Read Piratapuyo Efesios 6 Bible Online

Efesios 6 - Piratapuyo bible

Efesios 6

¹Yojopʉre macanagãre yahutja. Mari pʉhtoro Cristo yequina ijina mʉsa pacʉsʉmʉare quehnoano yʉhtiya. Mʉsa sa yegʉ̃ quehnoarĩne.

²Ohõ saha niahye Cohãcjʉ̃ dutiye: “Mʉsa pacʉsʉmʉare quehnoano ño peoya”, ni dutiahye tiquiro. Ahri dutiro mehna Cohãcjʉ̃ yahu nemoahye. Ohõ saha niahye: “Mʉsa pacʉsʉmʉare ño peona, ahri yehpapʉ yoari pje bucueye mehna ijinata mʉsa”, ni yahuahye. Tiquiro sa ni yahugʉ̃ ahri dutiro ihyo ijiri dutiro ijierare. Sa yena tiquiro nidiro saha mʉsa pacʉsʉmʉare ño peoya.

⁴Yojopʉre tiquina pacʉsʉmʉare yahutja: Mʉsa pohnare sa tuhtiducueracãhña, “Usuagʉ̃ yeari”, nina. Mari pʉhtoro Cristo tiquiro cahĩñe mehna tiquiro yedohoye mehna tiquinare quehnoano cohteya. Sa yena tiquinare quehnoano yahuya.

⁵Yojopʉre cahacjãnare mʉsare yahutja: Cua pesaro mehna, ño peoye mehna ahri yehpa cjẽnare mʉsa pʉhtoare quehnoano yʉhtiya. Ni mehono marieno quehnoano yʉhtiya. Cristore mʉsa yʉhtiro sahata tiquinare yʉhtiya mʉsa.

⁶Tiquina ihñono dihitare yʉhtina ijieracãhña. Sa yeyequina masa dihitare tiquinare ihña bucuegʉ̃ cahmene. Mʉsa pehe Cristo tiquiro cahacjãna mʉsa ijiro saha mʉsa pʉhtoa gʉ̃hʉre sa yʉhtiducuya. Cohãcjʉ̃ tiquiro cahmeno sahata quehnoano bucueye mehna yʉhtiya.

⁷Sa yena Cristore yʉhtina mʉsa ijiro saha bucueye mehna yʉhtiya mʉsa pʉhtoa gʉ̃hʉre. “Masa dihitare yʉhtina niaja”, ni tʉhotueracãhña.

⁸Sa yena ahrire wacũña: Ijipihtina quehnoañene mari yegʉ̃ ihñano Cohãcjʉ̃ quehnoano yerota marine. Cahacjẽnare, cahacjẽna ijieyequina gʉ̃hʉre quehnoano yerota.

⁹Yojopʉre pʉhtoare yahutja: Mʉsa cahacjẽnare quehnoano yeya. Tiquinare quehnoano yʉhʉ ye dutiriro sahata yeya mʉsa gʉ̃hʉ tiquinare. Tiquinare tuhtiperacãhña. Ʉhmʉse cjʉ̃no Cohãcjʉ̃ potota tiquina pʉhtoro ijire. Mʉsa yaquiro pʉhtoro ijire tiquiro gʉ̃hʉ. Sa yena ijipihtina mʉsa tiquiro cahacjãna dihita ijire. Sa yero tiquiro ihcãno saha ihñare mʉsare ijipihtinare. Sa yena mʉsa cahacjẽnare tuhtiperacãhña. Cristo yequina watĩnore tiquina cahmotarire yahuahye Pablo

¹⁰Ahrire yahu bato tiitja mʉsare: Quehnoano wacũ tutuana ijiya mʉsa. Mari pʉhtoro Cristo mʉsa mehna ijire. Sa yena tiquiro ye masiñe mehna wacũ tutuana ijiya.

¹¹Watĩno marine ni mehono, ñano ye dutire marine. Cohãcjʉ̃ marine cahmotare mari ñañene yeborire. Marine tiquiro cahmotaye surara tiquiro cahmotari suhtiro, come suhtiro yero saha ijire. Sa yena ti suhtirore mʉsa sañano saha Cohãcjʉ̃ tiquiro cahmotayere quehnoano cʉo pehoya.

¹²Jesu yequina mari ijigʉ̃, marine ihña tuhtiyequina masa waro ijierare. Ʉhmʉse cjẽna ijimediquina ñañequina, tutuayequina, tiquina pehe ijire marine ihña tuhtiyequina. Watĩa ahri yehpa cjẽna pʉhtoa ijire. Sa ye tiquina gʉ̃hʉ ijire marine Jesu yequinare ihña tuhtiyequina.

¹³Sa yena yojopʉre cahmotari suhtirore mʉsa sañano saha Cohãcjʉ̃ mʉsare tiquiro cahmotatire tiquiro yere quehnoano cʉo pehoya. Sa yena watĩno mʉsare tiquiro ñano ye dutigʉ̃, mʉsare tiquiro ñano ye duagʉ̃, tiquirore cahmotanata. Sa yena yʉhdʉdʉcanata. Sa tiquirore yʉhdʉdʉcana, tutuana tojoanata mʉsa.

¹⁴Sa yena tutuana ijiya. Cohãcjʉ̃ mʉsare tiquiro cahmotatire ohõ saha yeya mʉsa: Surara tiquiro come suhtiro mehna tiquiro jeripohnare cahmotariro saha poto yahuyere Cohãcjʉ̃ yere quehnoano tʉhoya mʉsa watĩnore mʉsa cahmotatire. Sa yena Cristo yedohoye mehna quehnoana ijiya mʉsa, watĩnore mʉsa quehnoano cahmotatire.

¹⁵Surara tiquiro dahpo suhti mehna tiquiro dahpocãrine tiquiro cahmotariro saha quehnoañe buheyere quehnoano masiña mʉsa, watĩnore mʉsa cahmotatire. Ti buheye marine quehnoano ijigʉ̃ yere.

¹⁶Surara tiquiro tohoriro mehna tiquiro cahmotariro saha Cristore quehnoano wacũ tutuaducuya mʉsa watĩnore mʉsa cahmotatire. Bʉeye cjʉ mehna tiquiro sihã mʉsare tiquiro bʉedoqueboro saha watĩno mʉsare ñano yegʉ̃ ye duare. Sa yena Cristore quehnoano wacũ tuana, cahmotanata mʉsa.

¹⁷Surara tiquiro come sapea mehna tiquiro dapure cahmotariro saha mʉsare pecapʉ wahaborinare Cristo yʉhdʉorina ijiya mʉsa, watĩnore mʉsa cahmotatire. Surara tiquiro ñoseni pjĩ mehna tiquiro cahmotariro saha Cohãcjʉ̃ ye buheyere quehnoano masiña mʉsa, quehnoano mʉsa cahmotatire. Sa yena apequinare quehnoano yahuya tiquiro yere. Ti Cohãcjʉ̃ ye buheyere Espíritu Santo marine yahure.

¹⁸Sa mʉsa watĩnore cahmotana Cohãcjʉ̃re decoripe sa siniducuya. Espíritu Santo yedohoye mehna sa siniducuya. Sa yena quehnoano wacũ masiña. Sa sinina, caributieracãhña. Ijipihtiyequina Cohãcjʉ̃ yequinare sa sini basaducuya.

¹⁹Sa yena yʉhʉ gʉ̃hʉre sini basaya Cohãcjʉ̃re. Ohõ saha ni sini basaya: Quehnoañe buheyere, panopʉ tiquina masiedarire quehnoano yʉhʉ yahuatire sini basaya yʉhʉre. Sa yena cuero marieno yʉhʉ yahuatire sini basaya yʉhʉre.

²⁰Cristo tiquiro yere yahu dutiro yʉhʉre ohori. Yʉhʉ sa yahuri buhiri peresupʉ ijiaja yojopʉre. Ohõpʉ yʉhʉ ijiepegʉ̃ta cuero marieno tiquiro yere yʉhʉ yahuatire sini basaya yʉhʉre. Tiquiro yere yahuacjʉ ijigʉta niaja yʉhʉ. Pablo quehnoa duti bato tiahye

²¹Yojopʉre Tíquico mʉsa cahapʉ esaro yʉhʉ ijiye tiyere mʉsare yahu pehorota. Tiquiro mari acayʉro mari cahĩniquiro ijire. Sa yero mari pʉhtoro yere quehnoano yedohoriquiro sa ijiducure.

²²Ʉsã ijiye tiyere mʉsare yahu dutigʉ tiquirore ohogʉ niaja mʉsa quehnoano bucueatire.

²³Cohãcjʉ̃ mari Pacʉ mari pʉhtoro Jesucristo gʉ̃hʉ tiquina mehna mʉsa ijipihtinare ʉsã acayere quehnoa dutiaja. Cristore mʉsa quehnoano wacũ tutuaye mehna mʉsa cahme cahĩatire Cohãcjʉ̃re sini basaja mʉsare.

²⁴Ijipihtiyequina mari pʉhtorore Jesucristore sa cahĩducuyequinare Cohãcjʉ̃ mehna quehnoa dutiaja.