Read Plautdietsch (Low German) – De Bibel 1. Mose 49 Bible Online

1. Mose 49 - Plautdietsch (Low German) – De Bibel bible

1. Mose 49

¹Un Jakob kroagd siene Säns toop un säd: Komt emol aula toop, soo daut ekj junt sajen kaun, waut junt noch woaren saul.

²Komt toop un horcht, miene Säns, horcht no junen Voda, Israel.

³Ruben, mien ieeschtjebuarna, du best miene Krauft, de ieeschta Bewies von miene Macht; du hast de jratste Iea un jratste Krauft.

⁴Du deist äwaschelpsen soo aus Wota; doch woascht nich daut jratste sennen, wiels du en dien Voda sien Bad jinjst, un doa hast Schaund jedräwen.

⁵Simeon un Levi sent een Poa, dee gonen met Jewault omhäa.

⁶Ekj woa nich met an toop plonen, un woa nich met an toop gonen. Em Oaja brinjen see wäm om, un kjwälen de Bolles em Spos.

⁷Lot Trubbel opp an komen, wäajen äaren grausomen Oaja un uk äare ommenschelje Wutt. Ekj woa junt derch daut gaunze Israel vespreeden.

⁸Die, Juda, woaren diene Breeda lowen; du woascht diene Fiend biem Jenekj hoolen, dien Voda siene Säns woaren sikj ver die kjneeen.

⁹Juda, du best soo aus een junga Leiw, dee emma met waut von de Jacht kjemt; Du lajchst die bie dien Raup dol, un kjeena woacht sikj dicht bie.

¹⁰De Kjennichstock woat nich von Juda jenomen, sien Rejierungs Stock woat nich veschwinjen, bat de Rajchtschuldja kjemt. Däm woaren de Velkja ieren.

¹¹Hee binjt sienen Äsel aun de Wienrank, un sienen jungen Äsel aun de baste Rank; hee wauscht siene Kjleeda en Wien un sienen Rock en Wiendruwensauft, soo aus Bloot.

¹²Siene Uagen sent dunkla aus Wien un siene Tänen witta aus Malkj.

¹³Sebulon woat biem Mäa wonen; hee woat een Howen fa Schäp sennen; sien Launt rieekjt bat Sidon.

¹⁴Isachar es een stoakja Äsel, dee tweschen twee Schop Hocks licht.

¹⁵Hee sach daut et eene scheene Städ wia, un daut doa goot to reiwen wia. Du jefst die unjare schwoare Oabeit, un motst aus een Sklow deenen.

¹⁶Dan woat siene Menschen rechten, aus eena von de Stam von Israel.

¹⁷Dan woat eene Schlang biesied däm Wajch sennen, eene jeftje Schlang biesied däm Stich, dee de Pieed enne Haken bitt, soo daut de Ritta äwarigj jeschmäten woat.

¹⁸Ekj wacht, HAR, daut du halpen woascht.

¹⁹Gad woat von Reiba Baunden beplindat woaren, un hee woat an beplindren.

²⁰Asser sien Launt woat goot droagen, un Äten fa däm Kjennich jäwen.

²¹Naftali es aus eene loosjelotne Reekoo, un haft schmocke Junge.

²²Josef es een fruchtboara Aust, dee bie eene Wotakjwal waust un siene Asta äwa de Mia strakjt.

²³Dee waut met Boages un Feilen scheeten, saden am en Jefoa; dee schooten ut Oaja no am.

²⁴Oba sien Boagen jeef nich no, un siene Oarms bleewen stoakj met de Help von Jakob sienen stoakjen Gott, met de Help von däm Hoad, dee Israel Schutz jeft.

²⁵Dien Voda sien Gott woat die halpen, dee waut aule Macht haft woat die säajnen, met Säajnungen vom Himmel bowa die, met Säajnungen von deep enne Ieed, met Säajnungen von jesunde Kjinja.

²⁶Dien Voda siene Säajnungen sent jrata aus de Frucht von de eewje Boaj, un aus de Säajnungen von de sea oole Boaj. Dee woaren opp Josef sienen Kopp sennen, un oppem Stiern von däm, dee oppoat jesat wia von siene Breeda.

²⁷Benjamin es een rietenda Wulf, dee em Morjen sien Raup frat, un em Owent daut Äwabliefsel wieda jeft.

²⁸Dit sent de twalw Stam en Israel, un dit es de Säajen met woonen äa Voda eenen jiedren sienen besondren Säajen jeef.

²⁹Un Jakob bestald aun an: Wan ekj nu stoawen woa, dan begroft mie met miene Vodasch en de Heel opp de Stap, dee von däm Hetita, Efron, jekoft wia;

³⁰en de Heel opp daut Flekj bie Machpela, oosten von Mamre, en Kanaan. Daut haft je Abraham aula toop von däm Hetita, Efron, jekoft, aus een Graufhoff.

³¹Doa haben see Abraham un siene Fru Sara begroft; un doa haben see Isaak un siene Fru Rebecka begroft; un doa begrowd ekj Lea.

³²Dee Stap un de Heel waut doa es, wieren von de Hetita jekoft.

³³Aus Jakob utjerät haud, läd hee sikj dol, un storf. Soo wia daut aus hee no siene Väavodasch jinkj.