Read Plautdietsch (Low German) – De Bibel 2. Samuel 1 Bible Online

2. Samuel 1 - Plautdietsch (Low German) – De Bibel bible

2. Samuel 1

¹Aus David trigjekomen wia von sien Siech äwa de Amalekita, bleef hee noch twee Doag en Ziklag, onen daut hee waut von Saul sien Doot to hieren kjrieech.

²Dan aum dredden Dach kjeem doa met eemol eent von Saul siene Mana. Däm sien Kjleet wia opjeräten un hee haud Ieed oppem Kopp. Hee jinkj no David un schmeet sikj ver am oppe Ieed un kjneed sikj ver am.

³Un David säd to am: Von wua best du jekomen? Un hee säd: Ekj sie von de israelitische Armee wajch jerant.

⁴Un David säd to am: Kaust du mie sajen, woo daut jegonen es? Un de Maun säd: De Armee es vom Kaumf jerant, un doa sent een deel Doodes. Un Saul un sien Sän Jonatan sent uk doot.

⁵Un David säd to dän jungen Maun: Woo weetst du daut Saul un sien Sän Jonatan doot sent?

⁶Un de junga Maun, dee dit vetald, säd: Weetst, ekj wia don jrod opp däm Boajch Gilboa. Un doa sach ekj Saul opp sien Spies nopp jelänt. Un de Filista äare Kjrichswoages un Ritta dicht bie.

⁷Un Saul kjikjt sikj rom un sach mie un roopt mie. Un ekj säd: Waut kaun ekj fa die doonen?

⁸Un hee säd to mie: Wäa best du? Un ekj säd: Ekj sie een Amalekita.

⁹Un dan säd hee to mie: Komm bat hia, un schlo mie doot. Ekj sie schlemm vewunt, oba ekj sie noch nich doot.

¹⁰Un dan jinkj ekj no am, un ekj schluach am doot. Ekj wia mie secha, daut hee nich lang läwen kunn, wäajen siene Wunden. Un ekj neem de Kroon von sien Kopp un dän Oarmbaunt von sien Oarm un hab die, mien Harn, dee jebrocht.

¹¹Dan kjrieech David sienen Rock to hoolen un reet dän op en Trua. Un aul de Mana met am deeden krakjt daut selwje.

¹²See truaden un hielden äwa Saul un sienen Sän Jonatan, un äwa daut Volkj Israel, däm HARN sien Volkj, wiels de Kjrich soo wia jäajen an jegonen. Un see eeten nuscht bat Owent.

¹³Un David säd to dän jungen Maun, dee am de Norecht jebrocht haud: Von wua kjemst du? Un dee säd: Ekj sie een Amalekita sien Sän, dee mank de Israeliten wont.

¹⁴Un David säd to am: Woo kjemt daut, daut du die nich enjst däm HARN sienen Jesaulwden doottomoaken?

¹⁵Un David säd to eent von siene junge Mana: Schlo däm doot. Un dee deed daut.

¹⁶Un David säd äwa däm: Du hast die dän Doot vedeent. Du sätst selfst, daut du dän HARN sienen Jesaulwden dootjeschloagen hautst.

¹⁷Un David truad äwa Saul un Saul sienen Sän Jonatan met dit Trualeet.

¹⁸Hee bestald daut de Lied en Juda dit sull jelieet woaren. Dit Trualeet es en daut Jaschar Buak oppjeschräwen:

¹⁹Oo Israel! Onse Leidasch sent en de Boaj jefollen; Onse baste Mana sent doot.

²⁰Sajcht daut nich en Gat un moakt daut nich bekaunt opp de Gaussen en Aschkelon; daut de Dajchta von jane onbeschnädne Filista sikj nich äwa ons freien.

²¹Jie Boaj en Gilboa, mucht doa kjeen Deiw ooda Räajen opp junt faulen, un kjeene fruchtboare Stapen opp junt sennen, wiels doa es daut Schilt von onse Leidasch veschmäten, un doa es Saul sien Schilt nich mea met Eelj jeräwen.

²²Jonatan haft nich met sienen Boagen oppjejäft wan doa uk Doodes rom am wieren; un Saul sien Schwieet haft nich vejäfs jeschloagen, wan de Fient uk stoakj wia.

²³Saul un Jonatan, woo beleeft un aunjeseenen, emma schauften see toop, em Läwen un em Doot; See wieren fekjsa aus Odlasch un stoakja aus Leiws.

²⁴Jie Frulied en Israel, hielt äwa Saul, hee jeef junt schmocke roode Kjleeda, un jeef junt goldne Spalden doaraun.

²⁵Onse baste Mana sent medden en däm Kaumf jefollen, Jonatan es opp dienen Boajch jestorwen.

²⁶Daut es mie sea schod, mien Brooda Jonatan. Du wieescht mie sea väl wieet; diene Leew es mie väl wieet jewast, mea aus de Leew von eene Fru.

²⁷Onse baste Mana sent jefollen. Onse baste Kjrieja sent doot.