Read Piratapuyo San Juan 13 Bible Online

San Juan 13 - Piratapuyo bible

San Juan 13

¹Sa ye pascua deco bose deco panogã ahri yehpare tiquiro cohã cãtore tiquiro Pacʉro cahapʉ tiquiro wahatore masidi Jesu. Sa yero ahri yehpa cjẽnare tiquiro yequinare tiquiro tutuaro cahĩdi tiquina mehna tiquiro ijiro puno. Sa cahĩducure tiquiro yequinare.

²Ti ñamine Jesu ʉsã tiquiro buhena mehna ʉsã ihyagʉ̃ Juda Iscariotere Simo macʉnore Jesure ihña tuhtiyequinare ihño duti tuhasari jiri watĩno pehe.

³Sa yero mari Pacʉ Cohãcjʉ̃ Jesure ijipihtiyequina bui tiquiro pʉhtoro sõrire masidi Jesu. Sa yero Cohãcjʉ̃ cahapʉ tiquiro ahtarire came ʉhmʉsepʉ tiquiro mʉjati gʉ̃hʉre masidi.

⁴Sa masino wahcãdʉca, tiquiro suhtiro bui cjãnore tu we ne, tore cũ tuhasa, suhtiro cahsero mehna tiquiro pari yʉjʉ dʉhteri.

⁵Dʉhte tuhasa, waparopʉ acore pio sãa, ʉsã tiquiro buhena dahpocãrine cose dʉcari. Ʉsãre cose tuhasa tiquiro dʉhteri cahsero mehna wʉori ʉsã dahpocãrine.

⁶Apequina buheyequinare cose cã, Simo Pedropʉre esari. Tiquiro dahpocãrine tiquiro coseato pano Pedro pehe tiquirore ohõ saha nidi: —‍¿Pʉhto, yʉhʉ dahpocãrine cosegʉ tʉʉ niajari mʉhʉ? nidi Pedro Jesure.

⁷—‍Mianogã mʉhʉre yʉhʉ yeatire masiedare mʉhʉ. Sa masiedapegʉta camepʉ masiita mʉhʉ, nidi Jesu tiquirore.

⁸—‍Yʉhʉ dahpocãrine ne cosesi mʉhʉ, nidi Pedro. —‍Mʉhʉre yʉhʉ coseragʉ̃ yaquiro ijisi mʉhʉ, nidi Jesu.

⁹—‍Pʉhto, yʉhʉ dahpocãri dihitare coseracãhña. Yʉhʉ dahpocãrine, yʉhʉ omocarine, yʉhʉ dapu gʉ̃hʉre coseya, nidi Pedro.

¹⁰Tiquiro sa nigʉ̃ Jesu queoye mehna buhero ohõ saha nidi: —‍Ihcãquiro masʉno cuhsaro tiquiro pagʉre quehnoano tu cose pehore. Sa yero pari turi tiquirore tu cosero cahmedare. Tiquiro dahpocãri dihitare tu cosero cahmene. Ijipihtina mʉsa ñañe yerire coserina mʉsa ijiepegʉ̃ta ihcãquiro mʉsa mehna cjʉ̃no tiquiro ñañene cosemehnediquiro ijire, nidi Jesu.

¹¹Jesu tiquirore ihña tuhtiyequinare ihñoatiquirore masidi: Sa masino “Ihcãquiro mʉsa mehna cjʉ̃no tiquiro ñañene cosemehnediquiro ijire”, nidi.

¹²Ʉsã dahpocãrine cose tuhasa, tiquiro suhtirore saña tuhasa, nuju sari tiquiro dujiriropʉta. —‍¿Mianogã mʉsare yʉhʉ yerire masiajari mʉsa?

¹³Mʉsa yʉhʉre “Buhegʉ”, ni pisuna, “Pʉhto”, ni pisuna poto ninata nine mʉsa yʉhʉre. Mʉsare buhegʉ, mʉsa pʉhto potota ijiaja yʉhʉ.

¹⁴Sa yena yʉhʉ mʉsare buhegʉ, mʉsa pʉhto ijiepegʉta mʉsa dahpocãrine yʉhʉ cosegʉ̃ ihñana mʉsa gʉ̃hʉ mʉsa mehna cjẽna dahpocãrine coseya.

¹⁵Mianogã mʉsa yeatire mʉsare ihñou. Mʉsa mehna cjẽnare mʉsa yedohoatire ihñou. Mʉsare yʉhʉ yeriro sahata mʉsa gʉ̃hʉ yeya.

¹⁶Ijirota niaja mʉsare. Mʉsa yʉhʉ cahacjẽna yero saha ijina yʉhʉ bui ijierare. Mʉsare buhe duti yʉhʉ ohorina ijire mʉsa. Sa yena yʉhʉ bui ijierare mʉsa. Sa yegʉ “Yʉhʉ yeriro sahata yeya”, nii mʉsare.

¹⁷Ahrire masina, yʉhʉ dutiyere yena, bucuena ijinata mʉsa.

¹⁸’Mʉsare ijipihtinare sa niedaja. Yʉhʉ beseriquinare masiaja yʉhʉ. Cohãcjʉ̃ tiquiro yere tiquina ojoari pũpʉ tiquiro ni ojoariro sahata waharota. “Yʉhʉ mehna ihyariquirota yʉhʉre wejẽ duari”, ni ojoahye Cohãcjʉ̃ yere tiquina ojoari pũpʉ.

¹⁹Tiquiro sa yeato pano ahrire yahuyugʉ niaja mʉsare. Yʉhʉre tiquiro sa yeri bato, “Jesuta Cristo Cohãcjʉ̃ ohoriquirota ijire”, mʉsa niatire ahrire mʉsare yahuyugʉ niaja yʉhʉ.

²⁰Ijirota mʉsare niaja. Yʉhʉ ohoriquinare cahmediquiro yʉhʉ gʉ̃hʉre cahmene tiquiro. Sa yero yʉhʉre cahmediquiro yʉhʉre ohoriquiro gʉ̃hʉre cahmene tiquiro, nidi Jesu ʉsãre tiquiro buhenare. Juda Jesure ihña tuhtiyequinare tiquiro ihñoatore yahuahye Jesu

²¹Sa ni yahu tuhasa Jesu tutuaro bʉjʉa witiri. Sa bʉjʉa witiro yahuri tiquiro ʉsãre. —‍Ijirota mʉsare niaja. Ihcãquiro mʉsa mehna cjʉ̃no yʉhʉre ihña tuhtiyequinare yʉhʉre ihñonota, nidi Jesu.

²²Tiquiro sa nigʉ̃ tʉhona Jesure ihñoatiquirore masiedana, ʉsã basi cahme ihñaʉ.

²³Jesu buheyequina mehna cjʉ̃ yʉhʉ, Jesu cahĩdigʉ ijii. Sa yegʉ tiquiro cahapʉ pari paha dujii.

²⁴Sa yero Simo Pedro yʉhʉre tiquiro omoca mehna sinituri: —‍¿Jesure ihñoatiquiro noa pehere nino niajari Jesu? Yahuya ʉsãre, nino, tiquiro omoca mehna sinituri Pedro.

²⁵Tiquiro sa nigʉ̃ yʉhʉ pehe Jesu cahapʉ dujirigʉ sinituu tiquirore: —‍¿Pʉhto, noare nigʉ niajari mʉhʉ? nii yʉhʉ.

²⁶—‍Ahria pãre dahra waha ne, yʉhʉ ña mio yʉhʉ ohoatiquiro pehe tiquirota ijire yʉhʉre ihñoatiquiro, nidi Jesu. Sa ni tuhasa pãre tiquiro dahra waha nedirore ña mio tuhasa tire Simo Iscariote macʉnore Judare ohori.

²⁷Sa yero pãre tiquiro ñehedi bato watĩno pehe Judare ñano ye dutiri jiri. Sa yero Jesu tiquirore ohõ saha nidi: —‍Mʉhʉ yeatore sojaro mehna ye madoqueohya mʉhʉ, nidi Jesu Judare.

²⁸Tiquiro sa nigʉ̃ tʉhona ʉsã mesapʉ dujina, Jesu Judare tiquiro nidire quehnoano masiedʉ.

²⁹Ihquẽquina ohõ saha ni tʉhotumi: “Juda ʉsã niñerure ihboriquiro ijire. Sa yero bose deco ʉsã ihyatire dú dutiro ohori Jesu Judare. O pejecʉoyequinare niñerure oho dutiro niboaga Jesu”, ni tʉhotumi ʉsã ihquẽquina.

³⁰Sa yero Juda ti pãre ñehe tuhasa, wijiaa wahari. Tiquiro wijiari pje ñami ijiri. Wahma dutirore yahuahye Jesu

³¹Tiquiro wijiari bato ohõ saha nidi Jesu: —‍Yojopʉ pũritare yʉhʉ masʉ Cohãcjʉ̃ ohorigʉ yʉhʉ tutuagʉ yʉhʉ ijiye tiyere ihñonota Cohãcjʉ̃ masare. Sa yegʉ Cohãcjʉ̃ tiquiro tutuariquiro ijiyere ihñoutja yʉhʉ pehe.

³²Sa yegʉ Cohãcjʉ̃ tiquiro tutuayere yʉhʉ ihñogʉ̃ tiquiro pehe yʉhʉ tutuaye gʉ̃hʉre yojopʉ pũritare ihño madoqueorota.

³³Yʉhʉ pohna yʉhʉre tʉhoya. Meheñe decorigã mʉsa mehna ijinigʉtja. Yʉhʉ wahari bato yʉhʉre macanata mʉsa. Sa yegʉ mari acaye judio masare yʉhʉ nidiro sahata mʉsa gʉ̃hʉre niaja. “Yʉhʉ wahatore mʉsa pehe waha masiedare”, tiquinare yʉhʉ nidiro sahata mʉsa gʉ̃hʉre yahuaja.

³⁴Wahma dutirore mʉsare yahugʉtja. Mʉsa mehna cjẽnare cahĩña mʉsa. Mʉsare yʉhʉ cahĩdiro sahata, mʉsa mehna cjẽnare cahĩña.

³⁵Sa yena mʉsa mehna cjẽnare mʉsa cahĩgʉ̃ ihñañe, yeequina mʉsa ijiyere masieta apequina, nidi Jesu ʉsãre. “Jesure masiedaja”, Pedro tiquiro niatire yahuahye Jesu

³⁶Tiquiro sa nigʉ̃ Simo Pedro Jesure sinituri: —‍¿Pʉhto, nohopʉ wahaʉtjari mʉhʉ? nidi Pedro. —‍Yʉhʉ wahatopʉre yojopʉre yʉhʉ mehna waha masiedare mʉhʉ. Yojopʉre waha masiedapegʉta came yʉhʉ cahapʉ wahaʉta mʉhʉ, nidi Jesu Pedrore.

³⁷—‍¿Pʉhto, dʉhsegʉ yojopʉre mʉhʉ mehna waha masiedaboari yʉhʉ? Yʉhʉre tiquina wejẽ duepegʉ̃ta mʉhʉre ne duhusi yʉhʉ, nidi Pedro Jesure.

³⁸—‍¿Yʉhʉre ne duhueragʉtari mʉhʉ? Poto mʉhʉre yahutja. Canaca tiquiro yahuato pano “Jesure masiedaja”, niita mʉhʉ apequinare. Ihtia taha sa niita mʉhʉ, nidi Jesu Pedrore.