Read Plautdietsch (Low German) – De Bibel 2. Samuel 6 Bible Online

2. Samuel 6 - Plautdietsch (Low German) – De Bibel bible

2. Samuel 6

¹David vesaumeld nochmol 30.000 utjewälde Mana, von Israel.

²Un David jinkj met dee no Baala en Juda, om Gott siene Kjist von doa to brinjen. Von de Kjist woat jesajcht daut de HAR, dee aules rejieet, sienen Troon äwa de Cheruben haft.

³Un see druagen Gott siene Kjist opp eenen nieen Woagen, un brochten dee von en Abinadab sien Hus, woont doa oppem Boajch es. Un Usa un Achjo, Abinadab siene Säns leiden dän nieen Woagen

⁴met Gott siene Kjist. Achjo jinkj veropp un Usa biesied,

⁵un David un aule Israeliten spälden Instrumenten un sungen soo sea aus see kunnen om dän HARN to preisen. Un see spälden opp Zitta, Hoapen, Zimbeln un veschiedne Drommeln.

⁶Aus see dan oba bat Nachon siene Draschflua wieren, vestaupten sikj de Ossen, waut ver däm Woagen jespaunt wieren. Un Usa strakjt siene Haunt ut no Gott siene Kjist om dee to hoolen.

⁷Un däm HARN sien Oaja wia jereizt jäajen Usa, un Gott muak am doa doot wiels hee siene Haunt no de Kjist jestrakjt haud. Usa storf doa biesied Gott siene Kjist.

⁸Un David wia vestemt daut de HAR daut soo met Usa jemoakt haud. See nanden de Städ dan “Perez Usa”, soo aus dee uk vondoag heet.

⁹Un David enjst sikj dän Dach ver däm HARN, un hee säd: Woo kaun ekj däm HARN siene Kjist no mie nämen?

¹⁰Un David wull däm HARN siene Kjist nich no de Davidstaut nämen, oba leet dee doa tosied nämen no daut Hus von Obed Edom, dee een Gatita wia.

¹¹Fa dree Moonat bleef däm HARN siene Kjist en daut Hus von Obed Edom, dän Gatita, un de HAR säajend Obed Edom un siene Famielje.

¹²Dan säden see to Kjennich David: Gott haft Obed Edom un siene gaunze Famielje jesäajent wiels Gott siene Kjist doa es. Dan jinkj David un brocht met freiden Gott siene Kjist von Obed Edom sien Hus no de Davidstaut.

¹³Un aus dee, dee däm HARN siene Kjist druagen, sas Schräd jegonen wieren, opfad David eenen Oss un een Mastkaulf.

¹⁴Un David daunzt ver däm HARN soo sea aus hee kunn. David haud een lienzeichnen Efod aun.

¹⁵Soo brochten David un aule Israeliten däm HARN siene Kjist. See schrieejen fa Freid un blosden met de Posaunen.

¹⁶Aus see met däm HARN siene Kjist en de Davidstaut nenn kjeemen, kjikjt Michal, Saul siene Dochta, utem Fensta un sach Kjennich David ver däm HARN hupsen un daunzen. Un see veacht am doawäajen.

¹⁷See brochten dan däm HARN siene Kjist un saden dee opp äare Städ en daut Zelt, woont David doatoo oppjestalt haud. Dan opfad David Brauntopfa un Dankopfa ver däm HARN.

¹⁸Un aus David met daut Brauntopfa un Dankopfa foadich wia, jeef hee eenen Säajen opp daut Volkj en däm Nomen von däm HARN, dee aules rejieet.

¹⁹Un hee jeef jieda Persoon von gaunz Israel, Mana uk Frues, jieda een Stekj Broot, een Stekj Fleesch, un een Stekj jepraste Rasienen. Dan jinjen aule Lied doavon, een jiedra no sien Hus.

²⁰Un David jinkj no Hus un bejreest siene Menschen. Oba Michal, Saul siene Dochta, jinkj rut no David un säd to am: De Kjennich von Israel haft sikj vondoag oba eenen gooden Nomen jemoakt, soo aus hee sikj aufdakjen deed ver siene Mana äare Deenarinnen. Soo dakjen sikj mau onveninftje Menschen auf.

²¹Un David säd to Michal: Waut ekj deed, deed ekj ver däm HARN, dee mie wäld äwa dienen Voda un siene Nokomen, daut ekj sull de Leida äwa Israel, däm HARN sien Volkj, sennen. Un ekj woa noch wieda ver däm HARN daunzen om am to ieren.

²²Un ekj well noch weinja jeieet woaren aus nu un mie selfst veachten. Un ekj woa von die veacht woaren; un von de Mejales, von woone du rädsd, woa ekj jeieet woaren.

²³Michal, Saul siene Dochta, haud kjeene Kjinja bat see storf.