Read Plautdietsch (Low German) – De Bibel 2. Kjennichs 13 Bible Online

2. Kjennichs 13 - Plautdietsch (Low German) – De Bibel bible

2. Kjennichs 13

¹Aus de Kjennich Joasch, Ahasja sien Sän, en sien 23. Joa aus Kjennich von Juda wia, wort Joahas, Jehu sien Sän, Kjennich äwa Israel. Hee wia 17 Joa Kjennich en Samaria.

²Hee deed soont waut däm HARN schlajcht jefoll. Hee läwd en de Sinden met woone Jerobeam, Nebat sien Sän, Israel haud toom sindjen veleit. Hee hieed nich met dee opp.

³Un de HAR oajad sikj äwa Israel, un de gaunze Tiet leet hee Hasael un sienen Sän, Ben Hadad, dee Kjennichs von Aram, äare Macht äwa Israel eewen.

⁴Un Joahas prachad däm HARN, daut hee an halpen sull. Un de HAR horcht no am, wiels hee sach woo schwoa daut fa Israel wia, soo aus de Kjennich von Aram Israel toosad.

⁵Un de HAR jeef Israel eenem dee an raden kunn, un dee muak an frie von de Aramäa äare Macht, un see kunnen wada en äare Hiesa wonen, soo aus ea.

⁶Oba daut Volkj jeef nich opp un bleef en de Sinden met dee Jerobeam un siene Nokomen daut Volkj toom sindjen veleit haud. Un daut Ascherabilt bleef uk en Samaria stonen.

⁷Joahas siene Armee wia sea kjlien jeworden, wiels de Kjennich von Aram haud dee omjebrocht; see wieren soo aus daut Sprie oppem Draschplauz. Hee haud aul mau 50 Mana opp Pieed, tieen Kjrichswoages, un 10.000 Soldoten.

⁸Daut äwaje von de Jeschicht von Joahas met aules waut hee jedonen haft un woo brow hee wia, es aula en daut Buak von de Jeschicht von de Kjennichs en Israel jeschräwen.

⁹Aus Joahas storf, begrowden see am en Samaria. Joahas sien Sän Joasch wort Kjennich no am.

¹⁰Joasch, Joahas sien Sän, wort Kjennich äwa Israel aus de Kjennich Joasch en sien 37. Joa aus Kjennich en Juda wia. Joasch, Joahas sien Sän, wia fa 16 Joa Kjennich en Samaria.

¹¹Hee deed waut däm HARN schlajcht jefoll, hee hieed nich opp met de Sinden met dee Jerobeam, Nebat sien Sän, Israel haud toom sindjen veleit. Hee läwd wieda en dee.

¹²Daut äwaje von de Jeschicht von Joasch un waut hee jedonen haft un woo brow hee wia aus hee jäajen Amazja, däm Kjennich von Juda kjamfen deed, es aula en daut Buak von de Jeschicht von de Kjennichs en Israel jeschräwen.

¹³Aus Joasch storf, begrowden see am en Samaria, met de Kjennichs von Israel, un Jerobeam kjeem opp däm Troon to setten.

¹⁴Aus Elisa krank wort, met eene Krankheit von woone hee storf, dan jinkj Joasch, de Kjennich von Israel, han un hield ver am un säd: Mien Voda, mien Voda! Israel äa Woagen un Ritta!

¹⁵Un Elisa säd to am: Nemm eenen Boagen un Feilen. Un aus de Kjennich dän Boagen un Feilen neem,

¹⁶säd Elisa to däm Kjennich von Israel: Nemm diene Haunt un hol däm Boagen aun. Un hee hold dän Boagen aun met siene Haunt. Un Elisa läd siene Haunt opp däm Kjennich siene Haunt,

¹⁷un säd: Moak daut oostne Fensta op. Un hee muak daut opp. Un Elisa säd: Scheet. Un hee schoot. Un Elisa säd: Eene jewennende Feil vom HARN. Eene jewennende Feil jäajen Aram. Du woascht de Aramäa bie Afek dolschlonen bat see oppjeriemt sent.

¹⁸Un Elisa säd: Nemm de Feilen. Un aus hee dee neem, säd hee toom Kjennich von Israel: Schlo dee opp de Ieed. Un hee schluach dee dree mol opp de Ieed.

¹⁹Dan wort de Gottesmaun doll un säd: Wan du doch fief ooda sas mol jeschloagen hautst, dan hautst du de Aramäa doljeschloagen bat see oppjeriemt wieren. Oba nu woascht du an mau dree mol dolschlonen.

²⁰Aus Elisa jestorwen wia, begrowden see am. To dee Tiet kjeemen doa jieda Joa Baunden von Moabita en daut Launt nenn.

²¹Un dan kjeem daut emol soo rom, daut aus see eenen Maun begrowen wullen, sagen see waut Moabita. Un see schmeeten däm Dooden schwind en Elisa sien Grauf nenn. Aus de Doodja Elisa siene Knoakes aunschieed, läwd hee wada opp un hee stunt opp, opp siene ieejne Been.

²²En de gaunze Tiet aus Joahas läwd, leeden see väl von Hasael, däm Kjennich von Aram.

²³Oba de HAR wia an jenstich un hee erboarmd sikj äwa an. Hee kjemmad sikj om an wäajen sienen Bunt met Abraham, Isaak un Jakob, un hee leet daut nich too, daut see gaunz doljeschloagen worden. Hee haft an uk bat dän vondoagschen Dach nich von sikj jeschmäten.

²⁴Aus de Kjennich Hasael von Aram storf, wort sien Sän Ben Hadad Kjennich no am.

²⁵Joasch jewonn dree mol dän Kaumf jäajen Ben Hadad, Hasael sien Sän, un soo kjrieech hee de Städa trigj fa Israel, woone de Aramäa en sienen Voda Joahas siene Tiet enjenomen hauden.