Read Plautdietsch (Low German) – De Bibel 1. Kjennichs 6 Bible Online

1. Kjennichs 6 - Plautdietsch (Low German) – De Bibel bible

1. Kjennichs 6

¹En daut 480. Joa, no däm daut de Israeliten ut Ägipten rutkjeemen, un en Salomo sien vieedet Joa aus Kjennich, en de Moonat Siw, daut es de tweede Moonat, fungen see aun daut Hus fa däm HARN to buen.

²De Tempel wia 30 Meeta lank, 10 Meeta breet un 15 Meeta huach.

³De Engank ver däm Tempel wia 10 Meeta breet, soo breet aus de Tempel selfst, un 5 Meeta rut.

⁴Hee muak Fenstren en de Wenj, met Stangen doaräwa.

⁵Aun jiedat Sied un opp daut Enj bud hee dreestockich aun, soo daut doa väl Stowen wieren.

⁶Daut unjaschte Stock wia tweeunhaulf Meeta breet, daut tweede, dree Meeta breet, un daut dredde, dreeunhaulf Meeta breet. De Tempelwaunt wia met jieda Stock een haulwet Meeta denna, soo daut de Dräaja opp de Kaunt aun de Waunt ligjen kunnen un nich en de Waunt nenn jebrocht worden.

⁷De Steena fa daut Hus wieren aula aul en de Boaj trajcht jehakt, soo daut biem buen kjeen Homa, Akjs, ooda aundret iesanet Jereetschoft to hieren wieren.

⁸De Engank to daut unjaschte Stock wia aun de siedne Kaunt vom Tempel. Dan wieren doa Trapen no daut tweede Stock un von daut tweede no daut dredde Stock.

⁹Daut es woo Salomo dän Tempel bud un foadich muak. Hee muak daut Dak von zeedane Dräaja un Bräda.

¹⁰De Stowen runtom däm Tempel wieren aula tweeunhaulf Meeta huach, un wieren met Zeedabaulkjes aum Tempel faustjemoakt.

¹¹Dan säd de HAR to Salomo:

¹²Wan du aul miene Jebooten un Jesazen hoolen woascht un de Väaschreften jehorchen woascht un doano läwen, dan woa ekj daut loten soo romkomen aus ekj to dienen Voda David säd.

¹³Ekj woa mank de Israeliten wonen un woa mien Volkj nich veloten.

¹⁴Salomo bud dän Tempel un muak dän foadich.

¹⁵Von bennen wieren de Wenj met Zeedaholt jemoakt, von de Flua bat aum Bän. De Flua wia met Taunenholt jedakjt.

¹⁶Bennen muaken see eene Dwäawaunt, tieen Meeta vom Enj. Dee wia von Zeedaholt jemoakt un rieekjt von de Flua bat aum Bän. Hinja de Waunt wia de Woninj fa däm HARN, daut Aulaheilichste.

¹⁷De Stow waut ver daut Aulaheilichste wia, wia 20 Meeta lank.

¹⁸De Bennawaunt wia gaunz met Zeedaholt jemoakt; doa wia kjeen Steen to seenen. Daut Zeeda bennen en daut Hus wia utjeschnizt met een Mosta von Bloomen un Knoppes.

¹⁹De hinjaschte Stow leet Salomo foadich moaken fa daut Aulaheilichste. Doa sull däm HARN siene Bundeskjist stonen.

²⁰Daut Aulaheilichste wia tieen Meeta lank, tieen Meeta breet un tieen Meeta huach. De Stow wia von bennen gaunz met Golt belajcht. De Aultoa wort von Zeeda jemoakt un met Golt belajcht.

²¹Un Salomo beläd dän Tempel von bennen met reinet Golt, un hee muak goldne Kjäden ver daut Aulaheilichste un betrock daut met Golt.

²²De Tempel wia von bennen gaunz met Golt belajcht, krakjt soo aus de Aultoa en daut Aulaheilichste.

²³En daut Aulaheilichste muak hee twee Cheruben von Oliewenholt. Dee wieren jieda 5 Meeta huach,

²⁴un jieda Flicht wia tweeunhaulf Meeta lank, soo daut et 5 Meeta von eene Spetz Flicht bat de aundre Spetz wia.

²⁵De Cheruben wieren äwareen un jlikje groot.

²⁶Dee wieren jieda 5 Meeta huach.

²⁷Hee sad de Cheruben en daut Aulaheilichste. Dee stunden eena biesied dän aundren, soo daut äare Flichten enne Medd toopschieeden, un met de aundre Flichten schieeden see de Wenj aun.

²⁸De Cheruben wieren met Golt beschloagen.

²⁹De Wenj en de groote Stow un uk en de benna Stow hauden jeschnizte Figuaren von Cheruben, Paulmbeem, un Bloomen en daut Holt.

³⁰De Flua en beid Stowen wia met Golt belajcht.

³¹De Engank to daut Aulaheilichste haud dobbelde Däaren, von Oliewenholt jemoakt. Daut Däarejerecht wia von fief kauntje Stendasch jemoakt.

³²Daut Oliewenholt en de Däaren wia jeschnizt met Figuaren von Cheruben, Paulmbeem un Bloomen. De Däaren, de Cheruben, un de Paulmbeem wieren met Golt belajcht.

³³Daut Däarejerecht fa dän Engank en de groote Stow nenn wia von Oliewen Holt un haud veakauntje Stendasch.

³⁴De Däaren en däm Engank wieren von Taunenholt, un jieda Däa wia en twee halften, waut sikj aunenaunda toopläden.

³⁵Dise Däaren hauden Cheruben un Paulmbeem un Bloomen doa nenjeschnizt, un wieren no dee Mostasch dan met Golt belajcht.

³⁶Rom däm Tempel bud hee dän Bennahoff. De Mia wia von dree Schicht Steen un eene Schicht Zeedaholt.

³⁷Hee läd dän Grunt fa dän Tempel en de 2. Moonat, de Moonat Siw, en daut 4. Joa daut Salomo Kjennich wia.

³⁸Un en daut 11. Joa, en de 8. Moonat, de Moonat Bul, wia aules aun daut Hus foadich, krakjt soo aus hee daut jeplont haud. Daut haud säwen Joa jedieet daut to buen.