne. Sa ye yʉhʉre wejẽ masiedarĩne”, nino niahye.)

¹¹Sa nino ʉsãre yahu nemori tja: —‍Mari mehna cjʉ̃no Lázaro, carĩno niaga. Tiquiro sa carĩepegʉ̃ta yʉhʉ tiquirore wahcõgʉ wahaʉtja, nidi ʉsãre.

¹²—‍Pʉhto, Lázaro carĩniquiro ijiro, yʉhdʉrota, nii ʉsã.

¹³Ʉsã sa niepegʉ̃ta Jesu “Carĩno niaga”, nino “Yariaa wahare”, nino nidi jimedi. Tiquiro sa nigʉ̃ tʉhona “Lázaro soro niaga”, ni tʉhotumi ʉsã pehe.

¹⁴Ʉsã sa ni tʉhotugʉ̃ masino Jesu poto yahuri ʉsãre: —‍Lázaro yariaa wahaga.

¹⁵Yʉhʉ marieno tiquiro yariagʉ̃ quehnoarĩne. Sa yena mʉsa yʉhʉre wacũ tutua nemonata. Isa mari ihñana wahaʉhna tiquiro cahapʉ, nidi Jesu.

¹⁶Tomasu sʉhdʉariquiro tiquina ni pisuriquiro ohõ saha nidi ʉsãre: —‍Mari gʉ̃hʉ Jesu mehna wahaʉhna. Tiquirore wejẽñe, mari gʉ̃hʉre wejẽahdo, nidi Tomasu. Jesu sa ijiducugʉ̃ yeriquiro masare masoriquiro ijire

¹⁷Sa ye topʉre ʉsã esari bato to cjẽna ohõ saha ni yahuri Jesure: —‍Pititia deco wahare Lázaro mʉnanore masa copepʉ tiquina cũri bato, ni yahuri tiquirore.

¹⁸Betania pehe Jerusalẽ cahapʉ ihtia kilómetro yoaro ijiri.

¹⁹Sa ye ʉsã acaye judio masa peyequina Martare, María gʉ̃hʉre ñehe quea utiye ahtahye Lázaro yariari bato.

²⁰Sa yero Jesu mehna ʉsã esana tana yegʉ̃ tʉhoro Marta pehe ʉsãre piti caro ahtari jiri. Ticoro sa piti caro wahagʉ̃ María pehe tiquina ya wʉhʉpʉ tojoahye.

²¹Sa piti caro Marta ohõ saha nidi Jesure: —‍Pʉhto, yʉhʉ bahʉ tiquiro yariato pano mʉhʉ ohõpʉ ijigʉ̃ tiquiro yarieraboaya.

²²Yojopʉ gʉ̃hʉre Cohãcjʉ̃re mʉhʉ sini basagʉ̃ tiquiro mʉhʉ sinino sahata yerota, nidi Marta Jesure.

²³—‍Mʉhʉ bahʉ masa wijiarota, nidi Jesu ticorore.

²⁴—‍Ahri yehpa pihtiati deco tiquiro masa wijiatore masiaja yʉhʉ, nidi ticoro.

²⁵Ticoro sa nigʉ̃ Jesu yahuri tja: —‍Yʉhʉ masa wijiagʉ̃ yegʉ tjiaja. Yʉhʉ sa ijiducugʉ̃ yegʉ tjiaja. Yʉhʉre wacũ tutuariquiro yarieperota sa ijiducurota.

²⁶Sa ye ijipihtiyequina Cohãcjʉ̃ mehna ijiducuyequina yʉhʉre wacũ tutuayequina ne pecapʉ wahasi. ¿Ahrire masiajari mʉhʉ? nidi Jesu ticorore.

²⁷—‍Pʉhto, masiaja yʉhʉ. Cristo Cohãcjʉ̃ macʉ, “Ahri yehpapʉ ahtarota”, tiquina nidigʉ mʉhʉ ijigʉ̃ masiaja yʉhʉ, nidi Marta Jesure. Lázaro masa cope cahapʉ esaro Jesu utiahye

²⁸Marta sa ni tuhasa ticoro bahoro Maríare pijiro wahari. —‍Marine buheriquiro mari ya macapʉre wihiri. Mʉhʉre pijire, derogã ni yahuahye Maríare.

²⁹Ticoro sa nigʉ̃ tʉhoro María sojaro mehna wahcãdʉca, ʉsã cahapʉ ahtahye Jesure ihñano taro.

³⁰Tiquina ya macapʉ esera nii ʉsã. Marta ticoro piti cariropʉ ijinii ʉsã.

³¹Judio masa ti wʉhʉpʉ Maríare ñehe quea utiye niahye. Sa ye ticoro wahagʉ̃ ihñañe, tiquina ticorore nʉnʉ tã cãhye. “Ticoro bahʉro mʉnanore tiquina cũri copepʉ utiro waharo nine ticoro”, ni tʉhotumahye tiquina. Sa ni tʉhotuye ticorore nʉnʉ tã cãhye.

³²Sa yero María ʉsã cahapʉ wihiro, Jesure ihña, tiquiro dahpocãri cahapʉ dʉsepe curi mehna quehe sari. —‍Pʉhto, yʉhʉ bahʉ tiquiro yariato pano mʉhʉ ohõpʉ ijigʉ̃ tiquiro yarieraboaya, nidi ticoro Jesure.

³³Sa yero judio masa ticoro mehna ahtariquina gʉ̃hʉ tiquina utigʉ̃ ihñano Jesu pehe tutuaro bʉjʉa witi ñano jeripohna tiri.

³⁴—‍¿Lázaro mʉnanore nohopʉ cohãri mʉsa? ni sinituri Jesu. —‍Ihñaʉ taya, ni piji cãri tiquina.

³⁵Tiquina sa nigʉ̃ tʉhoro Jesu utiri.

³⁶—‍Lázaro mʉnanore Jesu tutuaro cahĩmeyari, nidi judio masa tiquina basi.

³⁷Apequina pehe ohõ saha nidi: —‍Caperi bajueriquirore ihñagʉ̃ yeriquiro ijire ahriquiro Jesu. ¿Sa yero Lázaro tiquiro yariato pano tiquirore yʉhdʉoeraboayari? nidi tiquina. Lázaro masa wijiahye

³⁸Sa yero Jesu pari turi tutuaro bʉjʉa witiri. Sa yena ʉsã ijipihtina Lázaro masa copepʉ esaʉ. Ʉtãpʉ tiquina seheri cope ijiri. Sa yero tiquiro pagʉre tiquina siõ sãa cũri cope ijiri. Sa yero ti cope pajiria ʉtã mehna tiquina bihari cope ijiri.

³⁹—‍Ʉtã bihariare neña, nidi Jesu. Tiquiro sa nigʉ̃ tʉhoro Marta yariariquiro mʉnano wahmiono ohõ saha nidi: —‍Pʉhto, yojopʉ pititia deco waha tuhasare tiquiro yariari bato. Sa yero tiquiro pagʉ ijiriro ʉrĩ yʉhdʉaga, nidi Jesure.

⁴⁰—‍“Yʉhʉre wacũ tutuago Cohãcjʉ̃ tutuayere ihñagota”, mʉhʉre nimigʉ, nidi Jesu Martare.

⁴¹Tiquiro sa nidi bato tiquina ʉtã bihariare ne wiori. Tiquina sa nedi bato Jesu pehe ʉhmʉsepʉ ihña mʉo, Cohãcjʉ̃re ohõ saha nidi: —‍Mai, yʉhʉre mʉhʉ tʉho tuhasari. Tire mʉhʉ yegʉ̃ masigʉ bucueaja mʉhʉre.

⁴²Yʉhʉre mʉhʉ decoripe tʉhoducure. Tire masiaja. Sa masiepegʉta yʉhʉ mʉhʉ ohorigʉ yʉhʉ ijigʉ̃ ohõre ducuyequina tiquina masiatire mʉhʉre sa niaja. Tire “Potota ijire”, tiquina nino quehnoano sa nigʉ niaja, nidi Jesu tiquiro Pacʉrore.

⁴³Sa ni tuhasa Jesu tutuaro sañuducuri: —‍Lázaro ahtaya, ni sañuducuri tiquiro.

⁴⁴Tiquiro sa nigʉ̃ yariariquiro mʉnano omocarine tiquiro dahpocãri gʉ̃hʉre suhti cahseri mehna tiquina dʉhtemediquiro, tiquiro dapure suhtiro mehna tiquina wahmemediquiro, masa copepʉ wijia tari. —‍Tiquina dʉhterire pãña tiquirore, nidi Jesu. Judio masa pʉhtoa pehe Jesure ñehe duamahye

⁴⁵Tiquiro sa masogʉ̃ ihñañe peyequina judio masa mehna cjẽna María mehna ahtariquina Jesure wacũ tutua, cahmedi.

⁴⁶Apequina tiquina mehna cjẽna pehe fariseo masa cahapʉ esaye, Jesu yerire yahuahye tiquinare.

⁴⁷Sa ye pahia pʉhtoa, fariseo masa pʉhtoa gʉ̃hʉ cahmecoa, tiquina basi ohõ saha ni yahuducuahye: —‍Jesu peye tahari Cohãcjʉ̃ tutuaye mehna ye ihñore. Tiquiro sa ye ihñogʉ̃ “Tire yeracãhña”, mari niedagʉ̃ ijipihtiyequina masa tiquirore cahmeñe, tiquiro mehna wahaboaga. Sa ye Roma cjẽna pʉhtoa Cohãcjʉ̃ wʉhʉre cohã dutiye ohoeta tiquina yequina surarare. Mari ya dihta gʉ̃hʉre ehmaeta tiquina. (Mari ya dihta cjẽna Jesure tiquina pʉhtoro cũgʉ̃ ihñañe Roma cjẽna pʉhtoa “Marine cohãñe nine”, ni usua ñano yeeta marine.) ¿Sa yena dʉhse yenatari yojopʉre? ni yahuducuahye tiquina basi.

⁴⁸

⁴⁹Tiquina sa niepegʉ̃ta apequiro Caifa wame tiriquiro ti cʉhmare pahia pʉhtoro ijiro, tiquinare yahuahye: —‍Mʉsa pehe ne masiedare.

⁵⁰Judio masa ijipihtina mari ye ijiatire ihcãquiro masʉno tiquiro yariagʉ̃ quehnoare. Tiquiro yarieragʉ̃ marine ijipihtina judio masare cohã peho cãboaga. Tire mʉsa masiedare, niahye Caifa tiquinare.

⁵¹Sa nino tiquiro esa tuharo sa nino niedahye. Pahia pʉhtoro tiquiro ijigʉ̃ judio masa ye ijiatire Jesu yariatire mari Pacʉ pehe Caifare sa ni yahu dutiahye.

⁵²Jesu yariaro judio masa dihitare yʉhdʉoro taro niedare. Sa yariaro ijipihtiyequina Cohãcjʉ̃ pohnene ahri yehpapʉ iji siteyequina gʉ̃hʉre ihcã curuata ijigʉ̃ yeatire yariatiquiro ijiri Jesu.

⁵³Sa ye ti decota tiquina “¿Jesure dʉhse ye wejẽnatari mari?” ni yahuducuye, tiquirore wejẽñe tee niahye.

⁵⁴Tiquina sa wejẽ duagʉ̃ masino Jesu peyequina judio masa watoa pari turi tinino wahaerari. Sa yero masa marieno cahagã Efraĩ wame tiri macapʉ ʉsãre siho wahari. Ʉsãre ti maca siho tojoarĩdi Jesu.

⁵⁵Ti pjere pascua bose decori ʉsã judio masa ʉsã bose decori ijiato mehenogã dʉhsatjiãri. Sa ye bose deco panogã masa peyequina apeye macari cjẽna Jerusalẽpʉ cahmecoari. Pascua cjẽne tiquina ihyato pano Cohãcjʉ̃ yere yeye tehe, tiquina cahmomohnore cohsoro saha tiquina ñañene cosee tee nidi.

⁵⁶Sa ye tiquina Jesure macañe niahye. Sa ye Cohãcjʉ̃ wʉhʉpʉ ijiyequina ohõ saha ni yahuducuahye: —‍¿Bose decore ihñano ahtaeraboari Jesu, mʉsa tʉhotugʉ̃? niahye tiquina basi.

⁵⁷Sa ye pahia pʉhtoa, fariseo masa gʉ̃hʉ ohõ saha ni yahu dutiahye masare: —‍Jesu wihigʉ̃ ihñana, yahuya ʉsãre. Tiquirore ñehena tana niaja, niahye pʉhtoa masare.