Read Plautdietsch (Low German) – De Bibel 1. Mose 40 Bible Online

1. Mose 40 - Plautdietsch (Low German) – De Bibel bible

1. Mose 40

¹Eene jewesse Tiet lota, hauden däm ägiptischen Kjennich sien Enschenkja un sien Bakja däm Kjennich beleidicht.

²De Kjennich oajad sikj äwa de beid,

³un leet dee em Jefenkjnis stoppen. Daut wia daut Jefenkjnis von däm bowaschten von däm Kjennich siene Wajchta, daut selwje Jefenkjnis wua Josef uk faust wia.

⁴De bowaschta von de Wajchta stald Josef aun dee to deenen. Dee bleewen een natet stoot em Jefenkjnis.

⁵Eene Nacht, aus see doa em Jefenkjnis wieren, dreemden de Enschenkja un de Bakja jieda eenen Droom. Daut wieren veschiedne Dreem met veschiedne Diedungen.

⁶Aus Josef an zemorjes sach, wieren see aulebeid een bät veläajen.

⁷Un Josef fruach an beid: Wuarom lat daut junt vondoag bedrekjt?

⁸Un see säden: Wie haben latste Nacht Dreem jehaut, un doa es kjeena dee ons dee dieden kaun. Un Josef säd to an: Daut es doch bloos Gott, dee eenen Droom dieden kaun. Vetalt mie june Dreem.

⁹Un soo vetald de bowaschta Enschenkja Josef sienen Droom. Hee säd: Ekj sach en mienen Droom eene Wienrank ver mie,

¹⁰dee dree Asta haud. Un soo boolt aus dee jreen worden blieejden dee, un boolt wieren doa riepe Wiendruwen aun.

¹¹En miene Haunt haud ekj däm Kjennich sien Kuffel, un ekj drekjt de Sauft von de Wiendruwen en daut Kuffel nenn un jeef däm Kjennich daut enne Haunt.

¹²Un Josef säd to am: Dit es waut de Droom bediet. De dree Asta sent dree Doag.

¹³Om dree Doag woat de Kjennich die komen loten, un die en diene oole Städ aunstalen. Du woascht wada diene oole Oabeit haben un däm Kjennich sien Kuffel en siene Haunt jäwen.

¹⁴Wan daut wada goot met die jeit, dan denkj aun mie. Doo mie dän Jefaulen un räd to dän Kjennich von mie, daut ekj kunn ut dit Jefenkjnis rut komen.

¹⁵Mie haben see emol von de Hebräa äa Launt jestolen, un uk hia hab ekj nuscht veschulcht, daut ekj hia em Jefenkjnis sennen sull.

¹⁶Aus de Bakja sach daut däm aundren siene Diedunk goot wia, säd hee to Josef: Ekj haud uk eenen Droom. Ekj haud dree Brootkjarw oppem Kopp.

¹⁷Em bowaschten wia veschiednet Jebaknis fa däm Kjennich, oba de Väajel kjeemen un freeten ut dän Korf opp mienen Kopp.

¹⁸Un Josef säd: Dit es waut dien Droom bediet. De dree Kjarw stalen dree Doag väa.

¹⁹Om dree Doag woat de Kjennich die komen loten, un dan woat hee dienen Kjarpa opp eenen Boom henjen. Un de Väajel woaren komen dien Fleesch fräten.

²⁰Dan aum dredden Dach wia däm Kjennich sien Jeburtsdach, un hee leet däm Enschenkja un däm Bakja ver siene Mana komen.

²¹Un hee jeef däm Enschenkja wada sien väajet Aumt, soo daut hee wada däm Kjennich sien Kuffel am enne Henj jeef,

²²un hee leet däm Bakja henjen, soo aus Josef daut jediet haud.

²³De Enschenkja, oba, hilt Josef nich em Denkj un vegaut von am.