Read Plautdietsch (Low German) – De Bibel 1. Mose 6 Bible Online

1. Mose 6 - Plautdietsch (Low German) – De Bibel bible

1. Mose 6

¹Aus de Menschen sikj oppe Ieed vemieeden un see Dajchta hauden,

²neemen de Säns von de Jetta soone Mejales von mank de Menschen aus an schmock leeten, un befrieden sikj met dee.

³Un de HAR säd: Ekj woa däm Mensch nich opp emma läwen loten, hee es doch Fleesch. Ekj woa am 120 Joa läwen loten.

⁴To dee Tiet, un uk lota, wieren doa Nefiliten oppe Ieed, dee doa Nokomen wieren von de Säns von de Jetta un Frumenschen. Lang trigj wieren daut stoakje un huach aunjeseene Mana.

⁵De HAR sach daut de Menschen sea bees oppe Ieed wieren un daut äare Jedanken bloos dän tietäwa schlajchte Jedanken wieren.

⁶Un däm HARN deed daut leet daut hee haud Menschen oppe Ieed jemoakt. Am wia daut sea schod.

⁷Un hee säd: Ekj woa dise Menschen, waut ekj jemoakt hab von oppe Ieed utrodden. Ekj woa Menschen un aule Tieren un Väajel utrodden, soo schod es mie daut, daut ekj an jemoakt hab.

⁸Oba Noah wia goot aunjeseenen biem HARN.

⁹Dit es de Jeschicht von Noah. Noah wia een jerajchta Maun; kjeena kunn am en siene Tiet beschuljen. Noah läwd en Jemeenschoft met Gott.

¹⁰Noah haud dree Säns. Dee heeten Sem, Ham, un Jafet.

¹¹Un Gott sach woo bees de Menschheit wia, un daut de Ieed voll von orrajchtet un onbandjet Läwen wia.

¹²Hee sach daut aule Menschen oppe Ieed schaundhauft läwden.

¹³Un Gott säd to Noah: Ekj hab bie mie beschloten met aule Menschen un Tieren een Enj to moaken. De gaunze Ieed es voll von äa onbandjet Läwen. Nu woa ekj an ombrinjen un een Enj met de Ieed moaken.

¹⁴Du saust nu een grootet Schepp von goodet Holt buen. Doa sellen miere Stowen bennen sennen, un von buten un von bennen saust du daut met Pekj beschmäaren.

¹⁵Du saust daut Schepp 150 Meeta lank, 25 Meeta breet, un 15 Meeta huach moaken.

¹⁶Moak een Dak opp daut Schepp, een haulwet Meeta hecha aus de Sieden. Moak eene Däa aun de Sied, un bu doa dree Fluaren nenn.

¹⁷Doo dit, wiels ekj eene Äwaschwamunk woa komen loten. Dee woat aule Menschen un Tieren met läwendjen Odem oppe Ieed un unjarem Himmel ombrinjen.

¹⁸Met die, oba, woa ekj een Bunt moaken un die en daut Schepp nenn nämen. Ekj woa die un diene Säns, un diene Fru, un diene Säns äare Frues en daut Schepp nenn nämen.

¹⁹Un du saust von jieda Sort Tieren, emma twee en daut Schepp nenn brinjen. Soo woaren dee aum Läwen bliewen. Doa sellen emma een hee en eene see von jieda Sort sennen.

²⁰Twee von jieda Sort Väajel, twee von jieda Sort Tieren, un twee von jieda Kruptia sellen no die komen, daut du dee aum Läwen helst.

²¹Nemm uk von jieda Sort Fooda un spikja daut opp, daut doa woat to äten sennen fa an un fa die.

²²Un Noah deed aules waut de HAR am väajesajcht haud.