Read Piratapuyo San Juan 2 Bible Online

San Juan 2 - Piratapuyo bible

San Juan 2

¹Ihtia deco bato Canápʉ Galilea yehpapʉ ijiri macapʉ omoca dʉhteri bose deco ijiri. Sa yero Jesu pacoro ti wʉhʉpʉ ijiri.

²Jesu mehna ʉsãre tiquiro buhena gʉ̃hʉre omoca dʉhteropʉ pijiori tiquina.

³Ti bose deco cjẽ vino pihtigʉ̃ Jesu pacoro tiquirore yahuri: —‍Yojopʉre vino pihtia wahari, nidi ticoro Jesure.

⁴Ticoro sa nigʉ̃ tʉhoro Jesu ohõ saha nidi: —‍¿Iño, dʉhsego tago tire yʉhʉre yahuajari mʉhʉ? Masa yʉhʉre tiquina masiato dʉhsarĩne, nidi Jesu tiquiro pacorore.

⁵Tiquiro sa nidi bato tiquiro pacoro pehe tiquina cahacjẽnare dutiri: —‍Yʉhʉ macʉ tiquiro dutiro sahata yeya, nidi ticoro.

⁶Ti pjepʉre ʉsã acaye judio masa Cohãcjʉ̃ yere yeye tehe masare tiquina pagʉrire sa coseducu dutie tiri. Sa ye ti wʉhʉpʉre seis suturi ʉtã mehna tiquina yeri suturi aco pose tiye suturi ijiri. Ti suturi Cohãcjʉ̃ yere yeye tehe tiquina coseye aco pose tiye suturi ijiri. Ti suturi cincuenta o setenta litro pose esa tuhari.

⁷Sa yero tiquina cahacjẽnare dutiri Jesu: —‍Ahri suturire acore pio sã nemoña. Quehnoano wahpo dapoya, nidi Jesu. Tiquiro sa nigʉ̃ tiquina pehe quehnoano wahpo dapo peho cãhri ti suturire.

⁸Tiquina sa yeri bato Jesu tiquinare dutiri tja: —‍Yojopʉre ti acore wa ne, wʉhʉ cjʉ̃nore ohoya, nidi. Tiquiro sa nigʉ̃ tʉhoye ti acore wa ne, wʉhʉ cjʉ̃nore ohori.

⁹Tiquina sa ohogʉ̃ tiquiro pehe ti acore vino wahagʉ̃ yeri acore sihni tuhuri. Ti acore tiquiro dʉhse yerire masiedari tiquiro. Tiquiro sa masiedapegʉ̃ta tiquiro cahacjẽna ti acore wayequina pehe masidi. Wʉhʉ cjʉ̃no sa masiedaro omoca dʉhteriquirore pijio, ohõ saha ni yahuri:

¹⁰—‍Apequina masa quehnoañe vinore sihõ mʉhtare. Masa tiquina quehnoano sihnidi batopʉ ña cjũñe core sihõri tiquina. Mʉhʉ pehe quehnoañe core ihbo, came cjũno ti core sihõri ʉsãre, nidi wʉhʉ cjʉ̃no omoca dʉhteriquirore.

¹¹Canápʉ Galileapʉ ijiri macapʉ Jesu acore vino tiquiro wahagʉ̃ yero, topʉ Cohãcjʉ̃ tutuaye mehna coã ye dʉcari. Sa yero apequinare tiquiro tutuayere ihñori Jesu. Tiquiro sa ihñori bato ʉsã tiquiro buhena tiquirore wacũ tutuaʉ.

¹²Came Jesu tiquiro pacorore, tiquiro bahanare, ʉsãre tiquiro buhena gʉ̃hʉre Capernaupʉ siho esari. Topʉ esana, meheñe decorigã tojoarĩi ʉsã. Jesu Cohãcjʉ̃ wʉhʉpʉre esahye

¹³Pascua ijigʉ̃ judio masa ʉsã bose deco ijiato mehenogã dʉhsatjiãri. Sa yero Jesu Jerusalẽpʉ esari.

¹⁴Topʉ esaro tiquiro Cohãcjʉ̃ wʉhʉpʉ sajã saro, wecʉare, ovejare, bujuaare duayequinare boca sari. Sa yero niñerure camesayequina mesaripʉ dujigʉ̃ tiquina gʉ̃hʉre boca sari.

¹⁵Sa boca saro yuta dari mehna tanari da ye, tiquinare ijipihtiyequinare sopecahapʉ tana nʉnʉ wiori. Oveja, wecʉa gʉ̃hʉ tana nʉnʉ wio cãri tiquiro. Sa yero niñeru camesayequina ye mesarire ne majaredoqueo, doque cũ cãri. Ti niñeru cjoeri gʉ̃hʉre doque site cãri.

¹⁶Sa ye tuhasa bujuaare duayequinare ohõ saha nidi: —‍Mʉsa bujuaare ne wijiaya. Yʉhʉ Pacʉ ya wʉhʉre apee boro duari wʉhʉ yeracãhña, nidi Jesu tiquinare.

¹⁷Tiquiro sa yegʉ̃ ihñana ʉsã tiquiro buhena pehe Cohãcjʉ̃ yere tiquina ojoari pũpʉ tiquiro nidire wacũu: “ ‘Cohãcjʉ̃, mʉhʉ ya wʉhʉre tutuaro cahĩaja. Sa cahĩgʉ ti wʉhʉre ñano tiquina yegʉ̃ ihñagʉ tutuaro bʉjʉa witiaja yʉhʉ’, ni ojoahye Cohãcjʉ̃ yere tiquina ojoari pũpʉ”, ni wacũu ʉsã Jesu buhena.

¹⁸Jesu tiquiro sa yeri bato ʉsã acaye judio masa pʉhtoa tiquirore sinituri: —‍¿Dʉhsegʉ mʉhʉ ahriquinare Cohãcjʉ̃ wʉhʉpʉre ijiyequinare cohã wioari? Cohãcjʉ̃ mʉhʉre tire ye dutiriquiro tiquiro ijigʉ̃ Cohãcjʉ̃ tutuaye mehna ye ihñoña mʉhʉ ʉsã ihñatire, nidi tiquina Jesure.

¹⁹Tiquina sa nigʉ̃ Jesu yʉhtiri: —‍Ahri wʉhʉre mʉsa cohãgʉ̃ ihtia deco wahaboro tuhasaʉtja yʉhʉ, nidi Jesu tiquinare.

²⁰—‍Ihtia deco ahri wʉhʉre yesi mʉhʉ. Cuarenta y seis cʉhmari waro tiquina yeri wʉhʉ ijire ahri wʉhʉ, nidi tiquina pehe Jesure.

²¹Tiquiro sa nigʉ̃ tiquina tiquirore quehnoano tʉhoerari. Jesu “Ahri wʉhʉre”, nino tiquiro pagʉre nino nidi jimedi.

²²Sa ye tiquiro yariari bato, tiquiro masa wijiari bato ʉsã tiquiro buhena pehe tiquiro nidire wacũna, Cohãcjʉ̃ yere tiquina ojoari pũre Jesu tiquiro yahuri gʉ̃hʉre “Ti ijirota ijire”, ni wacũu ʉsã. Ijipihtiyequina tiquina wacũñene Jesu masine

²³Pascua bose deco ijigʉ̃ Jesu Jerusalẽpʉ ijiri. Topʉ tiquiro ijigʉ̃ masa peyequina Cohãcjʉ̃ tutuaye mehna tiquiro ye ihñogʉ̃ ihñañe tiquirore wacũ tutuari.

²⁴Tiquina sa wacũ tutuepegʉ̃ta Jesu masa tiquina wacũñene quehnoano masino, “Yʉhʉre sa wacũ tutuaducueta”, ni tʉhotuerahye.

²⁵Masa tiquina tʉhotuyere quehnoano masidi tiquiro. Sa masino masa tiquina tʉhotuyere apequinare ne sinituerari.