Read Plautdietsch (Low German) – De Bibel 1. Kjennichs 16 Bible Online

1. Kjennichs 16 - Plautdietsch (Low German) – De Bibel bible

1. Kjennichs 16

¹Dan kjeem een Wuat vom HARN no Jehu, Hanani sien Sän, äwa Bascha:

²Ekj hoof die opp von em Stoff un muak die toom Leida von mien Volkj, Israel, oba du haundelsd soo aus Jerobeam deed un muakst daut Volkj sindjen. Nu haben see met äare Sinden mienen Oaja jereizt,

³soo daut ekj nu die un diene Nokomen utroden woa. Ekj woa krakjt soo doonen met diene Nokomen aus ekj met Jerobeam, Nebat sien Sän, siene deed.

⁴Dee von diene Menschen, dee en de Staut stoawen, woaren von de Hunj jefräten woaren, un dee von an, dee oppe Stap stoawen, woaren von Väajel jefräten woaren.

⁵Daut äwaje von Bascha siene Jeschicht, waut hee deed un woo stoakj hee wia, daut es aula en daut Buak von de Jeschicht von de Kjennichs en Israel jeschräwen.

⁶Un aus Bascha storf, wort hee en Tirza met siene Vodasch begroft. Un Bascha sien Sän Ela wia Kjennich no am.

⁷De Norecht von däm HARN jäajen Bascha un siene Nokomen kjeem derch däm Profeet Jehu, Hanani sien Sän, wäajen aul de Sinden dee hee ver däm HARN deed. Däm HARN sien Oaja stieech jäajen am, nich bloos wiels hee krakjt soo onjehuarsom wia aus Jerobeam, oba uk wiels hee Jerobeam siene gaunze Famielje ombrocht un doot muak.

⁸Ela, Bascha sien Sän, wort Kjennich en Israel aus Asa en sien 26. Joa aus Kjennich en Juda wia. Ela wia fa twee Joa Kjennich äwa Israel en de Staut Tirza.

⁹Ela sien Kommandaunt, Simri, dee äwa eene halft von de Kjrichswoages to jebeeden haud, muak eenen Plon, Ela omtobrinjen. Eenen Dach aus Ela en Arza sien Hus en Tirza wia, bedrunk hee sikj. Arza wia Oppsechta fa dän Paulaust.

¹⁰Un Simri jinkj doa nenn un schluach Ela doot, un wort dan selfst Kjennich. Dit wort aus Kjennich Asa en sien 27. Joa aus Kjennich en Juda wia.

¹¹Soo boolt aus Simri Kjennich wort, brocht hee Bascha siene Nokomen aula om. Hee leet nich een Maunsmensch von däm sien Frintschoft ooda siene Frind aum Läwen.

¹²Soo kjeem daut, daut Simri Bascha siene Nokomen aula ombrocht, soo aus de HAR haud äwa Bascha sajen loten derch däm Profeet Jehu.

¹³De Sinden, dee Bascha un sien Sän Ela met äaren Jettadeenst deeden, un de Sinden dee see daut Volkj doonen muaken, reizten dän HARN, Israel äaren Gott, sien Oaja jäajen an.

¹⁴De äwaje Jeschicht von Ela, un waut hee deed, es en daut Buak von de Jeschicht von de Kjennichs en Israel jeschräwen.

¹⁵Simri wia fa säwen Doag de Kjennich äwa Israel en Tirza. Dit wia en daut 27. Joa daut Asa Kjennich äwa Juda wia. De israelitische Armee haud sikj don jrod rom de Filista Staut Gibbeton jeloagat.

¹⁶Aus de Soldoten hieeden daut Simri jäajen dän Kjennich jeplont haud un dän dootjemoakt haud, muaken see äaren Kommandaunt Omri doa noch en daut Loaga Kjennich äwa Israel.

¹⁷Omri brocht de Armee don trigj von Gibbeton un hee brocht daut gaunze Häa om Tirza rom.

¹⁸Aus Simri ensach daut de Staut wudd enjenomen woaren, jinkj hee en däm Paulaust en daut Poat, woont see daut dolste vesechat hauden. Un hee stekjt daut Hus aun un vebrend dän Paulaust met sikj selfst doabennen.

¹⁹Soo storf Simri wäajen siene Sinden. Däm HARN jefoll daut schlajcht waut hee deed. Hee läwd en soone Sinden aus Jerobeam haud, un muak Israel sindjen.

²⁰Daut äwaje von de Jeschicht von Simri, un woo hee sienen Plon jäajen sienen Kjennich derchfieed, es en daut Buak von de Jeschicht von de Kjennichs en Israel jeschräwen.

²¹To dee Tiet deeld sikj Israel en twee Deel. Een Poat unjastett Tibni, Ginat sien Sän, un wullen am toom Kjennich moaken, un de äwaje hilden sikj aun Omri.

²²Oba dee waut Omri unjastetten, kjrieejen de äwahaunt äwa dee, dee Tibni, Ginat sien Sän, unjastetten. Un Tibni storf un Omri wort Kjennich.

²³Omri wort Kjennich äwa Israel en daut 33. Joa daut Asa Kjennich äwa Juda wia. Omri wia Kjennich fa twalw Joa, de ieeschte sas von dee en Tirza.

²⁴Dan koft hee dän Boajch Samaria von Schemer fa 70 Kilo Selwa, un bud eene Staut met eene Mia opp däm Boajch. Hee nand de Staut Samaria, no Schemer, dee dän Boajch jeieejent haud.

²⁵Omri deed waut däm HARN schlajcht jefoll, un dreef mea schlajchtet aus aul dee, dee ver am wieren.

²⁶Hee haundeld en aules soo aus Jerobeam, Nebat sien Sän, en siene Sinden jedonen haud, un muak Israel sindjen. De Jettadeenst reizt däm HARN, Israel äaren Gott, sien Oaja.

²⁷Daut äwaje von Omri siene Jeschicht, waut hee aules deed un woo stoakj hee wia, es en daut Buak von de Jeschicht von de Kjennichs en Israel jeschräwen.

²⁸Aus Omri storf, wort hee en Samaria begroft. Un Omri sien Sän, Ahab, wort Kjennich no am.

²⁹Ahab, Omri sien Sän, wort Kjennich äwa Israel en daut 38. Joa daut Asa Kjennich äwa Juda wia. Ahab wia fa 22 Joa Kjennich äwa Israel en Samaria.

³⁰Un Ahab, Omri sien Sän, deed waut däm HARN schlajcht jefoll, un dolla aus aule waut ver am jewast wieren.

³¹Daut wia am nich jenuach daut hee soo sindijd aus Jerobeam, Nebat sien Sän. Hee neem sikj don noch Isebel, däm sidonischen Kjennich Etbaal siene Dochta aus siene Fru, un jinkj un deend Baal un bäd dän aun.

³²Hee bud een Tempel fa Baal en Samaria un stald doabennen eenen Aultoa fa Baal opp.

³³Hee stald uk een Ascherabilt opp. Ahab deed mea Sinden met woone hee däm HARN sien Oaja reizt, aus aul de Kjennichs en Israel ver am.

³⁴To Ahab siene Tiet funk Hiel, von Betel, aun Jericho to buen. Un krakjt soo aus daut Wuat vom HARN derch Josua, Nun sienen Sän, jesajcht haud, kost am daut sienen elsten Sän, Abiram, aus hee de Grunt läd, un sienen jinjsten Sän, Segub, aus hee de Puaten nenn sad.