Read Plautdietsch (Low German) – De Bibel 1. Mose 26 Bible Online

1. Mose 26 - Plautdietsch (Low German) – De Bibel bible

1. Mose 26

¹Nu kjeem noch eemol eene Hungaschnoot em Launt, eene aundre aus dee to Abraham siene Tiet. Un Isaak trock no Gerar, wua Abimelech Kjennich äwa de Filista wia.

²Un de HAR kjeem no am un säd: Go nich rauf no Ägipten. Bliew en daut Launt, woont ekj die sajen woa.

³Bliew aus framda en dit Launt, un ekj woa met die sennen un die säajnen. Ekj well die un diene Nokomen dit gaunze Launt jäwen, un ekj woa mienen Eit, dän ekj to dienen Voda Abraham jeschwuaren hab, utfieren.

⁴Ekj woa die soo väl Nokomen jäwen aus doa Stierns aum Himmel sent, un ekj woa diene Nokomen dise gaunze Jäajent jäwen. Derch diene Nokomen woaren aule Velkja oppe Ieed jesäajent.

⁵Dit es wäajen Abraham miene Wieed jehorcht un hee miene Jesazen un Väaschreften hilt.

⁶Soo läwd Isaak en Gerar.

⁷Aus de Mana en de Jäajent no siene Fru forschten, säd hee: Daut es miene Sesta. Hee haud Angst to sajen, daut see siene Fru wia, wiels ar leet daut schmock, un hee docht de Mana wudden am wäajen ar ombrinjen.

⁸Aus see dan ieescht een stoot wieren doa jewast, kjikjt Abimelech de Filista Kjennich eenen Dach utem Fensta un sach daut Isaak siene Fru Rebecka omfoot.

⁹Doaropp roopt Abimelech Isaak un säd: Kjikj emol, daut es diene Fru! Wuarom sätst du to mie, daut see diene Sesta wia. Un Isaak säd: Ekj docht, aundasch brinjen see mie wäajen ar noch om.

¹⁰Un Abimelech säd: Waut hast du ons met dit aunjedonen? Eena von onse Mana haud ar nämen kunt, un dan haud wie, derch waut du sätst, Schult opp ons jebrocht.

¹¹Dan woarnd Abimelech aul siene Menschen un säd: Deejanja, dee disen Maun ooda siene Fru aunschieet, saul doot jemoakt woaren.

¹²Isaak seid en daut Launt un kjrieech daut Joa eene hundat dobbelde Arnt. De HAR säajend am,

¹³daut hee rikja un rikja wort. Hee wia eefach sea goot auf.

¹⁴Hee haud Häaden von Schop un Vee un sea väl Deena, soo daut de Filista am aufjenstich worden.

¹⁵De Filista hauden aul de Borms, dee Isaak sien Voda Abraham siene Deena to äare Tiet jegroft hauden, voll Ieed jeschett.

¹⁶Un Abimelech säd to Isaak: Trakj von onse Jäajent wajch, wiels du best väl stoakja aus wie.

¹⁷Dan trock Isaak wieda von doa, un loagad sikj em Gerar Tol.

¹⁸Un Isaak growd de Borms op, dee to sienen Voda Abraham siene Tiet, jegroft wieren. De Filista hauden dee no sien Voda sienen Doot toojeschoaft. Isaak jeef de Borms de selwje Nomes, dee Abraham dee jejäft haud.

¹⁹Oba aus Isaak siene Deena em Tol eenen Borm growden un goot Wota kjrieejen,

²⁰kjeemen de Hoads von Gerar un streeden sikj met Isaak siene Hoads. See meenden daut Wota wia äat. Isaak nand dän Borm Essek, wiels see sikj doa streeden.

²¹See growden noch eenen Borm un streeden sikj uk äwa dän. Dän nanden see Sitna.

²²See trocken von doa wieda un growden noch eenen Borm, un äwa däm streeden see sikj nich. Disen Borm nanden see Rehobot. Isaak säd: Ekj jeef de Städ dän Nomen, wiels de HAR haft ons Rum jejäft, daut wie ons hia oppbuen kjennen.

²³Von doa trock Isaak no Beerscheba.

²⁴Doa kjeem de HAR no am de ieeschte Nacht un säd: Ekj sie dien Voda Abraham sien Gott. Hab nich Angst. Ekj sie met die un woa die säajnen un väl Nokomen jäwen, om Abraham sient haulwen, dee mie deend.

²⁵Doaropp bud hee doa eenen Aultoa un bäd däm HARN aun. Doa stald Isaak sien Zelt opp un siene Deena growden doa eenen Borm.

²⁶Dan kjeem Abimelech de Kjennich von Gerar met Ahusat, sien Rotjäwa, un Pichol, de Kommandaunt von siene Armee, no Isaak.

²⁷Un Isaak säd to an: Wuarom kom jie no mie, no däm, daut jie mie fientlich behaundelden un mie von junt wajch schekjten?

²⁸Un see säden: Wie kjennen daut kloa seenen daut de HAR met die es. Nu kom wie no die daut wie ons eenjen kjennen. Well wie met een Eit eenen Bunt moaken.

²⁹Vespräakj ons, daut du ons kjeen Schoden aundoonen woascht, krakjt soo aus wie die nuscht buta goodet jedonen haben, un die en Fräd wieda jeschekjt haben. Du best nu dee däm de HAR säajent.

³⁰Un Isaak muak eene Moltiet fa an, un see eeten un drunken.

³¹Tiedich dän näakjsten Morjen stunden see opp un vespruaken met eenen Eit, daut see sikj unja eenaunda frädlich wudden sennen. Dan neemen see Aufscheet von Isaak un veleeten frädlich.

³²Dän selwjen Dach kjeemen Isaak siene Oabeida un säden am, daut see eenen Borm jegroft hauden un Wota jefungen hauden.

³³Isaak nand dän Borm Scheba. Doawäajen wort de Staut Beerscheba jenant.

³⁴Aus Esau 40 Joa oolt wia, neem hee Beeri däm Hetita siene Dochta Jehudit, un Elon däm Hetita siene Dochta Basemat aus siene Frues.

³⁵Dit wia Isaak un Rebecka sea schwoa.