Read Plautdietsch (Low German) – De Bibel 1. Mose 14 Bible Online

1. Mose 14 - Plautdietsch (Low German) – De Bibel bible

1. Mose 14

¹Doa wieren vea Kjennichs, de Kjennich Amrafel en Schinar, de Kjennich Arjoch, en Ellasar, de Kjennich Kedor Laomer, en Elam, un de Kjennich Tidal, en Gojim.

²Dee vea Kjennichs muaken eenen Kjrich met Kjennich Bera, en Sodom, Kjennich Birscha, en Gomorra, Kjennich Schinab, en Adma, Kjennich Schemeber, en Zebojim, un de Kjennich von Bela, daut uk Zoar heet.

³Aul dise brochten äare Armeeen toop em Siddim Tol wua daut Solt Mäa nu es.

⁴Fa twalw Joa hauden see Kedor Laomer jedeent, oba nu en daut 13. Joa stalden see sikj jäajen am opp.

⁵Dan en sien 14. Joa, jinkj Kedor Laomer toop met de Kjennichs, dee met am eenen Bunt hauden, un neem de Refaita en Aschterot Karnajim en, un dan uk noch de Susita en Ham, de Emita en de Kirjatajim Stapen,

⁶un de Horita en de Seir Boaj bat soo wiet aus El Paran aun de Jrens von de Wiltnis.

⁷Dan oppem Wajch trigj kjeemen see no En Mischpat, daut nu Kadesch heet, un neemen de gaunze Jäajent von de Amalekita en, un uk de Amorita bie Hazezon Tamar.

⁸Dan stunden de Kjennich en Sodom, de Kjennich en Gomorra, de Kjennich en Adma, de Kjennich Zebojim, un de Kjennich en Bela, daut Zoar es, sikj toop un jinjen em Siddim Tol jäajen

⁹Kjennich Kedor Laomer von Elam, Kjennich Tidal von Gojim, Kjennich Amrafel von Schinar, un Kjennich Arjoch von Ellasar. Daut wieren vea Kjennichs jäajen fief.

¹⁰Nu wieren doa väl Täa Lajcha en daut Siddim Tol, un de Kjennichs von Sodom un Gomorra follen en de Täa Lajcha un kjeemen doa om, un de äwaje randen no de Boaj.

¹¹De vea Kjennichs beplindaden dan Sodom un Gomorra, un neemen aul äa Ätwoa un waut an sest noch wieetvoll wia met.

¹²Soo wort uk Loot, dee en Sodom wond, un äwa däm Abram de Onkel wia, met sien Hab un Goot veschlapt.

¹³Eena von dee, dee doa haud kunt flichten, kjeem un säd Abram, dän Hebräa, waut doa jeworden wia. Abram wond bie de Ieekjen waut Mamre, dän Amorita jehieeden. Mamre un siene Breeda Eschkol un Aner hauden eenen Bunt met Abram.

¹⁴Aus Abram hieed daut sien Brooda sien Sän faustjenomen wia, jeef hee 318 Deena, aules Mana waut en sien Loaga jebuaren wieren, Jereetschoft toom de 4 Kjennichs hinjaraun joagen. Un see juagen dee gaunz bat Dan hinjaraun.

¹⁵Hee deeld siene Mana en Gruppen en, un äwafoll jane enne Nacht un juach an soo wiet aus Hoba no. Hoba es nuaden von Damaskus.

¹⁶Hee brocht aul daut Hab un Goot trigj un uk Loot met sien Hab un Goot, un de Frues un aundre Menschen.

¹⁷Aus Abram dan äwa Kedor Laomer un de Kjennichs jewonnen haud un trigj kjeem, kjeem de Kjennich von Sodom am entjäajen un troff am em Schawe Tol, daut uk daut Kjennichs Tol heet.

¹⁸Un Melchisedek, de Kjennich en Salem, brocht Broot un Wien. Hee wia een Priesta fa däm hechsten Gott.

¹⁹Dee säajend Abram un säd: Mucht de hechsta Gott, dee dän Himmel un de Ieed jemoakt haft, die säajnen.

²⁰Wie lowen dän hechsten Gott dee die diene Jäajna en diene Macht jejäft haft. Un Abram jeef dän Kjennich von Salem een Tieendel von aules waut hee met trigj jebrocht haud.

²¹Un de Kjennich von Sodom säd to Abram: Jeff mie de Menschen, oba behool daut Hab un Goot fa die selfst.

²²Oba Abram säd am: Ekj hab ver däm HARN, dän hechsten Gott, dee dän Himmel un de Ieed jemoakt haft, met een Eit vesproaken,

²³daut ekj nich woa soo väl aus eenen Twierem ooda eenen Schoobaunt, ooda irjent sestwaut waut dient es, nämen, soo daut du nich sajen woascht: Ekj hab Abram rikj jemoakt.

²⁴Ekj näm nuscht buta waut miene Mana oppjebrukt haben un daut Poat waut Aner, Eschkol un Mamre traft. Lot an äa Poat haben. Daut äwaje kaust aula trigj haben.