Read Plautdietsch (Low German) – De Bibel 1. Mose 36 Bible Online

1. Mose 36 - Plautdietsch (Low German) – De Bibel bible

1. Mose 36

¹Dit sent de Nokomen von Esau, dee uk Edom heet.

²Esau neem siene Frues von de Kanaanita. Daut wieren Ada, Elon dän Hetita siene Dochta, Oholibama, Zibon dän Hiwita sien Sän Ana siene Dochta,

³un Basemat, Ismael siene Dochta un Nebajot siene Sesta.

⁴Esau un Ada hauden eenen Sän, Elifas. Un Esau un Basemat hauden eenen Sän, Reguel.

⁵Un Esau un Oholibama hauden de Säns, Jeusch, Jalam un Korach. Dit sent dan Esau siene Säns dee en Kanaan jebuaren wieren.

⁶Un Esau neem siene Frues, Säns un Dajchta un aul siene Menschen, sien Vee un aules waut hee haud en Kanaan toopjesaumelt un trock wajch von Jakob en een aundret Launt.

⁷Äare Wirtschoften wieren too groot daut see kunnen toop wonen. De Jäajent kunn nich aul äa Vee feeden.

⁸Un Esau wond en de Boaj bie Seir. Esau es Edom.

⁹Dit sent de Nokomen von Esau, dee de Staumvoda von de Edomita es un enne Boaj bie Seir wonen.

¹⁰Esau un siene Fru Ada hauden eenen Sän, Elifas; un Esau un siene Fru, Basemat, hauden eenen Sän, Reguel.

¹¹Elifas siene Säns wieren Teman, Omar, Zefo, Gatam un Kenas.

¹²Esau sien Sän Elifas un siene Näbenfru, Timna, hauden dän Sän, Amalek. Dit sent Esau un siene Fru Ada äare Nokomen.

¹³Reguel siene Säns heeten Nahat, Serach, Schama un Misa. Dit sent Esau un siene Fru, Basemat, äare Nokomen.

¹⁴Esau un siene Fru Oholibama, dee Ana siene Dochta un Zibon siene Grootdochta wia, hauden Jeusch, Jalam un Korach.

¹⁵Dit sent de Staumvodasch von Esau siene Nokomen. Derch Elifas, Esau sienen ieeschtjebuarnen, komen de Stam Teman, Omar, Zefo, Kenas,

¹⁶Korach, Gatam un Amalek. Dit wieren de Staumvodasch mank Elifas siene Nokomen. Elifas wia Esau un siene Fru Ada äa Sän. Dee wonden en Edom.

¹⁷Un Esau sien Sän Reguel haud de Säns Nahat, Serach, Schama un Misa. Dit wieren aula Staumvodasch von Reguel siene Nokomen un Grootsäns aun Esau un siene Fru, Basemat.

¹⁸Esau siene Fru Oholibama hauden de Säns Jeusch, Jalam un Korach. Dise wieren jieda een Staumvoda. Dit sent Esau siene Säns met siene Fru Oholibama, dee Ana siene Dochta wia.

¹⁹Dit sent dan Esau, dee uk Edom jenant wort, siene Säns un de Staumvodasch von siene Nokomen.

²⁰Seir, de Horita, un siene Nokomen wieren Enwona em Launt wua Esau hanjinkj. Seir siene Nokomen wieren Lotan, Schobal, Zibon, Ana,

²¹Dischon, Ezer un Dischan. Dit sent de Nokomen von de Horita, Seir siene Säns en daut Launt woont wie nu aus Edom kjanen.

²²Lotan siene Säns wieren Hori un Hemam. Lotan haud eene Sesta, Timna.

²³Schobal siene Säns wieren Alwan, Manahat, Ebal, Schefi un Onam.

²⁴Zibon siene Säns wieren Aja un Ana. Dis Ana funk emol de heete Kjwal enne Wiltnis, aus hee sienen Voda Zibon siene Äsels heeden deed.

²⁵Ana siene Kjinja wieren Dischon un de Dochta Oholibama.

²⁶Dischon siene Säns wieren Hemdan, Eschban, Jitran un Keran.

²⁷Ezer siene Säns wieren Bilhan, Saawan un Akan.

²⁸Dischan siene Säns wieren Uz un Aran.

²⁹De Staumvodasch von de Horita wieren Lotan, Schobal, Zibon, Ana,

³⁰Dischon, Ezer un Dischan. Dit sent aule Staumvodasch von de Horita en daut Launt Seir.

³¹De Kjennichs, dee en Edom rejieeden, ea doa een Kjennich äwa de Israeliten wieren, sent dise.

³²Bela, Beor sien Sän, rejieed en Edom en de Staut Dinhaba.

³³Aus Bela storf, rejieed Jobab, Serach von Bozra sien Sän.

³⁴No däm daut Jobab storf, rejieed Huscham, dee von daut Launt von de Temanita kjeem.

³⁵Huscham storf un en siene Städ rejieed Hadad, Bedad sien Sän. Hadad kjrieech de äwahaunt äwa Midian en Moab. Hee rejieed von de Staut Awit.

³⁶No däm daut Hadad storf rejieed Samla von Masreka.

³⁷No däm daut Samla storf, rejieed Schaul von Rehobot aum Eufrat Riefa.

³⁸Schaul storf un Baal Hanan, Achbor sien Sän, rejieed en däm siene Städ.

³⁹No däm daut Baal Hanan, Achbor sien Sän, storf, rejieed Hadar. Däm siene Staut wia Pagu. Siene Fru wia Mehetabel, Matred siene Dochta un Mesahab siene Grootdochta.

⁴⁰De Staumvodasch von Esau siene Nokomen no äare Famieljes un Jäajenden wieren Timna, Alwa, Jetet,

⁴¹Oholibama, Ela, Pinon,

⁴²Kenas, Teman, Mibzar,

⁴³Magdiel un Iram. Dit sent dan de Staumvodasch von Edom no aul de Jäajenden no, wua dee wonen. De Edomita sent de Nokomen von Esau.