Read Plautdietsch (Low German) – De Bibel 2. Samuel 21 Bible Online

2. Samuel 21 - Plautdietsch (Low German) – De Bibel bible

2. Samuel 21

¹Doa kjeem emol, to David siene Tiet, eene Hungaschnoot, dee fa dree gaunze Joa aunhilt. Un David fruach däm HARN doawäajen, un de HAR säd: Saul un siene Famielje haben Schult aun Bloot vejeeten von don aus see de Lied von Gibeon ombrochten.

²De Gibeonita wieren nich Israeliten; see staumden von dee waut von de Amorita äwajebläwen wieren, un de Israeliten hauden an vesproaken to veschoonen. Oba Saul haud dee vesocht auftoschaufen en sienen Iewa fa Israel un Juda. Un David leet de Gibeonita ver am komen.

³Hee säd to an: Waut saul ekj fa junt doonen? Woo kaun ekj daut trajchtstalen met junt, daut jie däm HARN sien Volkj säajnen woaren?

⁴Un de Gibeonita säden: Wie velangen nich Selwa ooda Golt om daut trajcht to stalen tweschen Saul un siene Famielje un ons. Wie sieekjen uk nich no daut Läwen von Israeliten. Un de Kjennich säd: Waut well jie dan haben daut ekj fa junt doo?

⁵Un see säden toom Kjennich: Saul stunt ons no daut Läwen un wull ons von mank de Israeliten utroden.

⁶Jeff ons säwen von siene Säns, un lot ons dee ver däm HARN bie Gibeon opp däm HARN sien Boajch henjen. Un de Kjennich säd: Dee sell jie haben.

⁷Doch veschoond David Mefi Boschet, dän Sän von Saul sienen Sän Jonatan, wäajen dän Eit dän David met Saul sienen Sän Jonatan ver däm HARN jemoakt haud.

⁸De Kjennich jeef an Armoni un Mefi Boschet, Saul un Rizpa äare Säns. Rizpa wia Aja siene Dochta. Un hee jeef an de fief Säns von Saul siene Dochta Merab un äa Maun Adriel. Adriel wia Barsillai von Mehola sien Sän.

⁹David jeef dise äwa no de Gibeonita, un dee hongen dee, opp däm Boajch ver däm HARN. De Säwen storwen tojlikj. Daut wia aum Aunfank von de Joascht Arnt.

¹⁰Dan jinkj Rizpa, Aja siene Dochta, un läd waut Sakkjleeda opp dän Steen wua de Doodes lagen. See bleef doa vom Aunfank von de Arnt bat de Räajentiet kjeem, un see bemieejd sikj doa de Väajel äwadach von wajch to hoolen un de wille Tieren en de Nacht.

¹¹Aus David hieed waut Saul siene Näbenfru, Rizpa, Aja siene Dochta, deed,

¹²leet hee Saul un Jonatan äare Knoakes von Jabesch en Gilead brinjen. De Mana von Jabesch en Gilead hauden dee von medden en de Staut Bet Schean jestolen, wua de Filista an jehongen hauden no däm aus Saul en Gilboa dootjemoakt wort.

¹³Hee brocht de Knoakes von Saul un von däm sien Sän Jonatan, un uk de Knoakes von de Säwen dee jehongen wieren.

¹⁴Un see begrowden dee en de Staut Zela en daut Benjaminlaunt en Saul sien Voda Kisch sien Grauf. Dit wia aula opp David sien Wuat. Un no däm auntwuad Gott de Lied äa Jebäd fa daut Launt.

¹⁵Doa wia don noch een Kjrich tweschen Israel un de Filista. Un David jinkj met siene Soldoten toop un see kjamften met de Filista. Un David wort meed,

¹⁶un Jischbi Benob, eent von de Filista, wull David aufschaufen. Jischbi Benob wia een Nokomen von de Riesen un haud eenen bronsnen Spies, dee äwa dree Kilo wuach, un een nieet Schwieet.

¹⁷Oba Abischai, Zeruja äa Sän, kjeem am halpen un kunn dän Filista dol kjrieen un aufschaufen. Dan bedwungen David siene Mana am daut hee nienich wada wudd en däm Kaumf met an komen, wiels wan see am veluaren, wudd daut sea schlemm fa Israel sennen.

¹⁸Dan wia doa noch een Kjrich met de Filista bie Gob. Doa schluach Sibbechai, de Huschatita, dän Saf doot, dee uk eent von de Nokomen von de Riesen wia.

¹⁹Dan wia noch eemol een Kaumf met de Filista bie Gob. Un Elhanan, Jair von Betlehem sien Sän, schluach Goliat dän Gatita doot. De Spies, dän Goliat druach, wia soo lank aus een Wäwa sien Jestal.

²⁰Un noch wada wia doa een Kaumf bie Gat. Doa wia een butajeweenlich groota Maun, een Ries, dee sas Finjasch aun jieda Haunt un sas Teeen aun jieda Foot haud.

²¹Aus hee Israel trotzen deed, jinkj Jonatan, Schama sien Sän am doot schlonen. Schama wia David sien Brooda.

²²Dise vea wieren Nokomen von de Riesen en Gat, un dee worden von David un siene Mana aufjeschauft.