Read Piratapuyo San Juan 19 Bible Online

San Juan 19 - Piratapuyo bible

San Juan 19

¹Tiquina sa ni sañuducuri bato Pilato Jesure tana dutiahye. Sa ye tiquiro yequina surara pehe tiquirore tanahye.

²Tana tuhasa tiquina pota behto ye tuhasa, Jesu dapu buipʉ duhu peoahye. Duhu peo tuhasa, pʉhtoa ye suhti borore tiquirore sãa tuhasa, tiquiro cahapʉ esa dʉca, ohõ saha ni bʉjʉpeahye tiquina:

³—‍Quehnoano ahtaya. Judio masa pʉhto, quehnoano ahtaya, ni bʉjʉpe, Jesu wʉhdoare quẽ mʉjahye.

⁴Sa yero Pilato pari turi judio masa cahapʉ waha, tiquinare yahuri: —‍Tʉhoya mʉsa. Ahriquiro ne buhiri mariediquiro ijire. Sa yegʉ tire mʉsa masiatire mʉsa cahapʉ tiquirore ne cãhtaʉ, nidi Pilato.

⁵Tiquiro sa ni tuhasagʉ̃ Jesu pota behto pesariquiro, pʉhtoa ye suhti borore sañariquiro wʉhʉpʉ ijiriquiro wijia tari. Tiquiro sa wijia tagʉ̃ Pilato tiquinare ohõ saha nidi: —‍Ihñaña. Ahriquiro ijire tiquiro, nidi Pilato.

⁶Tiquiro sa ni tuhasagʉ̃ tʉhoye, pahia pʉhtoa, surara gʉ̃hʉ Jesure ihñañe, sañuducuri: —‍Curusapʉ quẽ biha wejẽña tiquirore. Curusapʉ quẽ biha wejẽña tiquirore, ni sañuducuri tiquina. —‍Tiquiro ne buhiri mariedare. Sa yena mʉsa basita tiquirore neahña. Sa yena mʉsata tiquirore curusapʉ quẽ biha wejẽña, nidi Pilato tiquinare.

⁷—‍Tiquiro basi “Cohãcjʉ̃ macʉ ijiaja”, nie tiri. Tire tiquiro sa nigʉ̃ ʉsã dutiye pehe tiquirore wejẽ dutire, nidi tiquina Pilatore.

⁸Tiquina sa nigʉ̃ tʉhoro cue yʉhdʉa wahari Pilato pehe.

⁹Sa yero pari turi wʉhʉpʉre majare sajã, Jesure sinituahye tja: —‍¿Noho cjʉ̃ ijiajari mʉhʉ? ni sinituahye tiquiro Jesure. Tiquiro sa ni sinituepegʉ̃ta Jesu tiquirore yʉhtierahye.

¹⁰Tiquiro sa yʉhtieragʉ̃ ihñano Pilato tiquirore sinitu nemoahye: —‍¿Yʉhʉre yʉhtierajari mʉhʉ? Yʉhʉ mʉhʉre peresupʉ ijirigʉre wio masiaja. Sa yegʉ mʉhʉre curusapʉ gʉ̃hʉre quẽ biha wejẽ duti masiaja yʉhʉ. ¿Tire masiedajari mʉhʉ? niahye Pilato Jesure.

¹¹—‍Cohãcjʉ̃ mʉhʉre tiquiro dutieragʉ̃ yʉhʉre ñano ye dutieraboaya mʉhʉ. Yʉhʉre ihña tuhtiyequinare ihñoriquiro pehe mʉhʉ yʉhdʉoro ñano buhiri tire, niahye Jesu Pilatore.

¹²Tiquiro sa nigʉ̃ tʉhoro Pilato pehe tiquirore wio duamahye. Tiquiro sa wio duepegʉ̃ta pari turi judio masa sañuducuri: —‍Jesu “Pʉhto ijiaja”, nino mari ijipihtina pʉhtorore Roma cjʉ̃nore ihña tuhtiriquiro ijire tiquiro. Sa yegʉ tiquirore wiogʉ mʉhʉ gʉ̃hʉ mari pʉhtorore ihña tuhtigʉ ijiaga mʉhʉ, ni sañuducuri judio masa Pilatore.

¹³Tiquina sa nigʉ̃ tʉhoro Jesure wʉhʉpʉ ijiriquirore ne wijia ta, buhiri dahre dutiro taro tiquiro dujiri pahtapʉ nuju sari Pilato. Tiquiro buhiri dahre dutiri paa ʉtã mehna tiquina yeri paa judio masa ye mehna Gabata wame tiri.

¹⁴Ti deco pascua bose deco ʉsã ihyatire ʉsã quehnori deco ijiri. Ti pjere coheri pje waro ijiri. Nuju sa tuhasa Pilato masare ohõ saha ni yahuri: —‍Ahriquiro tjire mʉsa pʉhtoro, nidi tiquiro.

¹⁵Tiquiro sa nigʉ̃ tʉhoye judio masa sañuducuri: —‍Yariahro tiquiro. Yariahro tiquiro. Curusapʉ quẽ biha wejẽña tiquirore, ni sañuducuri tiquina. —‍¿Mʉsa pʉhtoro tiquiro ijiepegʉ̃ta tiquirore curusapʉ quẽ biha wejẽ dutiajari mʉsa? nidi Pilato. Tiquiro sa nigʉ̃ ohõ saha ni yʉhtiri pahia pʉhtoa: —‍Mari ijipihtina pʉhtoro Roma cjʉ̃nota tiquiro ʉsã pʉhtoro ijire. Apequiro pʉhtoro ʉsãre mariedare, ni yʉhtiri pahia pʉhtoa.

¹⁶Tiquina sa ni yahuducuri bato Pilato Jesure curusapʉ quẽ biha wejẽ dutiro, tiquirore ohori tiquinare. Jesure quẽ biha wejẽahye tiquina

¹⁷Tiquina ne wijiagʉ̃ Jesu pehe tiquiro ya curusare tiquiro basi wʉa ne, dapu pehtoro wame tiropʉ esari. Ʉsã judio masa ye mehna Gólgota wame tiri.

¹⁸Topʉ esaye tiquina Jesure quẽ biha ohõri. Sa ye apequina pʉarore ihcãquiro tiquiro poto pehe, apequiro tiquiro cũ pehe pehe quẽ biha ohõri tiquina. Sa yero Jesu tiquina deco curusapʉ wahñari.

¹⁹Tiquina quẽ biha tuhasagʉ̃ Pilato taboa pjĩne ojoa duti, Jesure tiquina quẽ biha ohõri curusapʉ quẽ biha ohõ dutiri jiri ti pjĩne. Ohõ saha ni ojoa dutiri jiri tiquiro: “AHRIQUIRO JESU NAZARE CJɄ̃NO, JUDIO MASA PɄHTORO IJIRE”, ni ojoa dutiri jiri Pilato ti pjĩne.

²⁰Ti pjĩne ojoaro judio masa ye mehna, Roma cjẽna ye mehna, griego masa ye mehna ojoari jiri apequiro. Sa yero Jesure curusapʉ tiquina quẽ biha ohõriro maca cahagã ijiri. To cahagã ijiyequina peyequina judio masa Pilato ojoa dutirire ihña, buheri.

²¹Sa buhe tuhasa judio masa ʉsã pahia pʉhtoa ohõ saha nidi Pilatore: —‍“Ahriquiro judio masa pʉhtoro ijire”, ni ojoa dutieracãhña. Ʉsã pʉhtoro ijierare ahriquiro. Sa yegʉ ohõ saha ni ojoa quehno dutiya mʉhʉ. “Ahriquiro ‘Judio masa pʉhto ijiaja’, ni ihcãquirota tiquiro basita sa ni tʉhoturiquiro ijiri”, ni ojoa quehno dutiya, nidi pahia pʉhtoa.

²²—‍Yʉhʉ ojoa duti mʉhtariro sahata ijirota, nidi Pilato tiquinare.

²³Jesure tiquina quẽ bihari bato pititiaro surara pehe Jesu suhtire tiquina basi itiri. Tiquina sa iti duepegʉ̃ta ihcã suhtiro yoari suhtiro dohori marieni suhtiro ijiri. Ti suhtiro suhari suhtiro ijiri.

²⁴Ti suhtiro sa ijigʉ̃ ohõ saha nidi tiquina basi: —‍Ahri suhtirore tʉhrẽdacʉ̃hna. Ahri suhtirore neatiquirore masi duana, doquepeihna mari, nidi tiquina basi. Sa doquepeye, Cohãcjʉ̃ yere tiquina ojoari pũpʉ tiquina ni ojoariro sahata yeye nidi tiquina. “Yʉhʉ suhtire tiquina basi itiri. Sa ye yʉhʉ suhtire neatiquinare masi duaye, doqueperi tiquina”, ni ojoahye Cohãcjʉ̃ yere tiquina ojoari pũpʉ. Tiquiro sa ni ojoariro sahata sa yeye nidi tiquina.

²⁵Surara tiquina sa yegʉ̃, Jesu pacoro, Jesu mʉono, María Cleofa namono, María Magdalena mehna Jesu curusa cahagã ihñaducuri tiquina.

²⁶Sa yero tiquiro pacoro yʉhʉ tiquiro cahñogʉ gʉ̃hʉ tiquiro cahapʉ ʉsã ducugʉ̃ ihñano tiquiro pacorore yahuri Jesu: —‍Yojopʉre ahriquiro mʉhʉ macʉ ijire, nidi Jesu tiquiro pacorore.

²⁷Sa ni tuhasa, yʉhʉre ohõ saha ni yahuri tiquiro: —‍Yojopʉre ahricoro mʉhʉ paco ijire, nidi Jesu yʉhʉre. Tiquiro sa nidi bato Jesu pacorore ya wʉhʉpʉ iji dutii. Jesu yaria wahahye

²⁸Tiquiro sa ni yahuri bato ohõ saha ni tʉhotu, masiahye Jesu: “Ijipihtiye Cohãcjʉ̃ yʉhʉre dahra dutiro tiquiro cũrire ye pehou”, ni tʉhotu, masiahye Jesu. Sa masino Cohãcjʉ̃ yere tiquina ojoari pũpʉ tiquiro ni yahuriro sahata ohõ saha nidi Jesu: —‍Aco wʉoaga yʉhʉ, nidi Jesu.

²⁹Sa yero topʉ vino sʉẽñe co pose tiri sutu dujiri. Sa yero topʉ ijiriquiro aco ihmini sʉhtere sʉẽñe co mehna tiquina sohari sʉhtere yucʉgʉ hisopo wame tidʉ sohtoapʉ dʉhte ohõri. Sa yero Jesu dʉseropʉ siõ ohõri.

³⁰Ti core Jesu ihmi tuhasa ohõ saha nidi: —‍To punota ijiaga, ninota tiquiro dapure muhri yo, yariaa wahari. Surara Jesu pati pahma batogã ñoseahye ñosenʉ mehna

³¹Ti deco pascua bose deco pano ijiri. Bose deco cjẽne ʉsã ihyatire quehnori deco ijiri. Sa ye ape deco saurú ijigʉ̃ tiquina bose deco ijigʉ̃ curusaripʉ yariariquinare cũ duerari. Ti deco Cohãcjʉ̃re tiquina ño peori bose deco ijiri. Sa ye ti decopʉ tiquina quẽ biha ohõriquinare curusaripʉ tiquina wahñagʉ̃ cahmedari tiquina. Sa ye tiquina quẽ biha ohõriquinare tiquina ñecʉ cohãrine quẽ nuha dutiye tehe, judio masa siniahye Pilatore, “Tiquina yaria madoqueoahro”, niñe. Tiquina sa yeri bato tiquina pagʉrire ne dijio madoqueoye tee nidi.

³²Tiquina sa dutigʉ̃ surara pehe curusari cahapʉ esa, ihcãquiro yaqueriquiro ñecʉ cohãrine quẽ nuhari. Apequiro gʉ̃hʉre sata yeri tiquina.

³³Sa ye Jesu ñecʉ cohãrine quẽ nuhae tee yemehe, tiquiro yariariquiro ijigʉ̃ ihñañe, quẽ nuhaedari.

³⁴Sa quẽ nuhaedaye ihcãquiro surara tiquiro pati pahma batogã ñosenʉ mehna ñosedi. Tiquiro sa ñosegʉ̃ duita tiquiro dii, aco mehna wijiari.

³⁵Ti sa wahagʉ̃ ihñaʉ yʉhʉ. Yʉhʉ ahri pũre ojoarigʉ mʉsare poto yahuaja. Poto yʉhʉ yahuye ijigʉ̃ masiaja yʉhʉ. Mʉsare yahuaja mʉsa gʉ̃hʉ Jesure mʉsa wacũ tutuato saha.

³⁶Cohãcjʉ̃ yere tiquina ojoari pũ ti nidiro sahata sa wahari: “Tiquiro cohãrine ne ihcã cohãre quẽ nuhaedari”, tiquiro ni ojoariro sahata Jesu ñecʉ cohãrine ne ihcã cohãre quẽ nuhaedari.

³⁷Sa yero ape pũpʉ Cohãcjʉ̃ yere tiquina ojoari pũpʉ ohõ saha nine. “Tiquirore tiquina ñosediquirore ihñaeta tiquina”, ni ojoahye Cohãcjʉ̃ yere tiquina ojoari pũpʉ. Jesu pagʉre masa copepʉ cũahye

³⁸Tiquiro yariari bato José Arimatea cjʉ̃no Jesu pagʉre ne dijioro taro, Pilatore siniahye. José pehe apequina judio masare cuero, Jesure wacũ tutuariquiro tiquiro ijiyere yahu duerahye. Sa yero tiquiro pagʉre sinidi bato Pilato pehe Jesu pagʉre nea dutiahye. Tiquiro nea dutigʉ̃ José curusa cahapʉ esa, Jesu pagʉre nea wahahye.

³⁹Nicodemo gʉ̃hʉ José mehna wahahye. Tiquiro yucʉgʉ cjẽ ehme sitiyere, mirra wame tiye ehme sitiye yucʉgʉ cjẽ mehna dahra moredire ne cãhye. Jesu pagʉre tiquina cohãto pano tiquina quehnoati ijiahye ti ehme sitiye. Tiquiro ne cãhtari treinta kilo nʉcʉahye. Nicodemo sohõ ijiri pje Jesu mehna tiquiro coã yahuducuri pje ñamipʉ Jesu cahapʉ esariquiro ijiahye.

⁴⁰Sa ye tiquina pʉaro Jesu pagʉre ne, judio masa yariariquinare ʉsã cohãducuro sahata tiquiro pagʉre ehme sitiye mehna suhti mehna wahmeahye.

⁴¹Curusapʉ Jesure tiquina wejẽdiro cahapʉ wese ijiri. Ti wesepʉ masa cope ʉtãpʉ wahma tiquina seheri cope ijiri. Ti copere ne ihcãquiro yariariquirore cohãedarĩdi.

⁴²Pascua bose deco judio masa bose deco ʉsã ihyatire quehnori deco ijiri. Sa ijiri deco ijigʉ̃ ti cope cahagã tiquiro curusa ijigʉ̃, topʉ cũahye tiquina Jesu pagʉre.