Read Plautdietsch (Low German) – De Bibel 1. Mose 39 Bible Online

1. Mose 39 - Plautdietsch (Low German) – De Bibel bible

1. Mose 39

¹Josef, wada, wia no Ägipten jenomen von de Ismaeliten, un een Ägipta, Potifar, haud am doa jekoft. Potifar wia eena von däm Kjennich siene aunjestalde, de bowaschta von de Wajchta, dee rom dän Kjennich sent.

²De HAR wia met Josef un am jelunk waut hee deed. Hee wond en sienen ägiptischen Wieet sien Hus.

³Un sien Wieet sach daut de HAR met am wia un daut de HAR am Jlekj jeef met aules waut hee deed.

⁴Josef wort goot aunjeseenen von sienen Wieet un hee wort däm sien perseenelja Deena. Un de Wieet stald am aun äwa sien Hus un aules waut hee haud.

⁵Un von dee Tiet aun wua Josef äwa sien Hus un aules waut hee haud aunjestalt wia, säajend de HAR däm Ägipta sien Hus un siene Stapen om Josef sient haulwen.

⁶Aules waut hee haud, leet hee en Josef siene Macht. Hee haud soon vetruen opp Josef, daut hee om nuscht beduat wia, buta waut hee to äten kjrieech. Josef leet sea schmock.

⁷Un dan kjeem daut, daut däm Wieet siene Fru een Uag opp am haud. Un see säd to am: Laj die met mie dol.

⁸Oba hee wäad ar auf un säd: Kjikj emol. Mien Wieet brukt om nuscht en sien Vemieejen duaren, wiels hee sikj opp mie velat. Hee haft mie äwa aules jesat waut hee haft.

⁹Ekj hab hia krakjt soo väl to sajen aus hee, un hee haft nuscht von mie trigjehoolen buta die. Woo kunn ekj dan bloos soon schlajchtet doonen un jäajen Gott sindjen?

¹⁰Un wan see uk Dach fa Dach soo to Josef räd, horcht hee nich no ar, daut hee met ar sennen ooda ligjen wudd.

¹¹Oba een Dach aus hee em Hus bie siene Oabeit wia un kjeene aundre Deena doa romwieren

¹²kjrieech see am aum Mauntel to hoolen un säd: Komm ligj met mie! Un hee leet sien Mauntel en äare Haunt un rand doavon un utem Hus rut.

¹³Un aus see sach, daut hee wajch jerant wia un haud oba dän Mauntel en äare Haunt jeloten,

¹⁴roopt see waut von de Deena un säd to dee: Kjikjt emol. Disen Hebräa, dän mien Maun em Hus jebrocht haft, wull vondoag met mie ligjen. Dee kjeem en miene Stow nenn om Schaund met mie to driewen. Oba ekj schrieech lud

¹⁵un dan rand hee wajch un utem Hus rut. Oba hee leet noch sien Mauntel bie mie.

¹⁶Un see hilt dän Mauntel bat äa Maun no Hus kjeem,

¹⁷un vetald am de selwje Jeschicht. See säd: Dis Hebräa, dän du häa jebrocht hast, wull vondoag met mie ligjen.

¹⁸Oba soo schwind aus ekj schrieech, rand hee utem Hus un leet sien Mauntel bie mie.

¹⁹Aus see äaren Maun dise Jeschicht vetald un noch säd: Soo haft dien Deena mie behaundelt, wia Potifar bossich äwa Josef.

²⁰Un de Wieet neem am un schmeet am en daut Jefenkjnis, wua däm Kjennich siene faustjenomne wieren. Un doa must Josef bliewen.

²¹Doch de HAR wia met Josef un bewees am truhoatje Leew un muak daut, daut de väaschta von de aunjestalde em Jefenkjnis väl von Josef hilt.

²²Hee jeef Josef de Äwasecht äwa aule faustjenomne un äwa aule Oabeit en daut Jefenkjnis.

²³De Aunjestalda kjemmad sikj nuscht om de Dinja, dee hee Josef äwajäft haud. Un de HAR wia met Josef un jeef am Erfolch en aules waut hee deed.