Read Plautdietsch (Low German) – De Bibel 2. Samuel 16 Bible Online

2. Samuel 16 - Plautdietsch (Low German) – De Bibel bible

2. Samuel 16

¹Aus David een bätje wieda aus de Spetz vom Boajch jegonen wia, troff hee Ziba, Mefi Boschet sien Oabeida. Dee kjeem met miere Äsels un brocht am 200 Brood, 100 Pungels Rasienen, 100 Kjarw fresche Frucht, un een Wienlada voll Wien.

²Un de Kjennich säd to Ziba: Wuarom hast du dit jebrocht? Un Ziba säd: De Äsels sent fa die un diene Menschen toom rieden. Daut Broot un fresche Frucht es fa junt toom äten. Un de Wien es toom drinkjen, fa dee waut en de Wiltnis ommaklich woat.

³Un David säd: Wua es Mefi Boschet, dien Har, däm Kjennich Saul, sien Grootsän? Un Ziba säd: Dee es en Jerusalem jebläwen. Hee jleeft daut hee vondoag woat sienen Grootvoda Saul sien Kjennichrikj trigj kjrieen.

⁴Un de Kjennich säd to Ziba: Aules waut Mefi Boschet sient es saul dient sennen. Un Ziba kjneed sikj ver David un säd: Muchst du mie emma soo jenstich aunseenen kjennen, mien Har un Kjennich.

⁵Aus David no Bahurim kjeem, bejäajend hee Schimi, Gera sienen Sän. Daut wia eent von Saul siene Aunjehieeje, un dee flieekjt aus hee am entjäajen kjeem.

⁶Hee schmeet Steena no David un siene Mana. David haud siene Wajchta un aul siene Menschen un de aunjestalde en de Armee runtom sikj.

⁷Un en sien Jeflieekj säd Schimi: Go wieda! Schekj die du Merda, un Vebräakja!

⁸De HAR tolt die trigj fa aul de Menschen, dee du en Saul siene Famielje omjebrocht hast, un en wäm siene Städ du rejieescht! De HAR haft dien Rikj en Absalom siene Macht jejäft un du woascht enne Grunt komen, du Merda!

⁹Dan säd Abischai, Zeruja äa Sän, toom Kjennich: Wuarom sull dis Hunt mienen Harn un Kjennich soo utflieekjen? Lot mie gonen un sien Kopp aufhaken.

¹⁰Oba de Kjennich säd: Wuarom sull ekj no die un Joab horchen? Wan hee mie flieekjt, wäajen de HAR am daut jejäft haft, dan saul kjeena froagen wuarom hee daut deit.

¹¹Un David säd to dee rom am: Kjikjt emol. Mien ieejna Sän steit mie no daut Läwen. Dan lot junt daut nich wundren daut dis Benjaminita uk deit. Lot am toch un lot am flieekjen. De HAR haft am daut oppjejäft.

¹²Veleicht woat de HAR mie en mienen Trubbel seenen, un mie goodet jäwen en de Städ von dit Jeflieekj vondoag.

¹³Soo jinjen David un siene Menschen delenjd däm Wajch, un Schimi jinkj aun de aundre Sied vom Tol un flieekjt, un schmeet met Steena un Ieed.

¹⁴De Kjennich un dee waut met am wieren, wieren meed aus see bat daut Jordan Tol kjeemen. Doa vepusten see sikj.

¹⁵Absalom un siene Menschen, de Israeliten, jinjen en Jerusalem nenn. Ahitofel wia met am.

¹⁶Un aus Huschai de Arkita, David sien Frint, no Absalom kjeem säd hee to Absalom: Ons Kjennich! Opp emma! Ons Kjennich! Opp emma!

¹⁷Un Absalom säd to Huschai: Es dit woo tru du to dien Frint best? Wuarom best du nich met dienen Frint jegonen?

¹⁸Un Huschai säd to am: Nä. Ekj sie met däm, däm de HAR un dit Volkj, de Israeliten aus Kjennich wälen. Däm deen ekj, un met däm woa ekj bliewen.

¹⁹Wäm sull ekj deenen wan nich mienen Harn sienen Sän? Ekj woa die soo deenen aus ekj dienen Voda jedeent hab.

²⁰Dan säd Absalom to Ahitofel: Jeff emol dienen Rot. Waut sell wie nu doonen?

²¹Un Ahitofel säd to Absalom: Go nenn no dien Voda siene Näbenfrues dee noch en däm Paulaust sent. Dan woat daut gaunze Israel hieren daut dien Voda die aus eenen Fient sitt, un dee waut met die sent woaren mootich sennen.

²²Un see stalden oppem Dak een Zelt opp, un Absalom jinkj doa met sienen Voda siene Näbenfrues nenn soo daut aulemaun daut wist.

²³En dee Doag wia Ahitofel sien Rot aunjeseenen aus wan een Wuat von Gott kjeem. Beid David un Absalom horchten doano.