Read Plautdietsch (Low German) – De Bibel 1. Mose 15 Bible Online

1. Mose 15 - Plautdietsch (Low German) – De Bibel bible

1. Mose 15

¹Eene jewesse Tiet lota kjeem de HAR no Abram en eene Erfoarunk un säd: Hab nich Angst Abram. Ekj woa die Schutz jäwen; die woat noch väl goodet tookomen.

²Un Abram säd: Gott mien HAR, waut west du mie tookomen loten? Ekj hab kjeen Kjint, un mien Oafgoot woat no mien Kjnajcht Elieser von Damaskus gonen.

³Un Abram säd: Du hast mie kjeen Kjint tookomen loten, un miene Oaw es mien Kjnajcht, dee von kjlien aun en miene Wirtschoft jewast es.

⁴Nu horcht. Dan hieed Abram däm HARN sajen: Nä! De Kjnajcht woat nich diene Oaw sennen. Dien ieejna Sän woat diene Oaw sennen.

⁵De HAR jinkj ver am rut un säd: Kjikj emol no de Stierns, un proow dee to talen, soo goot aus du kaust. Soo väl Nokomen woascht du haben.

⁶Abram sad sien vetruen opp däm HARN sien Vespräakjen, un de HAR tald am doaderch jerajcht.

⁷Un de HAR säd to Abram: Ekj sie de HAR, dee die von Ur, de Chaldäa äare Staut, häajebrocht hab, soo daut ekj die dit Launt jäwen kunn, daut et dient kunn sennen.

⁸Un Abram säd: Gott mien HAR, woo kaun ekj daut foten, daut dit saul mient sennen?

⁹Un de HAR säd: Brinj emol een dreejoaschet Hoklinkj, eene dreejoasche Kos, eenen dreejoaschen Bock, un twee Duwen.

¹⁰Abram brocht dee, un schneet dee delenjd de Medd opp. Dan läd hee dee enne Rieej, emma eene halft jäajenäwa von de aundre. De Väajel schneet hee nich enne halft.

¹¹Doa kjeemen dan waut Oshakasch rauf opp daut Fleesch, un Abram juach dee doa emma wajch.

¹²Aus de Sonn dan unjajinkj, kjeem doa een deepa Schlop opp Abram; daut wort sea diesta un eene groote Forcht kjeem äwa am.

¹³Dan säd de HAR: Opp verieescht woaren diene Nokomen framde sennen en een Launt, woont nich äat es. Doa woaren see Sklowen sennen, un see woaren schlajcht behaundelt woaren. Dit woat 400 Joa sennen.

¹⁴Ekj woa daut Launt, wua see deenen woaren, bestrofen, un dan woaren see ut daut Launt, met väle wieetvolle Sachen rut komen.

¹⁵Du selfst, woascht sea oolt woaren, un ruich no diene Väavodasch gonen, un begroft woaren.

¹⁶No vea Jennerazionen woaren see trigj hiahan komen. De Amorita, dee hia nu wonen, woaren ieescht de Mot met äare Sinden voll moaken ea ekj an strofen woa.

¹⁷Aus de Sonn ieescht unjajinkj un daut diesta wort, trocken doa twee Dinja tweschen de twee halften von daut Fleesch derch. Eent wia een Fiatopp, dee goot kwaulemd, daut aundre wia een Fiastock, dee doa kloa brend.

¹⁸Dän Dach muak de HAR eenen Bunt met Abram un säd: Ekj woa diene Nokomen dit Launt jäwen, vom Ägiptischen Riefa bat dän grooten Eufrat Riefa,

¹⁹de gaunze Jäajent wua nu de Kenita, Kenasita, Kadmonita,

²⁰de Hetita, Perisita, Refaita,

²¹de Amorita, Kanaanita, Girgasita un de Jebusita wonen.