Read Plautdietsch (Low German) – De Bibel 1. Mose 47 Bible Online

1. Mose 47 - Plautdietsch (Low German) – De Bibel bible

1. Mose 47

¹Un Josef jinkj no däm Kjennich un säd: Mien Voda un miene Breeda sent von Kanaan jekomen. Dee haben äare Schop un äa Vee, un aules waut see haben, met sikj jebrocht. Nu sent see jrod en Goschen.

²Un hee neem fief von siene Breeda un jinkj met dee nom Kjennich.

³Un de Kjennich säd to an: Waut vonne Oabeit doo jie? Un see säden am: Wie sent Schophoad, krakjt soo aus onse Vodasch ver ons wieren.

⁴Wie sent no dit Launt jekomen, wiels doa nich Weid fa ons Vee en Kanaan es, un de Hungaschnoot soo schlemm es. Wie wenschen daut du ons leetst en Goschen wonen.

⁵Un de Kjennich säd to Josef: Ekj see daut dien Voda un diene Breeda jekomen sent!

⁶Du hast de Macht äwa gaunz Ägipten. Lot an opp daut baste Launt aunsiedlen. Lot an wellich en Goschen wonen. Un wan doa waut goode Hoad mank an sent, dan stal dee äwa mien Vee.

⁷Un Josef brocht sienen Voda Jakob no däm Kjennich un stald am väa. Un Jakob bejreest däm Kjennich met eenen Säajensgruss.

⁸Un de Kjennich säd to Jakob: Woo oolt best du?

⁹Un Jakob säd am: Ekj hab aul 130 Joa jepiljat. Daut sent schwoare, un nich sea väl Joaren fa mie jewast. Ekj hab nich soo lang jeläft aus mien Voda un Grootvoda en äare Tiet.

¹⁰Un Jakob spruak eenen Säajen äwa däm Kjennich un neem Aufscheet von am.

¹¹Un Josef leet sienen Voda un Breeda de baste Jäajent em Launt haben. Hee jeef an Launt bie Ramses, soo aus de Kjennich jesajcht haud.

¹²Un Josef sach doano, daut sien Voda un siene Breeda jenuach to äten hauden, eenen jiedren doano woo groot siene Famielje wia.

¹³Un doa wia nich jenuach to äten en Ägipten un Kanaan wäajen de schlemme Hungaschnoot. De Lied leeden unja de Noot.

¹⁴Un doaderch daut hee daut Jeträajd vekoft, saumeld Josef aul daut Jelt, waut see en Ägipten un Kanaan hauden. Un Josef leet daut fa dän Kjennich oppspikjren.

¹⁵Un aus daut Jelt aula wort en Ägipten un Kanaan, kjeemen aule Ägipta no Josef un säden: Jeff ons to äten. Wuarom sell wie hia jrodsoo ver die vehungren? Ons Jelt es aula wajch.

¹⁶Un Josef säd: Brinjt mie jun Vee un ekj woa junt doafäa Äten jäwen, wan jie nich mea Jelt haben.

¹⁷Un dan brochten see äare Pieed, Schop, Vee, un Äsels no Josef. Un daut Joa jeef hee an doafäa äten.

¹⁸Un dan daut näakjste Joa kjeemen see no am un säden: Daut es kjeen Jeheemnis daut wie ons Jelt vebrukt haben. Daut es kloa to seenen daut wie nuscht haben aus onse Kjarpasch un ons Launt.

¹⁹Lot ons hia nich jrodsoo stoawen un lot ons Launt nich vedoawen. Kjeep ons un ons Launt un jeff ons doafäa Äten. Wie woaren däm Kjennich siene Sklowen sennen un hee kaun daut Launt haben. Un jeff ons uk Sot daut wie de Flekja beakren kjennen, soo daut daut Launt nich wilt bewaussen woat, un daut wie läwen kjennen un nich stoawen brucken.

²⁰Un Josef koft aul daut Launt en Ägipten fa dän Kjennich. Aule Ägipta vekoften äa Launt, wiels de Hungaschnoot soo groot wia, un de Kjennich koft daut aula opp.

²¹Un de Menschen en Ägipten, von een Enj bat daut aundre Enj, worden däm Kjennich siene Sklowen.

²²Daut eensje Launt, waut hee nich oppkoft wia de Priesta äa Launt. De Priesta kjrieejen een Loon vom Kjennich un brukten äa Launt nich vekjeepen.

²³Un Josef säd to de Menschen: Vondoag hab ekj junt un jun Launt fa däm Kjennich jekoft. Ekj woa junt nu Sot jäwen, daut jie akren kjennen.

²⁴Vonne Arnt sell jie daut fefte Poat däm Kjennich trigj jäwen, un vea feftel kjenn jie hoolen to Sot un toom äten fa junt un june Famieljes.

²⁵Un de Menschen säden: Du hast ons daut Läwen jerat. Wan du envestonen best woa wie däm Kjennich siene Sklowen sennen.

²⁶Un Josef fieed daut em Jesaz en, daut de Kjennich daut fefte Poat von de Arnt kjrieech. Daut Jesaz steit vondoag noch en Ägipten. Bloos de Priesta brukten nich daut fefte Poat aufjäwen.

²⁷Un de Israeliten wonden en Ägipten en de Goschen Jäajent. See buaden goot un vemieeden sikj sea.

²⁸Un Jakob läwd noch 17 Joa en Ägipten. Aules toop wort hee 147 Joa oolt.

²⁹Aus Israel meend daut hee stoawen kunn, roopt hee Josef, un säd to am: Wan ekj goot aunjeseenen sie ver die, dan laj diene Haunt unja miene Hoft un jeff mie dien vollet Vespräakjen, daut du tru woascht sennen un daut du mie truhoatje Leew bewiesen woascht, un daut du mie nich woascht en Ägipten begrowen.

³⁰Ekj well met miene Väavodasch begroft woaren. Nemm mie trigj no Kanaan un begrow mie wua dee begroft sent.

³¹Vespräakj mie dit met eenen Eit. Un Josef vespruak am daut met eenen Eit. Un Israel kjneed sikj em Jebäd.