Read Plautdietsch (Low German) – De Bibel 2. Kjennichs 11 Bible Online

2. Kjennichs 11 - Plautdietsch (Low German) – De Bibel bible

2. Kjennichs 11

¹Aus Atalja, Ahasja siene Mutta hieed daut äa Sän doot wia, brocht see aule waut noch von däm Kjennich siene Nokomen wieren om.

²Oba Joscheba, Kjennich Joram siene Dochta, un Ahasja siene Sesta, neem Joasch, Ahasja sienen Sän, von mank de Kjennichs Famielje, dee doa omjebrocht worden. See brocht am, un dee waut am fläajd, no eene Schlopstow, wua see am ver Atalja vestoaken hilt. Un Atalja muak am nich doot.

³Un Joscheba hilt am fa sas Joa em HARN sien Hus vestoaken. Dän Tiet wia Atalja Kjennijin en daut Launt.

⁴Dan en daut säwende Joa leet Jojada de Leidasch von de Kjennijin äare Wajchta un von de Paulaust Wajchta no am komen en däm Tempel. Un hee muak eenen Plon met an un foddad von an daut Vespräakjen tru to sennen. Dan wees hee an däm Kjennich sienen Sän Joasch.

⁵Un hee beräd met an daut een dreddel von an, dee fa dee Wäakj Wajchta wieren, sullen en däm Paulaust woaken;

⁶un een Dreddel sullen bie daut Sur Puat oppaussen; un een dreddel sullen bie daut Puat hinja de Wajchta äa Hus oppaussen. Soo aus daut sullen see runtom däm Paulaust oppaussen.

⁷Un twee Aufdeelungen, dee dee Wäakj nich deenden, sullen en däm HARN sien Hus bie däm Kjennich woaken.

⁸Dee sullen sikj runtom däm Kjennich stalen, un jiedra sull sien Jewäa en de Haunt haben, soo daut wan irjent wäa dicht aum Kjennich naun komen wull, wudd dee omjebrocht woaren. Dee sullen bie däm Kjennich bliewen, wan hee nenn jinkj un uk wan hee rut jinkj.

⁹Un de Leidasch von de Wajchta deeden aules, waut de Priesta Jojada von an velangd. Een jiedra brocht siene Mana, dee waut aun dän Sabat aun de Oabeit kjeemen un uk dee waut dän Sabat von de Oabeit kjeemen, un jinjen no däm Priesta Jojada.

¹⁰Un de Priesta jeef de Leidasch de Spiessen un de Schilten, waut däm Kjennich David jehieet hauden, un en däm HARN sien Hus wieren.

¹¹Un de Wajchta stunden, een jiedra met sien Jewäa en de Haunt, runtom däm Aultoa un däm Kjennich, von de siedne Kaunt vom Tempel bat de nuadne Kaunt.

¹²Un Jojada leet däm Kjennich sien Sän väakomen, un hee sad am de Kroon opp un jeef am de Väaschreften toom rejieren. Hee saulwd am en aus Kjennich un bejreest am aus eenen. Un de Lied klautschten äare Henj un schrieejen: Ons Kjennich! Opp emma!

¹³Aus Atalja hieed daut daut Volkj, waut doa toop kjeem, soon Jeschrech muak, jinkj see no de Menschen en däm HARN sien Hus.

¹⁴Un aus see kjikjt waut doa wia, sach see doa dän Kjennich bie däm dikjen Stenda stonen, soo aus de Kjennich jeweenlich deed. Un de Leidasch un dee, dee de Trompeeten hauden wieren biesied am. Un daut gaunze Volkj vom Launt freid sikj un see blosden äare Trompeeten. Dan reet Atalja äaren Rock twei un roopt: Wadastaunt, Wadastaunt!

¹⁵Un de Priesta Jojada bestald aun de Leidasch äwa de Wajchta, daut see sullen ar tweschen sikj rut leiden, soo daut see nich em HARN sien Hus doot jemoakt wort. Un hee haud uk bestalt, daut aul dee waut ar unjastetten, sullen doot jemoakt woaren.

¹⁶Un see neemen Atalja faust un jinjen met ar delenjd dän Wajch wua de Pieed no däm Paulaust gonen. Un doa muaken see ar doot.

¹⁷Un Jojada muak eenen Bunt tweschen däm HARN un däm Kjennich un sien Volkj, daut see däm HARN sien Volkj sullen sennen. Un hee muak uk dän Bunt tweschen däm Kjennich un daut Volkj.

¹⁸Dan jinjen aule Menschen von daut Launt no daut Hus fa Baal un bruaken daut dol. See bruaken de Aultoaren dol un veschluagen de Jettabilda. See schluagen Matan, dän Baal Priesta ver de Aultoaren doot. Un de Priesta Jojada sach doano, daut doa Wajchta rom däm HARN sien Hus wieren.

¹⁹Dan leiden de Leidasch von de Kjennichs Wajchta un de Paulaust Wajchta un aul daut Volkj von daut Launt dän Kjennich von däm HARN sien Hus derch de Wajchta äa Puat, un jinjen met rauf met am no däm Paulaust fa däm Kjennich. Un doa sad de niea Kjennich sikj opp däm Kjennichstroon dol.

²⁰Un aule Menschen en daut Launt freiden sikj, un de Staut bleef stell aus de Kjennijin Atalja biem Paulaust met daut Schwieet doot jemoakt wia.