Read Plautdietsch (Low German) – De Bibel 1. Mose 3 Bible Online

1. Mose 3 - Plautdietsch (Low German) – De Bibel bible

1. Mose 3

¹De Schlang wia lestja aus irjent een aundret willet Tia, waut Gott de HAR jemoakt haud. Un dee säd to de Fru: Haft Gott werkjlich jesajcht, daut jie von irjent een Boom nich äten sellen?

²Un de Fru säd to de Schlang: Wie derwen von de Frucht von de Beem em Goaden äten,

³oba Gott säd: Jie sellen nich Frucht von däm Boom äten, dee medden em Goaden steit. Jie sellen doa nich von äten un dän nich emol aunschieren, soo daut jie nich stoawen.

⁴Oba de Schlang säd to de Fru: Jie woaren goanich stoawen.

⁵Gott weet, daut soo boolt aus jie doavon äten, woaren june Uagen op sennen, un jie woaren soo aus Gott sennen, un weeten, waut goot un waut schlajcht es.

⁶Un de Fru sach, daut de Frucht goot leet, un daut dee goot to äten wia, un daut dee eenem kunn waut Vestentnis jäwen. Dan neem see von de Frucht un eet, un jeef äaren Maun uk, un dee eet.

⁷Dan vestunden see aulebeid un sagen, daut see noaktich wieren. Un see muaken sikj waut von Fiejenbläda toom sikj bedakjen.

⁸Aus de Dach aunfunk auftokjeelen, hieeden see, daut de HAR Gott em Goaden jinkj. Un de Maun un de Fru vestuaken sikj von däm HARN Gott mank de Beem em Goaden.

⁹Un Gott de HAR roopt däm Maun un säd: Wua best du?

¹⁰Un de Maun säd: Ekj hieed die em Goaden un ekj haud Angst, wiels ekj noaktich sie, un dan vestuak ekj mie.

¹¹Un Gott de HAR säd: Wäa säd die daut du noaktich wieescht? Hast du von däm Boom jejäten, von däm ekj säd, daut du nich äten sust?

¹²Un de Maun säd: De Fru, dee du mie jeefst, jeef mie von de Frucht von däm Boom, un ekj eet.

¹³Un Gott de HAR säd to de Fru: Waut hast du bloos jedonen? Un see säd: De Schlang muak mie waut väa, un ekj eet.

¹⁴Un Gott de HAR säd to de Schlang: Wiels du dit jedonen hast, woa ekj die bestrofen. Von aule Tieren woascht du daut eensje sennen, dee oppem Buck krupen mott, un du woascht läweslank motten Ieed fräten.

¹⁵Du un de Fru woaren junt fientlich sennen, un june Nokomen woaren sikj nich lieden kjennen. Hee woat die dien Kopp vewunden, un du woascht am de Hak vewunden.

¹⁶Un to de Fru säd hee: Ekj woa die väl mea Weedoag jäwen wan du schwanga best, un du woascht bie de Jeburt groote Weedoag haben. Doch woascht du een velangen no dienen Maun haben, un hee woat äwa die daut Wuat fieren.

¹⁷Un to däm Maun säd hee: Wiels du no diene Fru äa Wuat jehorcht hast, un hast von däm Boom jejäten, von woonen ekj bestalt haud, daut du doa nich von äten sust, woa ekj mien Wuat jäwen, daut de Ieed nich soo väl droagen woat. Dien gaunzet Läwen woascht du schaufen motten, daut doa woat jenuach to äten sennen fa junt.

¹⁸Doa woaren Distlen un Onkrut opp daut Launt sennen, un du woascht von de Plaunten oppe Stap äten.

¹⁹Du woascht väl schweeten motten, om jenuach Äten to trakjen, un schlieslich woascht du stoawen un wada to Ieed woaren. Du best von de Ieed jenomen, un du woascht wada Ieed woaren.

²⁰Un Adam jeef siene Fru dän Nomen Eva, wiels see de Mutta fa aulet Menschenläwen es.

²¹Un Gott de HAR muak Kjleeda fa Adam un siene Fru von Ladasch, un kjleed an doamet.

²²Un Gott de HAR säd: Kjikj emol, de Mensch weet nu waut, waut wie von goodet un schlajchtet weeten. Hee sull nich noch met eemol von de Frucht von däm Boom, dee Läwen jeft, nämen un äten, un opp emma läwen.

²³Doawäajen schekjt Gott de HAR am ut däm Eden Goaden rut, daut hee sull de Ieed beoabeiden, von woone hee jekomen wia.

²⁴Hee schekjt däm Mensch ut däm Goaden rut, un stald doa aun de oostne Kaunt Cheruben han, met Schwieed, dee doa flaumden un en aule Rechtungen dreiden. Dee wieren doa toom dän Wajch no däm Boom, dee Läwen jeft, too to stalen.