Read Plautdietsch (Low German) – De Bibel 1. Mose 43 Bible Online

1. Mose 43 - Plautdietsch (Low German) – De Bibel bible

1. Mose 43

¹De Hungaschnoot jeef nich no,

²un aus see dän Väarot, dän see von Ägipten jebrocht hauden opp hauden, säd Jakob to an: Got noch wada un kjeept waut Jeträajd.

³Un Juda säd: De Maun wia sea iernst aus hee ons woarnd daut wie am nich wada seenen wudden, wan wie nich onsen Brooda met ons hauden.

⁴Wan du am latst met gonen, dan go wie Äten kjeepen.

⁵Oba wan du daut nich latst, dan go wie nich. De Maun säd ons: Jie woaren mie nich noch een mol seenen, wan jie nich junen Brooda met haben.

⁶Un Israel säd: Wuarom behaundel jie mie soo schlajcht, daut jie am säden, daut jie noch eenen Brooda hauden?

⁷Un see säden: De Maun fruach ons aules ut äwa ons un onse Famielje, un fruach uk: Läft jun Voda noch? un: Hab jie noch eenen Brooda? Waut wie am säden wia bloos no waut hee fruach. Wie kunnen nich weeten, daut hee sajen wudd: Brinjt junen Brooda häa.

⁸Un Juda säd to sienen Voda Jakob: Vetru mie met dän Jung, un dan kjenn wie gonen, daut wie un du un onse Kjinja läwen kjennen un nich vehungren brucken.

⁹Ekj woa de Birj fa am sennen. Du kaust mie veauntwuatlich hoolen. Wan ekj am nich trigj brinj bat hia ver die, dan woa ekj opp emma schuldich sennen.

¹⁰Wan wie nich eegol oppjeschowen hauden, wia wie aul tweemol han en trigj.

¹¹Schlieslich säd äa Voda, Jakob: Wan daut soo mott sennen, dan doot daut. Nämt von daut baste waut wie hia haben aus een Jeschenkj fa däm Gowernia. Nämt een bät Honnich, waut Maundlen un aundre Näten, un uk waut Kjeen, Mirren un Kjriedarie.

¹²Nämt daut dobbelde Jelt met, daut jie von väajemol betolen kjennen. Daut woat veleicht een Fäla jewast sennen.

¹³Moakt junt reed un nämt junen Brooda un got no däm Maun.

¹⁴Mucht Gott, dee aule Macht haft, junt halpen, daut de Maun junt woat jenstich sennen un junen aundren Brooda un Benjamin woat trigj schekjen. Wan ekj mott von de Kjinja Aufscheet nämen, dan mott ekj äwent.

¹⁵Un de Breeda neemen daut Jeschenkj, daut dobbelde Jelt un Benjamin un reisden auf no Ägipten. Aus see ver Josef kjeemen,

¹⁶un Josef sach daut Benjamin met an wia, säd hee to sienen Deena: Brinj de Mana en mien Hus nenn. Ekj woa vondoag met dise toop Meddach äten. Schlacht een Tia un reed daut fa ons.

¹⁷De Deena deed waut Josef säd un neem de Breeda en Josef sien Hus.

¹⁸De Breeda enjst daut sea, daut see en Josef sien Hus nenn jebrocht worden. See säden: Dit es woll wäajen daut Jelt, woont daut ieeschtemol trigj en onse Sakj nenn jelajcht wia. See brinjen ons hia nenn, daut see ons faust haben, un ons kjennen to Sklowen moaken un onse Äsels wajchnämen kjennen.

¹⁹Un see jinjen no Josef sien Hus un räden doa ver de Däa met däm Huskjnajcht.

²⁰See säden: Wie wieren hia eemol ea toom Jeträajd kjeepen.

²¹Aus wie dan oppem Trigjwajch to Nacht stell hilden un onse Sakj opmuaken, wia doa en jiedrem sien Sak een Pinjel Jelt, soo väl aus wie jetolt hauden. Wie haben daut nu trigj jebrocht,

²²un wie haben aundret Jelt met toom mea Jeträajd kjeepen. Wie weeten nich wäa daut Jelt en onse Sakj nenn jestopt haft.

²³Un hee säd: Siet ruich un enjst junt nich. Jun Gott un de Gott fa junen Voda mott doa eenen Schauz en june Sakj nenn jelajcht haben. Ekj kjrieech dan jun Jelt. Dan brochten see Simeon no an.

²⁴Un aus hee an en Josef sien Hus nenn jebrocht haud, jeef hee an Wota daut see sikj kunnen de Feet wauschen, un foodad uk äare Äsels.

²⁵Un de Breeda muaken äa Jeschenkj fa Josef reed, daut see am daut opp Meddach jäwen kunnen. See hauden vestonen, daut see met am äten wudden.

²⁶Un aus Josef nenn kjeem, brochten de Breeda sien Jeschenkj nenn no am un kjneeden sikj bat de Ieed ver am.

²⁷Dan fruach hee woo daut met an jinkj un säd: Es jun Voda koasch, de Oola Maun von wäm jie väajemol räden? Läft dee noch?

²⁸Un see säden: Dien Kjnajcht, ons Voda, es jesunt, un hee läft noch. Dan kjneeden see sikj wada bat de Ieed ver am.

²⁹Un hee kjikjt an delenjd un sach sienen Brooda Benjamin, dee siene Mutta äa Sän wia, un hee säd: Es dit jun jinjsta Brooda, von däm jie väajemol räden? Mucht Gott goot to die sennen, mien Jung.

³⁰Un Josef jinkj schwind enne aundre Stow un hield doa, wiels hee sikj soo to sienen Brooda freid.

³¹Oba dan wosch hee sien Jesecht un kjeem trigj. Hee hilt sikj stiew un säd: Well wie äten.

³²Josef saut aun eenen Desch un de Breeda aun eenen aundren. De Ägipta dee doa met an eeten, eeten oppoat aun eenen Desch, wiels an wia daut too jemeen met de Hebräa to äten.

³³De Breeda sauten ver Josef un sauten nom ella vom elsten bat däm jinjsten. De Breeda kjikjten sikj unja eenaunda aun un wundaden sikj.

³⁴Un de Breeda wort Äten jebrocht von Josef sienen Desch. Un Benjamin siene Schiew haud fiewmol soo väl aus de aundre. See drunken un eeten sikj saut.