Read Plautdietsch (Low German) – De Bibel 1. Mose 42 Bible Online

1. Mose 42 - Plautdietsch (Low German) – De Bibel bible

1. Mose 42

¹Aus Jakob enwort, daut doa en Ägipten Jeträajd to haben wia, säd hee to siene Säns: Wuarom kjikj jie junt bloos unjarenaunda aun?

²Horcht emol. Ekj hab jehieet daut en Ägipten Jeträajd to haben es. Got emol no Ägipten un kjeept Jeträajd fa ons, daut wie waut to äten haben un nich doot hungren.

³Un tieen von Josef siene Breeda reisden no Ägipten om Jeträajd to kjeepen.

⁴Oba Jakob schekjt Benjamin, Josef sienen Brooda, nich met, wiels hee enjst sikj daut däm waut woaren wudd.

⁵Soo muak sikj daut, daut Israel siene Säns, krakjt soo aus aundre, kjeepen kjeemen. En Kanaan wia uk Hungaschnoot.

⁶Josef wia de Gowernia äwa daut Launt, un vekoft doa Jeträajd aun de Menschen, dee doano kjeemen. Un Josef siene Breeda kjeemen un kjneeden sikj ver am met äare Jesechta bat oppe Ieed.

⁷Aus Josef siene Breeda sach, kjand hee an. Oba hee behaundeld an aus framde un räd groff met an. Von wua sent jie? fruach hee. Un see säden: Wie sent von daut Launt Kanaan jekomen, Jeträajd to kjeepen.

⁸Oba de Breeda kjanden am nich, wan hee an uk kjand.

⁹Un Josef docht aun de Dreem, dee hee emol von an jehaut haud. Un hee säd: Jie sent Spionen. Jie sent jekomen to seenen wua ons Launt schwak es.

¹⁰Un see säden: Nä, mien Har. Wie sent aus diene Deena jekomen, Jeträajd to kjeepen.

¹¹Wie sent aula Säns von eenen Maun. Wie sent opprechtich. Wie sent nich Spionen.

¹²Oba Josef säd to an: Nä, jie sent jekomen to seenen wua ons Launt schwak es.

¹³Un see säden: Wie, diene Deena, sent twalw Breeda, aula vom selwjen Voda. Wie komen von Kanaan. Ons jinjsta Brooda es met onsen Voda un een Brooda es nich mea.

¹⁴Oba Josef säd: Daut es bloos soo aus ekj jesajcht hab. Jie sent Spionen.

¹⁵Dit es woo ekj junt aufproowen woa. En däm Kjennich sienen Nomen saj ekj, jie woaren nich wajch kjennen von hia, buta jun jinjsta Brooda häa kjemt.

¹⁶Schekjt eenen von junt trigj junen Brooda holen, oba de äwaje bliewen hia em Jefenkjnis. Soo woa wie ieescht seenen auf jie de Woarheit räden. Aundasch saj ekj em Kjennich sienen Nomen, jie sent Spionen.

¹⁷Doaropp stopt hee an aula fa dree Doag em Jefenkjnis.

¹⁸Aum dredden Dach säd Josef to an: Ekj sie een Mensch dee Gott ferchten deit. Ekj woa junt opp eene Bedinjunk gonen loten.

¹⁹Wan jie opprechtich sent, dan lot eenen von junt hia em Jefenkjnis bliewen un de äwaje lot no Hus gonen, om daut Jeträajd no june hungaje Famieljes to nämen.

²⁰Dan brinj jie junen jinjsten Brooda häa, aus Oppwies fa june Wieed. Dan woa ekj junt aum Läwen loten. Un see weljden en.

²¹Un see säden eena toom aundren: Dit kjemt secha opp ons, wiels wie schuldich sent fa onsen Brooda. Wie sagen woo gaunz aum Enj hee wia, aus hee ons prachad, un wie horchten nich. Nu es dit doawäajen opp ons jekomen.

²²Un Ruben säd: Säd ekj junt nich, daut jie junt nich vesindjen sullen jäajen am? Nu woa wie bestroft woaren doafäa, daut wie am doot muaken.

²³See wisten nich daut Josef an vestunt, wiels see met am derch eenen, dee fa an äwasaten deed, jerät hauden.

²⁴Un hee dreid sikj een stootje wajch von an un hield ea hee wieda met an räd. Dan leet hee Simeon nämen un faustbinjen, aus see doa tookjikjten.

²⁵Un Josef bestald daut äare Sakj met Jeträajd jefelt worden, un uk daut jiedrem sien Jelt trigj en sienen Sak jestopt sull woaren. Hee säd uk, daut an sull Äten fa de Reis jejäft woaren. Dit wort aula soo jedonen.

²⁶Un see pakten äa Jeträajd opp äare Äsels un veleeten.

²⁷Dan aus see to Nacht stelhilden un eena von an sienen Sak opmuak om sienen Äsel to foodren, sach hee daut Jelt bowen en sienen Sak.

²⁸Un hee säd to siene Breeda: Mien Jelt es hia bowen en mienen Sak. Dit schluach an aula daut see flautaden. Waut haft Gott ons aunjedonen? fruagen see sikj.

²⁹Aus see no äaren Voda Jakob kjeemen en Kanaan, vetalden see am aules waut an jeworden wia. See säden:

³⁰De Gowernia doa räd groff met ons un jleewd wie wieren Spionen en äa Launt.

³¹Un wie säden am daut wie opprechtje Mana wieren un nich Spionen,

³²daut wie twalw Breeda sent von eenen Voda, daut eena wajch es un daut de jinjsta noch tus bie onsen Voda wia en Kanaan.

³³Dan säd de Gowernia to ons: Dit es woo ekj woa weeten daut jie opprechtje Mana sent. Lot eenem von junt Breeda hia bie mie, un nämt Jeträajd fa june hungaje Famieljes un dan go jie no Hus

³⁴un brinjen junen jinjsten Brooda häa. Dan woa ekj junt jleewen, daut jie opprechtich sent un nich Spionen. Dan jäw ekj junen Brooda trigj, un jie kjennen hia wieda kjeepen.

³⁵Un aus see äare Sakj ladich muaken, wia doa en jiedren sien Sak uk sien Pinjel Jelt. Aus see, un uk äa Voda, de Pinjels met Jelt sagen, wieren see jeschloagen.

³⁶Un Jakob, äa Voda, säd: Jie haben mie miene Kjinja wajch jenomen. Josef es nich mea, un nu es Simeon nich mea. Un dan well jie noch Benjamin met nämen. Aules rant jäajen mie.

³⁷Un Ruben säd: Brinj miene beid Junges om, wan ekj am nich trigj brinj. Lot mie fa am oppkomen un ekj woa am trigjbrinjen.

³⁸Oba Jakob säd: Mien Jung woat nich met junt met gonen. Sien Brooda es aul doot, un doa es mau dis eena jebläwen. Wan am irjent waut opp dee Reis woaren sull, wudd ekj truaren bat jie miene greiwe Hoa em Grauf läden.