Read Plautdietsch (Low German) – De Bibel 2. Samuel 3 Bible Online

2. Samuel 3 - Plautdietsch (Low German) – De Bibel bible

2. Samuel 3

¹Dan wia doa eene lange Tiet, wua dee waut Saul siene Famielje unjastetten deeden, met dee kjriejen deeden, waut David siene Famielje unjastetten. Un David siene Sied wort stoakja un stoakja, un Saul siene wort schwaka un schwaka.

²Un en Hebron haud David waut Säns. Sien ieeschtjebuarna wia Amnon von Ahinoam von Jesreel.

³Un sien tweeda Jung wia Kilab, von Abigajil, dee Nabal von Karmel siene Fru jewast wia. Un sien dredda Sän wia Absalom, von Maacha, däm Kjennich Talmai von Geschur siene Dochta.

⁴Un sien vieeda Sän wia Adonija, dän David von siene Fru Hagit haud; un de fefta wia Schefatja, von siene Fru Abital;

⁵un de sasta wia Jitream von David siene Fru, Egla. Dise worden David en Hebron jebuaren.

⁶Un en dee Tiet, aus dee waut Saul siene Famielje unjastetten deeden, met dee kjriejden, waut David siene Famielje unjastetten deeden, wort Abner sea stoakj mank dee, waut Saul siene Famielje unjastetten.

⁷Saul haud eene Näbenfru jehaut, dee Rizpa heet. See wia Aja siene Dochta. Un Isch Boschet säd to Abner: Wuarom hast du die met mien Voda siene Näbenfru aufjejäft?

⁸Un Abner jefoll daut sea schlajcht daut Isch Boschet, soo to am räd, un hee säd: Sie ekj een Hunt von Juda dee hia romschneflen kjemt? Hia sie ekj tru to dien Voda Saul un siene Breeda un Frind, un hab die nich en David siene Henj jejäft, un dan kjemst du un vekloachst mie wäajen eene Fru?

⁹Lot Gott mie bestrofen, wan ekj daut nich soo doo aus de HAR David daut opp eenen Eit vesproaken haft,

¹⁰daut Saul sien Rikj no David jeit, un David Kjennich woat äwa Israel un Juda von Dan bat Beerscheba.

¹¹Un Isch Boschet haud kjeen Wuat mea fa Abner, wiels hee Angst fa am haud.

¹²Dan schekjt Abner Mana no David en Hebron un leet am sajen: Wäm sien Launt es dit? Moak eenen Bunt met mie un dan woa ekj die halpen, soo sea aus ekj kaun, om daut gaunze Israel en dien Rikj nenn to brinjen.

¹³Un David leet am weeten: Daut es goot. Ekj woa een Bunt met die moaken; oba opp eene Bedinjunk. Lot mie die nich seenen ea du mie Michal, Saul siene Dochta, trigjbrinjst.

¹⁴Dan schekjt David Mana no Isch Boschet, Saul sienen Sän, un leet sajen: Jeff mie miene Fru, Michal, fa dee ekj met de Väahut von 100 Filista betolt hab.

¹⁵Un Isch Boschet schekjt Mana om Michal von äaren Maun, Paltiel, Lajisch sien Sän, to holen.

¹⁶Äa Maun jinkj met ar gaunz bat Bahurim, un hee hield dän wajchäwa wäajen ar. Dan säd Abner to am: Nu go trigj. Un hee jinkj trigj.

¹⁷Un Abner räd met de Leidasch en Israel un säd: Jie haben nu aul eene Tietlank wult David aus junen Kjennich haben.

¹⁸Doot daut nu! De HAR haft David vesproaken: Derch mienen Deena, David, siene Macht woa ekj de Israeliten von de Filista äare Macht un von de Macht von aul äare Fiend raden.

¹⁹Un Abner räd met däm Staum Benjamin, un dan jinkj hee no David en Hebron un säd am waut Israel un de Staum Benjamin wenschten.

²⁰Aus Abner soo met 20 Mana no David en Hebron kjeem, muak David eene groote Moltiet fa Abner un dee waut met am wieren.

²¹Un Abner säd to David: Ekj woa romgonen un daut gaunze Israel hinja die, mien Har un Kjennich, saumlen, daut see woaren eenen Bunt met die moaken, un du äwa aules rejieren kaust, waut dien Hoat wenscht. Doamet schekjt David Abner opp siene Oabeit, un hee jinkj frädlich wieda.

²²Oba jrod don kjeemen Joab un eene Grupp von David siene Mana trigj von wua see wäm äwafollen hauden. See hauden väl Sachen trigj jebrocht, dee see en dän Kjrich jewonnen hauden. Abner wia oba aul wajchjegonen von David en Hebron, wiels David am jeschekjt haud. Un hee wia frädlich wiedajegonen.

²³Aus Joab un de gaunze Armee, dee met am wieren, trigj kjeemen, wort Joab jesajcht: Abner, Ner sien Sän, kjeem no däm Kjennich, un de Kjennich haft am gonen loten. Hee es frädlich wajchjegonen.

²⁴Dan jinkj Joab no däm Kjennich un säd: Waut hast du jedonen? Abner es hia bie die jewast un du hast am jrodsoo gonen loten! Wuarom hast du daut jedonen?

²⁵Du weetst doch daut Abner, Ner sien Sän, es jekomen die hinjat Licht to fieren. Hee kjeem to spionen, woo du foadich worscht un bäta om die omtoweeten.

²⁶Un aus Joab utjerät haud met David, schekjt hee Mana om Abner trigjtoholen. See troffen am bie Bor Sira un brochten am trigj. Oba David wist doa nuscht von.

²⁷Aus Abner don trigj no Hebron kjeem, neem Joab am tosied biem Puat, aus wan hee unja vea Uagen met am räden wull. Un doa schneet hee Abner sien Buck opp. Soo wort hee fa Asael, Joab sien Brooda, sienen Doot omjebrocht.

²⁸Lota aus David daut hieed, säd hee: Ekj un mien Rikj sent gaunz onen Schult ver däm HARN en däm Doot von Abner, Ner sien Sän.

²⁹Mucht de Schult opp Joab un sienen Voda siene Nokomen faulen. Muchten Joab siene Nokomen nienich onen wäm sennen, däm waut kjietat ooda sien Fleesch vefräten woat, ooda wäa bloos Fruesoabeit doonen kaun, ooda wäa vom Schwieet jestorwen es, ooda dee nich jenuach to äten haft.

³⁰Soo wia daut, daut Joab un sien Brooda Abischai Abner aufschauften, wäajen Abner äaren Brooda Asael bie däm Kaumf bie Gibeon doot muak.

³¹Un David bestald daut Joab un een jieda eena von de Mana, waut met am wieren, sull sikj dän Rock opprieten un een Sak äwatrakjen un fa Abner truaren. Kjennich David jinkj daut ieeschte hinja daut Soakj.

³²Un see begrowden Abner en Hebron. De Kjennich truad lud un hield bie Abner sien Grauf. Un daut gaunze Volkj truad.

³³De Kjennich spruak sien Trua ut met dise Wieed: Wuarom sull Abner soo oschuldich stoawen?

³⁴Diene Henj wieren nich faustjebungen; diene Feet wieren nich enjekjlamt; du storfst soo aus en de Henj von beese Menschen. Un aule Menschen hielden wieda äwa am.

³⁵Un aule Menschen wullen David beräden aul ver diesta, daut hee sull Broot äten, oba hee vespruak opp een Eit: Mucht Gott mie bestrofen, un krakjt eendoont woo strenj, wan ekj Broot ooda sest irjent waut schmakj ea de Sonn unjajeit.

³⁶Un daut Volkj horcht no am un an jefoll daut, un aules waut de Kjennich deed jefoll aule Menschen.

³⁷Soo leet de Kjennich dän Dach daut Volkj weeten, daut hee nich Abner sien Doot jewult haud.

³⁸Un de Kjennich säd to siene aunjestalde: Weet jie nich daut een Volkjsleida un een wichtja Maun vondoag jestorwen es?

³⁹Un wan ekj uk de jesaulwda Kjennich sie, sie ekj vondoag schwak. Zeruja äare Säns sent too strenj fa mie. Mucht de HAR de beese rechten fa daut beese, waut see doonen.