Read Plautdietsch (Low German) – De Bibel 1. Mose 23 Bible Online

1. Mose 23 - Plautdietsch (Low German) – De Bibel bible

1. Mose 23

¹Sara läwd aules toop 127 Joa.

²Sara storf bie Kirjat Arba, daut es Hebron, en Kanaan. Un Abraham hield aus see storf un truad ne Tietlank äwa ar.

³Dan jinkj Abraham en sienen Trua no de Hetita, un säd:

⁴Ekj won mank junt, un sie oba nich eena von junt jeworden. Lot mie een Stekj Launt kjeepen om mienen Dooden to begrowen.

⁵De Hetita säden to Abraham:

⁶Mien Har, horch emol. Gott haft die aus een Leida mank ons hanjestalt. Nu begrow dienen Dooden en irjent eent von onse baste Jräwa. Kjeena von ons woat die aufschuwen ooda hoolen von dienen Dooden opp sien Launt begrowen.

⁷Un Abraham stunt opp un kjneed sikj ver de Hetita, dee doa em Launt wonden.

⁸Un hee säd: Wan jie doamet envestonen sent, dan wudd jie een goodet Wuat fa mie enlajen bie Efron, Zohar sien Sän,

⁹daut hee mie wudd de Heel en Machpela vekjeepen, dee hee ieejent. Daut es je doa oppem Enj von sien Flekj. Lot mie daut hia ver junt foadich moaken, daut ekj am dän vollen Pries doafäa jäw, daut et dan mient es toom mienen Dooden han lajen.

¹⁰Efron saut doa mank de Hetita, un hee säd doa to Abraham, soo daut aul dee, dee doa biem Stautspuat sauten, daut hieeden:

¹¹Nä, mien Har. Horch emol. Ekj jäw die daut Flekj, un ekj jäw die de Heel. Hia ver miene Lied jäw ekj die daut. Begrow dienen Dooden doa.

¹²Dan kjneed Abraham sikj ver de Hetita,

¹³un säd to Efron, soo daut aule daut hieren kunnen: Horch doch uk no mie. Ekj jäw waut daut Flekj wieet es. Nemm daut von mie, un ekj woa mienen Dooden doa begrowen.

¹⁴Un Efron säd:

¹⁵Mien Har, lot mie waut sajen. Daut Flekj es 400 Selwastekja wieet. Waut es daut tweschen mie un die? Go un begrow dienen Dooden.

¹⁶Abraham wia dän Pries goot, un hee wuach doa ver de Hetita 400 Selwastekja ut, soo aus de Haundelsmana daut doa hauden.

¹⁷Soo kjrieech Abraham daut Flekj bie Machpela von Efron. Daut Flekj es oosten von Mamre un haft de Heel un aul de Beem doabowen.

¹⁸De Haundel fa daut Launt wort doa ver aul de Hetita jemoakt, dee doa bie äa Stautspuat kjeemen.

¹⁹No daut, begrowd Abraham siene Sara en de Heel opp daut Flekj bie Machpela, oosten von Mamre, waut nu Hebron es, en Kanaan.

²⁰Daut Flekj un de Heel doabowen jinkj dan von de Hetita no Abraham, daut et sient wia, toom Doodes begrowen.