Read Plautdietsch (Low German) – De Bibel 1. Mose 38 Bible Online

1. Mose 38 - Plautdietsch (Low German) – De Bibel bible

1. Mose 38

¹Dan kjeem daut, daut Juda em Tol nenn trock, wajch von siene Breeda. Hee wond doa met eenen Maun von Adullam, dee Hira heet.

²Un en de Jäajent troff Juda eene Mejal, dee Schua, eenen Kanaanita, siene Dochta wia. Un hee befried sikj met ar un see wieren Maun un Fru.

³Juda un de Fru hauden eenen Sän, un see nanden am Er.

⁴Un see hauden noch eenen Sän, dän nanden see Onan.

⁵Un see hauden noch eenen dredden Sän, dän see Schella nanden. Om dise Tiet wonden see en Kessib.

⁶Juda neem eene Fru fa sienen ieeschtjebuarnen, Er. Dee Schwieedochta äa Nomen wia Tamar.

⁷Un Er wia schlajcht, un däm HARN jefoll daut nich, soo daut de HAR am stoawen leet.

⁸Un Juda säd to Onan: Go en läw met dienen Brooda siene Fru un doo diene Fliet aus een Schwoaga fa ar, daut dien Brooda soo Nokomen kjricht.

⁹Oba Onan wist, daut de Sän nich wudd siena sennen, un doawäajen, aus hee met ar ligjen jinkj, leet hee dän Somen oppe Ieed faulen, soo daut sien Brooda nich wudd Nokomen haben.

¹⁰Dit jefoll däm HARN schlajcht un hee leet Onan uk stoawen.

¹¹Dan säd Juda to Tamar, siene Schwieedochta: Bliew aus eene Wätfru en dienen Voda sien Hus bat mien Sän Schella groot es. Hee haud Angst daut dee uk met eemol stoawen wudd, soo aus siene Breeda. Un Tamar jinkj un läwd en äa Voda sien Hus.

¹²No eene jewesse Tiet storf Juda siene Fru, dee Schua siene Dochta wia. No siene Truatiet, jinkj hee no Timna wua siene Mana Schop schäaden. Hee jinkj toop met sienen Frint, Hira von Adullam.

¹³Dan aus Tamar daut to hieren kjrieech daut äa Schwieevoda no Timna jinkj toom Schop schäaren,

¹⁴läd see äare Wätfrukjleeda tosied, un trock sikj jeweenelje Kjleeda aun. See bedakjt äa Jesecht un jinkj un saut buta de Staut, wua de Wajch von Enajim no Timna jeit. See wist aul daut Schella oppjewossen wia, un daut see nich jenomen wia aus eene Fru fa am.

¹⁵Aus Juda ar sach, docht hee see wia eene Hua, wiels see äa Jesecht bedakjt haud.

¹⁶Hee jinkj no ar aun de Kaunt Wajch un säd: Komm. Lot mie met die schlopen. Hee wist daut nich daut dit siene Schwieedochta wia. Un see säd: Waut woascht du mie doafäa jäwen, wan du met mie schlopen woascht?

¹⁷Un hee säd: Ekj woa die eene kjliene Kos von miene Häad jäwen. Un see säd: Waut woascht du mie birjen daut du dee schekjen woascht?

¹⁸Un hee säd: Waut saul ekj birjen? See säd: Dien Rinkj met dän Baunt un dien Gonstock. Un hee jeef ar dee, un hee lach met ar. Boolt doaropp wort ar kloa daut see schwanga wia.

¹⁹Aus Juda wajchjinkj, jinkj see uk äaren Wajch un neem daut Duak, waut see äwa äa Jesecht haud auf, un trock sikj äare Wätfru Kjleeda aun.

²⁰Juda schekjt dan de Kos met sienen Frint, von Adullam, om daut Jebirjde trigj to kjrieen, oba hee funk ar noanich.

²¹Un hee fruach de Mana doa: Wua es de Hua, dee aun de Kaunt Wajch bie Enajim saut? Un dee säden: Hia es kjeene Hua jewast.

²²De Adulamita jinkj dan trigj no Juda un säd: Ekj hab ar nich jefungen, un de Mana von doarom sajen, doa es kjeene jewast.

²³Un Juda säd: Du weetst daut du ar nich finjen kust, aus wie ar de kjliene Kos schekjten. Lot ar de Dinja fa sikj hoolen, daut see ons nich utlachen.

²⁴Ojjefäa dree Moonat lota kjrieech Juda eene Norecht daut Tamar, siene Schwieedochta, dee sikj aus eene Hua haud oppjestalt, daut see nu schwanga wia. Un Juda säd: Brinjt ar äwadäl. Dee saul vebrent woaren.

²⁵Un aus see ar väabrochten, schekjt see eene Norecht no äaren Schwieevoda: Derch dän Maun, däm dise jehieren, sie ekj schwanga. Un see säd: Kjikj emol wäm sien Rinkj met däm Baunt un wäm sien Gonstock dit sent.

²⁶Juda bekjand fuaz, daut et siene wieren, un säd: See es dolla em rajchten aus ekj, wiels ekj ar nich mienen Sän Schella jejäft hab. Un hee lach nich mea met ar.

²⁷Aus daut bat doa wia, daut daut Kjint jebuaren wort, wia daut een Poakje.

²⁸Un aus see dee Weedoag haud, kjeem een Hauntje rut, un de Weemutta bunk eenen rooden Baunt aun daut Hauntje. See säd: Disa es de ieeschta.

²⁹Dan oba trock daut Hauntje trigj un sien Broodakje wort jebuaren. Un see säd: Soo brakjst du derch! Doawäajen nanden see am Perez.

³⁰No daut wort sien Brooda jebuaren, dee dän rooden Baunt aun de Haunt haud. Dän nanden see Serach.