Read Plautdietsch (Low German) – De Bibel 1. Mose 16 Bible Online

1. Mose 16 - Plautdietsch (Low German) – De Bibel bible

1. Mose 16

¹Abram un Sarai hauden kjeene Kjinja jehaut. See hauden eene ägiptische Kjäakjsche, dee heet Hagar.

²Un Sarai säd to Abram: Kjikj emol. De HAR haft mie nich loten Kjinja haben. Kjikj emol no miene Kjäakjsche. Veleicht kaun ekj derch ar Kjinja haben. Un Abram wia envestonen met Sarai.

³Aus Abram tieen Joa en Kanaan jewont haud, neem siene Fru Sarai, äare ägiptische Kjäakjsche, Hagar, un jeef Abram, äaren Maun, dee to Fru.

⁴Un Abram omoarmd Hagar, un aus Hagar daut wist daut see schwanga wia, kjikjt see rauf opp äare Wieetsche.

⁵Dan säd Sarai to Abram: Dit waut ekj hia von dise lieden mott, felt uk opp die. Ekj leet die ar nämen, un dan aus see sach daut see schwanga wia, kjikjt see rauf opp mie. Mucht de HAR däm rechten, dee hia schuldich es.

⁶Un Abram säd to Sarai: See es diene Kjäakjsche! Doo met ar, soo aus die daut rajcht sitt. Dan muak Sarai ar daut Läwen schwoa, soo daut see von ar wajchrand.

⁷Enne Wiltnis, bie de Wotakjwal oppem Wajch no Schur, funk däm HARN sien Enjel Hagar.

⁸Un dee säd: Hagar, Sarai äare Kjäakjsche, von wua kjemst du, un wua jeist du han? Un Hagar säd: Ekj ran von Sarai, miene Wieetsche, wajch.

⁹Un däm HARN sien Enjel säd ar: Go du trigj no diene Wieetsche, un jehorch ar.

¹⁰Däm HARN sien Enjel säd: De HAR woat die soo väl Nokomen jäwen, daut dee nich woaren to talen sennen.

¹¹Un däm HARN sien Enjel säd uk noch: Wan du een kjlienet Junkje haben woascht, saust du am Ismael nanen, wiels de HAR die en dien Älent jehieet haft.

¹²Ismael woat soo frie aus een willa Äsel sennen, aulem jäajenaun un jieda eena jäajen am, nich frädlich met irjent een Brooda.

¹³Doa roopt see däm HARN sien Nomen aun, dee to ar jerät haud. See nand am: De HAR dee doa sitt. Un see säd: Hab ekj werkjlich däm jeseenen, dee mie sitt?

¹⁴Derch dit wort de Kjwal, dee tweschen Kadesch un Bered licht, Beer-lahai-roi [1] jenant.

¹⁵Hagar haud een Junkje, un Abram nand däm Ismael.

¹⁶Abram wia 86 Joa oolt aus Ismael jebuaren wort.