Read Piratapuyo Tito 1 Bible Online

Tito 1 - Piratapuyo bible

Tito 1

¹Yʉhʉ Pablo Cohãcjʉ̃ cahacjʉ̃, Jesucristo yere tiquiro buhe duti cũrigʉ ijiaja. Cohãcjʉ̃ beseriquina Jesure tiquina wacũ tuatire quehnoañe buheyere tiquina masiatire Jesu buhe dutiro yʉhʉre cũri. Ti buheye Cohãcjʉ̃ dutiro saha mari yeatire yahure.

²Sa yegʉ ijipihtiye decori Cohãcjʉ̃ yequina ʉhmʉsepʉ tiquina ijiducuati gʉ̃hʉre buheaja tiquinare. Cohãcjʉ̃ ne ni mehoñe marieniquiro ahri yehpare tiquiro bajumehneato pano ohõ saha ni cũahye marine: “Ʉhmʉsepʉ sa ijiducunata mʉsa”, ni cũahye marine.

³Sa yero tiquiro queori pje Cohãcjʉ̃ tiquiro ni cũrire yahu dutiri masare. Sata yʉhʉre ni yahu dutiri tiquiro. Marine pecapʉ wahaborinare yʉhdʉoriquiro ijire.

⁴Mʉhʉre Titore Jesu yere buhei. Yʉhʉ sa buhegʉ̃ tʉhogʉ Jesure wacũ tutua dʉcari mʉhʉ. Sa yegʉ mʉhʉ potota yʉhʉ macʉ yero saha ijigʉta nine. Mʉhʉre ahrire ojoagʉ niaja. Sa yegʉ Cohãcjʉ̃ mari Pacʉ mehna, Jesucristo marine yʉhdʉoriquiro mehna mʉhʉre quehnoa dutiaja. Sa ye paja ihñañe, mʉhʉre tiquina yedohoye mehna quehnoano ijiya mʉhʉ. Creta wame tiri nʉcʉopʉ Tito tiquiro yeatire yahuahye Pablo

⁵Creta wame tiri nʉcʉopʉ mʉhʉre yʉhʉ cũgʉ̃ Jesu yequina tiquina buheati dʉhsarĩdi ti pjere. Sa yegʉ tiquina yeatire yahuyuacjʉre cũgʉ nii yʉhʉ mʉhʉre. Sa yegʉ macaripe cjẽna Jesu yequina pʉhtoa ijiatiquinare bese dutigʉ cũgʉ nii mʉhʉre.

⁶Tiquina pʉhtoa Cohãcjʉ̃ cahacjẽna ijire. Sa yegʉ tiquinare besegʉ quehnoañequinare beseya sijoro saha yeeyequinare. Sa yegʉ ihquẽquina numiareta namo tiyequinare, “Apequinare masi yʉhdʉdʉcaja”, ni tʉhotueyequinare, usueyequinare, queheye marieñequinare, cahmequeñe marieñequinare, apequina yere ni meho ehmeñequinare beseya. Sa besegʉ tiquina wʉhʉsepʉ sajã sayequinare quehnoano ihña ihboyequinare, quehnoañe pehere quehnoano bucueyequinare, tʉho masiñequinare, quehnoañene yeducuyequinare, ñañe marieñequinare, ñañene yeeyequinare, niji siaro marieno dahrayequinare, quehnoañene yeducuyequinare beseya. Sa ye mʉhʉ beseatiquina pohnene ohõ saha ijiyequina ijiro cahmene: Jesure wacũ tutuayequina, quehnoano yeducuyequina, ijipihtiyequinare quehnoano yʉhtiyequina ijiro cahmene pʉhtoa pohnene.

⁹Sa ye quehnoañe buheyere queoro mari buheducuriro sahata ne duhueyequina ijiahro pʉhtoa mʉhʉ beseatiquina. Sa ye tiquina quehnoañe buheyere yahuyequina ijieta. Sa ye quehnoañe buheyere ihña tuhtiyequinare buheye, tiquina ye ni mehoñe ijigʉ̃ masigʉ̃ yeeta tiquina. Sa yegʉ quehnoano beseya Jesu yequina pʉhtoa ijiatiquinare. Peyequina tiquina pʉhtoare yʉhdʉdʉcayequina, quehnoano tʉhotu yahuducueyequina, ni mehoñequina ijire yojopʉre. Sa yeyequina judio masa pũrita ña yʉhdʉaro yeye nine. Tiquina ye buheye poto ijieragʉ̃ tiquinare masigʉ̃ yero cahmene.

¹¹Tiquina judio masa pehe niñerure wapata dua, buhere. Sa yeraro cahmene. Sa buheye ihquẽ wʉhʉse cjẽnare ijipihtiyequinare Cohãcjʉ̃ ye pehere cohãgʉ̃ yeye niaga tiquinare. Tiquina sa yegʉ̃ tiquinare sa ye dutieraro cahmene.

¹²Tiquina yere panopʉ yahuriquiro ti nʉcʉo cjʉ̃no ijieperota ohõ saha ni yahuahye: “Creta nʉcʉo cjẽna sa ni mehoducuyequina ijire. Ti nʉcʉo cjẽna wahiquina yero saha usuayequina ijire. Sa ye sa ihyaducuyequina ijiye ne dahra duerare”, niahye tiquiro, tiquiro ya nʉcʉo cjẽnare.

¹³Tiquiro sa niñe ijirota ijire. Tiquina sa ijigʉ̃ ihñagʉ tiquinare tutuaro tuhtiya Jesu ye buheye pehere quehnoano tiquina masiatire.

¹⁴Sa yegʉ judio masa panopʉ cjẽna tiquina esa tuharo tiquina ni maca cãrire, Jesu yere cahmeeñequina tiquina dutiye gʉ̃hʉre Creta cjẽna tiquina tʉho nʉnʉedatire tuhtiya tiquinare.

¹⁵Buhiri marieñequina quehnoañe dihitare tʉhoture. Ñañene yeducuyequina, Jesure wacũ tutueyequina pehe ñañe dihitare tʉhoture. Tiquina tʉhotuyepʉre ña yʉhdʉare. Sa ye quehnoañe pehere bese masiedare.

¹⁶Tiquina “Cohãcjʉ̃re masiaja ʉsã”, niepeta, ñañene yere. Sa yeyequina tiquina ijigʉ̃ ihñana Cohãcjʉ̃re masieñequina tiquina ijigʉ̃ masiaja mari. Sa ye tiquina ña yʉhdʉayequina, Cohãcjʉ̃ yere yʉhdʉdʉcayequina ijire. Sa ye tiquina quehnoañene ye masiedare.