Read Plautdietsch (Low German) – De Bibel 1. Mose 44 Bible Online

1. Mose 44 - Plautdietsch (Low German) – De Bibel bible

1. Mose 44

¹Un Josef säd to däm Deena, dee äwa sien Hus wia: Fell de Mana äare Sakj, soo voll aus see dee nämen kjennen, un laj eenen jiedren sien Jelt bowen en sienen Sak.

²Un sat mien selwanet Kuffel en däm jinjsten sienen Sak met sien Jelt toop. Un dee deed, waut Josef am säd.

³Zemorjes, soo schwind aus daut dach wort, leeten see an met äare Äsels wajchgonen.

⁴Aus see oba noch mau een kortet Enj von de Staut wieren, säd Josef to sienen Deena: Nu schwind, foa de Mana hinjaraun, un wan du an enholst, saj an: Wuarom hab jie goodet met schlajchtet trigjetolt? Wuarom hab jie mienen Harn sien selwanet Kuffel jestolen?

⁵Brukt hee daut nich toom drinkjen? Un brukt hee daut nich toom sajen, waut noch komen woat? Jie haben waut sea schlemmet jedonen.

⁶Un aus hee an enhold, säd hee krakjt dee Wieed to an.

⁷Un see säden: Wuarom rätst du, ons Har, soo to ons? Soont wudden diene Deena oba nienich doonen.

⁸Weetst nich, wie brochten die aul daut Jelt trigj, waut daut ieeschtemol en onse Sakj wia. Woo wudd wie dan doch Selwa ooda Golt nämen von dienen Harn sien Hus?

⁹Wan du daut bie irjent eenen von ons finjst, kaust du däm ombrinjen, un wie woaren aula onsen Har siene Sklowen sennen.

¹⁰Un hee säd: Lot daut soo sennen aus jie jesajcht haben. Dee, en wäm sien Sak ekj daut finj, woat mien Sklow sennen. De äwaje derwen frie gonen.

¹¹Un jieda eena von de Breeda sad sienen Sak oppe Ieed un see muaken dee op.

¹²Hee socht en jieda eenem sien Sak, ieescht dän elsten un dan no de Rieej bat däm jinjsten. Un see fungen daut Kuffel en Benjamin sienen Sak.

¹³De Breeda reeten äare Kjleeda twei, soo veläajen wieren see doaräwa. Un jieda eena lod sienen Äsel wada opp un see jinjen trigj no de Staut.

¹⁴Aus Juda un siene Breeda no Josef sien Hus kjeemen, wia Josef noch emma doa. See kjneeden sikj aula bat oppe Ieed ver am.

¹⁵Un Josef säd to an: Waut hab jie bloos jedonen? Wist jie nich daut soona aus ekj daut seenen kunn waut vestoaken es?

¹⁶Un Juda säd: Mien Har, waut kjenn wie noch sajen? Woo kjenn wie ons rajchtfoadjen? Gott haft onse Schult op jemoakt. Nu sent wie diene Sklowen, wie aula, un dee en wäm sien Sak daut Kuffel jefungen wort.

¹⁷Oba Josef säd: Oba lang nich. Soont wudd ekj nich doonen. Bloos de eena, en wäm sien Sak daut Kuffel jefungen wort, saul mien Sklow sennen. De äwaje von junt kjennen ruich no junen Voda gonen.

¹⁸Un Juda jinkj no Josef un säd: Mien Har, lot dienen Deena, bitscheen, waut sajen. Un sie nich doll wäajen ons. Wie weeten daut du soo aus de Kjennich best.

¹⁹Du fruachst ons emol auf wie eenen Voda un eenen Brooda hauden.

²⁰Un wie säden die: Wie haben eenen oolen Voda un eenen jungen Brooda. De Brooda wia kjlien aus de Voda aul sea oolt wia, eena von twee Säns von äare Mutta, un de aundra Sän es doot. Hee es nu de eensja Sän von dee Mutta, un sien Voda es am sea goot.

²¹Un dan sätst du, daut wie am sullen häa brinjen, daut du am seenen kust.

²²Un wie säden die, daut de Jung nich von sienen Voda jenomen kunn, wiels wan hee wudd, dan wudd de Voda stoawen.

²³Un du sätst, daut wan wie dän nich brochten, dan durw wie die nich wada seenen.

²⁴Un aus wie no onsen Voda kjeemen, säd wie am aules waut du jesajcht hautst.

²⁵Dan aus ons Voda nochmol säd, daut wie sullen gonen Jeträajd kjeepen,

²⁶säd wie: Wie kjennen nich gonen. Wie woaren dän Maun nich emol to seenen kjrieen, wan ons jinjsta Brooda nich met es. Wie gonen bloos wan Benjamin uk met kjemt.

²⁷Un ons Voda säd: Jie weeten, daut miene Fru un ekj twee Säns hauden.

²⁸De eena es aul wajch. Dee es woarschienlich von een Tia veräten, wiels ekj hab am nienich wada jeseenen.

²⁹Wan jie disen uk wajchnämen von mie, un däm waut woat, woa ekj truaren bat jie mie met greiwe Hoa nom Grauf droagen.

³⁰Wan ekj nu no dienen Kjnajcht, onsen Voda, kom, onen dän Jung, opp däm hee sikj sien Läwen stett,

³¹un hee daut sitt, daut de Jung nich met ons es, dan woat dee stoawen. Dan wudd wie, diene Deena, onsen greiw hoajen Voda soo truarich moaken, daut hee stoawen wudd un wie wudden am no sien Grauf droagen motten.

³²Un doatoo, hab ekj mie aus een Birj jejäft fa dän Jung. Ekj säd to mienen Voda: Wan ekj däm Jung nich trigj no die brinj, dan woa ekj läweslank dee Schult ver die droagen.

³³Doawäajen saj ekj nu: Lot mie, dien Deena, bitscheen, aus dienen Sklow bliewen, un lot däm Jung trigj met siene Breeda gonen.

³⁴Woo kaun ekj sest trigj no mienen Voda gonen? Ekj kaun mienen Voda bloos nich soon Leet aundoonen.