Read Plautdietsch (Low German) – De Bibel 1. Kjennichs 4 Bible Online

1. Kjennichs 4 - Plautdietsch (Low German) – De Bibel bible

1. Kjennichs 4

¹De Kjennich Salomo wia Kjennich äwa daut gaunze Israel,

²un dit sent siene huachaunjestalde Mana: Asarja, Zadok sien Sän, wia de Priesta;

³Elihoref un Ahija, Schischa siene Säns, wieren Schriewa; Joschafat, Ahilud, sien Sän, oppbewoad de Bieekja von de Jeschicht von daut Kjennichrikj;

⁴Benaja, Jojada sien Sän, wia Kommandaunt von de Armee; Zadok un Abjatar wieren Priesta;

⁵Asarja, Natan sien Sän, wia äwa de aunjestalde; Sabud, Natan sien Sän, wia Priesta un däm Kjennich sien Frint;

⁶Ahischar wia de Oppsechta vom Paulaust; un Adoniram, Abda sien Sän, wia aunjestalt äwa de Oabeida, waut jedwungen wieren veschiednet fa dän Kjennich to buen.

⁷Salomo haud twalw Mana äwa daut gaunze Israel aunjestalt, daut see Väarot fa daut Äten fa däm Kjennich un siene Menschen besorjden. Een jiedra von dise Mana must fa eene Moonat dän Väarot stalen.

⁸Dise twalw Mana wieren: Ben Hur, en de efraimsche Boaj;

⁹Ben Deker, en Makaz, Schaalbim, Bet Schemesch, un Elon Bet Hanan;

¹⁰Ben Hesed, en Arubot, hee wia äwa Socho un de Jäajent von Hefer;

¹¹Ben Abinadab, en de gaunze Nafatdor Jäajent; siene Fru wia Tafat, Salomo siene Dochta;

¹²Baana, Ahilud sien Sän, en Taanach, Megiddo un daut gaunze Bet Schean biesied Zaretan rauf von Jesreel, un von Bet Schean bat Abel Mehola bat jantsied von Jokneam;

¹³Ben Geber, en Ramot en Gilead; hee wia äwa de Darpa waut Jair, Manasse sien Sän, jehieeden, dee en Gilead sent, un de Jäajent von Argob en Baschan, wua doa 60 groote Städa wieren, aula met Mieren un Iesastangen;

¹⁴Ahinadab, Ido sien Sän en Mahanajim;

¹⁵Ahimaaz, en Naftali; siene Fru wia Basemat, Salomo siene Dochta;

¹⁶Baana, Huschai sien Sän, en Asser un Bealot;

¹⁷Joschafat, Paruach sien Sän, en Isachar;

¹⁸Schimi, Ela sien Sän, en Benjamin;

¹⁹Geber, Uri sien Sän, en daut Launt Gilead, daut Launt von Sihon dän Amorita Kjennich un Og dän Kjennich von Baschan. Un dan wia noch eena äwa daut gaunze Launt.

²⁰Doa wieren soo väl Menschen en Juda un Israel aus doa Saunt aum Mäa es; dee eeten un drunken un wieren sea jlekjlich.