Read Plautdietsch (Low German) – De Bibel 1. Mose 46 Bible Online

1. Mose 46 - Plautdietsch (Low German) – De Bibel bible

1. Mose 46

¹Un Jakob pakt aules toop waut hee haud un reisd bat Beerscheba, wua hee Tieren schlacht fa een Opfa fa sienen Voda Isaak sienen Gott.

²Un en dee Nacht räd Gott to Jakob en eene Erfoarunk un säd: Jakob, Jakob. Un hee säd: Hia sie ekj.

³Un hee säd: Ekj sie Gott, dien Voda sien Gott. Enjst die nich no Ägipten to gonen. Ekj woa die derch diene Nokomen doa een grootet Volkj moaken.

⁴Ekj woa met die met no Ägipten gonen, un woa die uk wada trigj brinjen. Un Josef woat doa bie die sennen wan du stoafst.

⁵Un Jakob reisd wieda von Beerscheba. Siene Säns leeten Jakob un äare Frues un Kjinja opp dee Woages reisen, dee de ägiptischa Kjennich doatoo jeschekjt haud.

⁶Un see neemen aul äa Vee un äare Sachen, dee see en Kanaan toopjesaumelt hauden, un kjeemen no Ägipten. Soo kjeemen Jakob un aul siene Nokomen no Ägipten.

⁷Hee brocht siene Säns un Grootsäns, siene Dajchta un Grootdajchta, siene gaunze Famielje met no Ägipten.

⁸Dit sent de Nomes von Jakob siene Säns un Grootsäns, dee no Ägipten kjeemen. Jakob sien elsta Sän es Ruben,

⁹un däm siene Säns sent Henoch, Palu, Hezron, un Karmi.

¹⁰Simeon siene Säns sent Jemuel, Jamin, Ohad, Jachin, Zohar un Schaul, dee een Sän von eene kanaanitische Fru wia.

¹¹Levi siene Säns sent Gerschon, Kehat, un Merari.

¹²Juda siene Säns sent Er, Onan, Schella, Perez, un Serach. Er un Onan storwen aul en Kanaan. Perez siene Säns sent Hezron un Hamul.

¹³Isachar siene Säns sent Tola, Puwa, Jaschub, un Schimron.

¹⁴Sebulon siene Säns sent Sered, Elon, un Jachleel.

¹⁵Dit soo wiet sent Lea äare Säns. See haud eene Dochta, Dina. Dise wieren aula en Mesopotamien jebuaren. Aules toop wieren Jakob un Lea äare Kjinja un Grootkjinja 33 Menschen.

¹⁶Gad siene Säns sent Zifjon, Hagi, Schuni, Ezbon, Eri, Arod, un Areli.

¹⁷Asser siene Säns sent Jimna, Jischwa, Jischwi, Beria, un dan noch äare Sesta Serach. Beria siene Säns sent Heber un Malkiel.

¹⁸Dit sent Jakob un Silpa äare Nokomen, 16 Menschen. Silpa wia de Kjäakjsche dee Laban Lea jeef.

¹⁹Jakob un Rahel äare Säns sent Josef un Benjamin.

²⁰Josef un Asenat hauden en Ägipten twee Säns, Manasse un Efraim. Asenat wia eene Dochta von Potifera, dän Priesta en On.

²¹Benjamin siene Säns sent Bela, Becher, Aschbel, Gera, Naaman, Ehi, Rosch, Muppim, Huppim un Ard.

²²Dit sent de Säns un Grootsäns von Rahel un Jakob, 14 Menschen.

²³Dan sien Sän es Schuham.

²⁴Naftali siene Säns sent Jachzeel, Guni, Jezer, un Schillem.

²⁵Dit sent Jakob un Bilha äare Säns un Grootsäns, 7 Menschen. Bilha wia de Kjäakjsche, dee Laban siene Dochta Rahel jeef.

²⁶Jakob siene Nokomen, dee no Ägipten kjeemen, wieren aules toop 66 Menschen, siene Säns äare Dajchta nich jetalt.

²⁷Josef haud noch twee Säns dee en Ägipten jebuaren wieren. Aul Jakob siene Nokomen, dee en Ägipten wieren, wieren 70 Menschen.

²⁸Jakob schekjt Juda veropp no Josef, daut hee no Goschen komen sull am to trafen. Un aus see no Goschen kjeemen,

²⁹stieech Josef opp sien Kjrichswoagen un fua no Goschen om sienen Voda Jakob doa to trafen. See bejreesten sikj un omoarmden eenaunda un hielden een natet stoot.

³⁰Un Israel säd to Josef: Nu daut ekj die jeseenen hab un weet daut du läfst, sie ekj reed toom stoawen.

³¹Josef säd to siene Breeda un de äwaje von sienen Voda siene Menschen: Nu woa ekj no däm Kjennich gonen un am sajen, daut miene Breeda un aul mien Voda siene Menschen no mie jekomen sent von Kanaan.

³²Ekj woa am sajen, daut jie Hoads sent un daut jie june Schop un jun Vee metjebrocht haben un waut jie sest noch haben.

³³Un wan de Kjennich junt frajcht, waut vonne Oabeit jie doonen,

³⁴dan sajcht am: Wie heeden Vee von dan aus wie kjlien wieren bat nu, wie un onse Vodasch uk. Dan woa jie derwen en Goschen läwen. De Ägipta sent de Schophoad jäajenaun.