Read Plautdietsch (Low German) – De Bibel 1. Kjennichs 5 Bible Online

1. Kjennichs 5 - Plautdietsch (Low German) – De Bibel bible

1. Kjennichs 5

¹Salomo rejieed de gaunze Jäajent vom Eufrat Riefa bat de Filista äa Launt un bat aun de Jrens von Ägipten. Dise Lenda brochten emma äaren Taks no Salomo soo lang aus hee läwd.

²Fa een Dach brukt Salomo met aul siene Menschen vea Tonn fienet Mäl un sasunhaulf Tonn growet Mäl,

³tieen jemaste Ossen, 20 Stekj Vee vonne Weid, un 100 Schop; doatoo worden dan noch veschiedne Sorten Ree un veschiedne Sorten Heena un Väajel jebrocht.

⁴Salomo rejieed äwa de gaunze Jäajent wasten vom Eufrat Riefa, von Tifsach bat Gaza; äwa aul de Kjennichs wasten vom Eufrat. Hee haud Fräd aun aule Sieden runtom am.

⁵Derch Salomo siene gaunze Tiet läwden de Lied en Juda un Israel onen irjent eene Jefoa von aundre Velkja, von Dan bat Beerscheba. Een jiedra haud siene Wienrank un sienen Fiejenboom.

⁶Salomo haud 4.000 Riem met Pieed fa siene Kjrichswoages, un 12.000 Maun toom de Pieed besorjen un aunhaunt haben.

⁷De twalw Mana fa dän Väarot sorjden fa daut, waut Kjennich Salomo aule Dach brukt, un fa dee, dee aun däm Kjennich sienen Desch eeten. Jieda eena wia veauntwuatlich fa eene Moonat. Dee sagen doano, daut doa von aules jenuach wia.

⁸Jieda eena von de Mana fa dän Väarot sagen uk doano, wan see aun de Rieej stunden, daut doa Joascht un Stroo oppe rajchte Städ wia fa de veschiedne Pieed.

⁹Gott jeef Salomo butajeweenlich väl Weisheit un Vestentnis. Salomo wist om sooväl om, daut et soo schwoa auftoschazen wia aus daut Saunt aum Mäa.

¹⁰Salomo siene Weisheit wia jrata aus de Weisheit von de Mana em Oosten ooda aus aule Weisheit en Ägipten.

¹¹Hee haud mea Weisheit aus irjent sestwäa, mea aus Etan de Esrachita un mea aus Heman, Kalkol un Darda, Mahol siene Säns. Hee wia en aule Lenda runtom bekaunt fa siene Weisheit.

¹²Salomo haft 3.000 Spricha jedicht, un 1.005 Leeda.

¹³Hee wist om de veschiedenste Beem, von de Zeeda en Libanon krakjt soo goot aus von daut Iessoppstruck, daut opp de Waunt waust. Hee räd von wille Tieren un Väajel, un von Kruptieren un Fesch.

¹⁴Doa kjeemen Mana von aule Lenda om Salomo siene Weisheit too to horchen. Dee kjeemen von aule Kjennichs oppe Ieed, dee von siene Weisheit jehieet hauden.

¹⁵Hiram, de Kjennich en Tierus, schekjt Mana no Salomo, aus hee hieed daut hee en sien Voda siene Städ Kjennich jeworden wia. Hiram hilt emma sea väl von David.

¹⁶Un Salomo schekjt Norecht trigj no Hiram un säd:

¹⁷Du weetst, daut wäajen David mien Voda sooväl met de Lenda runtom kjriejen must, kunn hee nich een Hus fa däm HARN sienen Gott buen, bat de HAR am aul siene Fiend en siene Macht jejäft haud.

¹⁸Oba nu haft de HAR mien Gott mie Fräd jejäft aun aule Sieden. Doa es kjeen Fient un kjeene Jefoa.

¹⁹Doawäajen plon ekj nu een Hus to buen fa däm HARN mienen Gott. De HAR säd to David, mienen Voda, daut sien Sän, dän hee opp sienen Troon en siene Städ saten wudd, dee sull fa däm HARN een Hus buen.

²⁰Un nu es daut bat doa. Bestal aun diene Mana daut see sellen Zeedabeem en Libanon aufmoaken fa mie. Ekj woa uk von miene Oabeida hanschekjen, un woa diene Oabeida soo betolen aus du sajchst. Du weetst goot, daut miene Oabeida vestonen sikj nich met Beem aufmoaken, soo aus diene Mana von Sidon daut vestonen.

²¹Aus Hiram dise Norecht von Salomo kjrieech, freid hee sikj sea, un hee säd: Ekj preis däm HARN vondoag, dee David eenen weisen Sän jejäft haft toom äwa sien grootet Volkj to rejieren.

²²Un Hiram schekjt eene Norecht no Salomo un säd: Ekj hab diene Norecht jekjräajen met daut no waut du frajchst. Ekj sie reed die daut Zeedaholt un Taunenholt soo to stalen aus du daut west.

²³Miene Oabeida woaren daut Holt no daut Mäa brinjen un de Kjneppels toopbinjen un opp daut Mäa doahan brinjen, wua du sajchst. Doa woaren miene Oabeida junt daut Holt äwajäwen. Aules waut ekj von die velang es daut du Äten stalst fa miene Menschen.

²⁴Un soo wia daut, daut Hiram aul daut Zeeda un uk aundret Holt stalen kunn, waut Salomo brucken kunn.

²⁵Un Salomo jeef Hiram jieda Joa 3.000 Tonn Weit un 6.000 Lieta Olieweneelj.

²⁶Un krakjt soo aus de HAR daut vesproaken haud, jeef hee Salomo Weisheit. Doa wia Fräd tweschen Hiram un Salomo, un see vespruaken sikj daut unja eenaunda en eenen Vetrach.

²⁷Kjennich Salomo velangd 30.000 Oabeida von aulawäajen en Israel, daut dee fa am schauften.

²⁸Adoniram wia de Äwasechta äwa dise Oabeida. De Oabeida wieren en dree Gruppen jedeelt. Jieda Grupp haud 10.000 Mana. Dee musten emma eene Moonat en Libanon schaufen, un twee Moonat tus.

²⁹Salomo haud 80.000 Oabeida en de Boaj toom Steena behaken, un 70.000 toom Steena droagen.

³⁰Hee stald 3.300 Oppsechta äwa de Oabeida, om daut gaunze to leiden.

³¹Salomo leet groote diere Steena uthaken, daut see dee aus Gruntsteena unja daut Hus saten kunnen.

³²Soo schauften Salomo siene Oabeida un Hiram siene Oabeida un uk Mana von Gebal aun de Steena un daut Holt un muaken daut reed fa dän Tempel.