Read Plautdietsch (Low German) – De Bibel 1. Kjennichs 22 Bible Online

1. Kjennichs 22 - Plautdietsch (Low German) – De Bibel bible

1. Kjennichs 22

¹Doa kjeemen dan dree Joa onen Kjrich tweschen Aram un Israel.

²Oba en daut dredde Joa kjeem Joschafat, de Kjennich en Juda, no däm Kjennich en Israel.

³Un de Kjennich von Israel säd to siene Rotjäwa: Weet jie nich daut Ramot en Gilead ons jehieet. Un wie setten hia stell un nämen daut nich trigj von däm aramäischen Kjennich?

⁴Un hee säd to Joschafat: Woascht du met mie gonen en eenen Kjrich jäajen Ramot en Gilead. Un Joschafat säd: Ekj woa daut doonen, waut du deist. Miene Armee es diene Armee, un miene Pieed sent diene Pieed.

⁵Un Joschafat säd to däm Kjennich von Israel: Well wie vondoag däm HARN no sien Wuat äwa dit froagen.

⁶Un de Kjennich von Israel roopt Profeeten toop, bie 400 Maun, un säd to dee: Sull ekj en eenen Kjrich jäajen Ramot en Gilead gonen, ooda nich. Un dee säden: Go doahan. De HAR woat däm Kjennich daut en siene Macht jäwen.

⁷Oba Joschafat säd: Es hia noch eena von däm HARN siene Profeeten däm wie froagen kjennen?

⁸Un de Kjennich von Israel säd: Doa es noch een Maun, Micha, Jimla sien Sän, derch däm wie no een Wuat vom HARN froagen kjennen. Oba ekj räakjen däm nuscht. Dee profezeit nienich goodet fa mie, bloos beeset. Un Joschafat säd: De Kjennich sull nich soont sajen.

⁹Dan leet de Kjennich von Israel eenen Maun väakomen, un hee säd to am: Brinj emol schwind Micha, Jimla sien Sän.

¹⁰De Kjennich von Israel, un Joschafat, de Kjennich von Juda, sauten jieda opp sienen Troon un krakjt aunjetrocken, bie de opne Städ bie daut Stautspuat von Samaria. Un de Profeeten profezeiden aula ver an.

¹¹Un Zedekia, Kenaana sien Sän, muak sikj iesane Hieena un säd: Dit es waut de HAR sajcht: Met dit woascht du de Aramäa schupsen bat du an oppjeriemt hast.

¹²Un aule Profeeten profezeiden daut selwje un säden: Go no Ramot en Gilead un jewenn jäajen dee. De HAR woat die daut en diene Macht jäwen.

¹³Un de Maun dee no Micha jeschekjt wia, säd to am: De Profeeten sajen aula goodet fa däm Kjennich. Lot dien Wuat uk soo sennen aus de aundre äat un saj goodet.

¹⁴Oba Micha säd: Soo secha aus de HAR läft, ekj woa daut sajen waut de HAR mie to sajen jeft.

¹⁵Aus Micha dan ver däm Kjennich kjeem, säd de Kjennich to am: Micha, sull wie jäajen Ramot en Gilead kjriejen, ooda nich? Un hee säd: Jo, go doahan, un jewenn jäajen dee. De HAR woat däm Kjennich daut en siene Macht jäwen.

¹⁶Un de Kjennich säd nochmol to am: Woo foaken saul ekj die loten met een Eit vespräakjen, daut du nuscht aus de Woarheit en däm HARN sien Nomen sajchst.

¹⁷Un hee säd: Ekj sach Israel äare gaunze Armee oppe Boaj vestreit, aus Schop dee kjeen Hoad haben. Un de HAR säd: Dise haben kjeen Harn; got wada aula frädlich no Hus.

¹⁸Dan säd de Kjennich von Israel to Joschafat: Hab ekj die nich jesajcht daut disa nienich goodet fa mie profezeit, oba bloos emma schlajchtet?

¹⁹Un Micha säd: Dan horch nu no waut de HAR jesajcht haft. Ekj sach däm HARN opp eenen Stool setten, un aul siene himlische Deena biesied am aun de rajchte un linkje Sied stonen.

²⁰Un de HAR säd: Wäa woat Ahab äwaräden, daut hee woat no Ramot en Gilead gonen un doa doljeschloagen woaren? Un eena säd een Dinkj un de aundra waut aundret.

²¹Dan jinkj een Jeist no väaren ver däm HARN un säd: Ekj woa am doatoo äwaräden. Un de HAR säd: Woo woascht daut doonen?

²²Un hee säd: Ekj woa gonen un aus een faulscha Jeist derch siene Profeeten räden. Un hee säd: Dan saust du gonen un am äwaräden, un du woascht daut foadich brinjen. Go, un doo daut.

²³Un kjikj, hia es daut soo. De HAR haft aul dise Profeeten een Wuat von eenen faulschen Jeist jejäft. De HAR haft beeset äwa die jerät.

²⁴Dan jinkj de Profeet Zedekia, Kenaana sien Sän, un schluach Micha oppe Bak un säd: Waut sajchst du? Es däm HARN sien Jeist von mie wajchjegonen un haft to die jerät?

²⁵Un Micha säd: Horch emol. Aun dän Dach wan du woascht von eene Stow en de aundre gonen om die to vekrupen, woat die daut kloa woaren.

²⁶Un de Kjennich von Israel säd: Nämt Micha faust, un lot am bie Amon, däm Vewaulta von de Staut, bliewen, un bie Joasch, däm Kjennich sien Sän.

²⁷Un sajcht an, daut de Kjennich velangt, daut hee saul em Jefenkjnis jestopt woaren un bloos Broot un Wota to äten kjrieen, bat ekj en Fräd trigj kom.

²⁸Un Micha säd: Wan du woascht en Fräd trigjkomen, dan haft de HAR nich derch mie jerät. Un hee säd to aul dee: Horcht aula no waut ekj jesajcht hab.

²⁹Dan jinjen de Kjennich von Israel un Joschafat, de Kjennich von Juda, no Ramot en Gilead.

³⁰Un de Kjennich von Israel säd to Joschafat: Ekj woa mie vestalen un en däm Kjrich gonen, oba du go soo aunjetrocken, daut see weeten daut du een Kjennich best. Un de Kjennich von Israel vestald sikj met aundre Kjleeda un jinkj en däm Kjrich nenn.

³¹Nu haud de Kjennich von Aram to de 32 Kommandaunten äwa siene Kjrichswoages jesajcht: Jäft junt nich auf met jeweenelje Soldoten, un uk nich met aunjestalde Leidasch, oba got bloos jäajen däm Kjennich von Israel.

³²Dan aus de Kommandaunten Joschafat en sienen Kjrichswoagen sagen, dochten see, daut hee de Kjennich von Israel wia. Un see fuaren jäajen am toom Kaumf. Oba Joschafat schrieech,

³³soo daut de Kommandaunten von de Kjrichswoages ensagen, daut hee nich de Kjennich von Israel wia. Un dan leeten see am toch.

³⁴Oba een Maun schoot toofalich met sienen Boagen, un hee troff dän Kjennich von Israel tweschen de Stekja von sien Schiltkjleet. Un hee säd to sienen Fuamaun: Wenj om un fia mie ut disen Kjrich rut. Ekj hab eene Wund jekjräajen.

³⁵Un de Kaumf jinkj heet häa dän Dach, un de Kjennich bleef en sien Kjrichswoagen oppjepropt, met sien Jesecht no de Aramäa jerecht. Un sien Bloot rand opp de Flua von sien Kjrichswoagen. Dän Owent storf hee.

³⁶Dan aus de Sonn unjajinkj, wort en de Armee romjeroopt: Got een jiedra no siene Staut en sien Launt,

³⁷wiels de Kjennich es jestorwen. Un see brochten am no Samaria un begrowden am doa.

³⁸Un aus see sienen Woagen bie daut Wotaloch bie Samaria aufwoschen, kjeemen Hunj un lekjten sien Bloot, un de Huaren boden sikj doabennen, soo aus de HAR daut jesajcht haud.

³⁹Waut noch mea to sajen es von Ahab, waut hee aules deed, daut Aulfenbeenhus woont hee bud, un aul de Städa dee hee bud, sent aula en daut Buak von de Jeschicht von de Kjennichs en Israel oppjeschräwen.

⁴⁰Aus Ahab storf, begrowden see am met siene Vodasch. Un sien Sän Ahasja wort Kjennich no am.

⁴¹Joschafat, Kjennich Asa sien Sän, wort Kjennich äwa Juda en daut vieede Joa aus de Kjennich Ahab en Israel rejieed.

⁴²Joschafat wia 35 Joa oolt aus hee Kjennich wort un hee rejieed 25 Joa en Jerusalem. Siene Mutta wia Asuba, Schilhi siene Dochta.

⁴³Un hee läwd soo aus sien Voda Asa haud un veleet dän Wajch nich. Hee deed waut däm HARN goot jefoll.

⁴⁴Oba hee riemd nich de huage Opfastäden opp, un daut Volkj bleef doabie, doa Opfa un Ruakopfa to brinjen.

⁴⁵Joschafat muak Fräd met däm Kjennich von Israel.

⁴⁶Daut äwaje von de Jeschicht von Joschafat, woo stoakj hee wia, un soo aus hee en däm Kjrich leiden deed, es aula en daut Buak von de Jeschicht von de Kjennichs en Juda jeschräwen.

⁴⁷Hee riemd uk opp met de äwaje Tempelhuara, dee noch en daut Launt jebläwen wieren von sien Voda Asa siene Tiet.

⁴⁸To dee Tiet wia doa kjeen Kjennich en Edom, oba doa wia een Aunjestalda von Kjennich Joschafat.

⁴⁹Joschafat leet Tarsis Schäp moaken toom opp de See foaren. Dee sullen no Ofir foaren om Golt to holen, oba dee fuaren nienich, wiels dee bie Ezjon Geber tosplät kjeemen.

⁵⁰Dan säd Ahasja, Ahab sien Sän, to Joschafat: Lot von onse Mana met june Mana opp de Schäp foaren. Oba Joschafat wull daut nich.

⁵¹Aus Joschafat storf, begrowden see am doa, wua siene Vodasch en de Davidstaut begroft wieren. Un Joram, sien Sän wort Kjennich no am.

⁵²Ahasja, Ahab sien Sän, wort Kjennich äwa Israel en Samaria aus Joschafat en sien 17. Joa aus Kjennich en Juda wia. Ahasja wia Kjennich äwa Israel fa twee Joa.

⁵³Hee deed, waut däm HARN schlajcht jefoll, un läwd soo aus sien Voda un siene Mutta hauden, un soo aus Jerobeam, Nebat sien Sän, haud, dee Israel haud sindjen moakt.

⁵⁴Hee deend Baal un bäd dän aun, un hee reizt däm HARN, Israel äaren Gott, sienen Oaja, krakjt soo aus sien Voda jedonen haud.