Read Plautdietsch (Low German) – De Bibel 2. Kjennichs 14 Bible Online

2. Kjennichs 14 - Plautdietsch (Low German) – De Bibel bible

2. Kjennichs 14

¹Amazja, Joasch sien Sän, wort Kjennich von Juda aus Joasch, Joahas sien Sän en sien tweedet Joa aus Kjennich von Israel wia.

²Hee wort Kjennich aus hee 25 Joa oolt wia, un wia 29 Joa Kjennich en Jerusalem. Siene Mutta wia Joadan, von Jerusalem.

³Hee haundeld soo aus daut ver däm HARN rajcht wia, wan uk nich soo aus sien Staumvoda David haundeld, oba soo aus sien Voda Joasch

⁴De huage Opfastäden worden nich wajch jeriemt. Daut Volkj brocht doa noch emma Opfa un brend doa Weiruak.

⁵Aus hee sikj ieescht daut Kjennichsrajcht jesechat haud, brocht hee de aunjestalde om, dee schuldich wieren fa dän Doot von sienen Voda, dän väajen Kjennich.

⁶Hee brocht oba nich de Säns om, von dee waut sienen Voda doot jemoakt hauden. Hee hilt sikj aun daut waut en Moses sien Jesazbuak jeschräwen wia. Doa sajcht daut: De Vodasch sellen nich dootjemoakt fa äare Kjinja un Kjinja sellen nich dootjemoakt fa äare Vodasch. Een jiedra saul fa siene ieejne Sinden dootjemoakt.

⁷Amazja jewonn emol äwa de Edomita en daut Solt Tol. Hee schluach doa 10.000 Maun, un neem de Staut Sela en. Hee nand de Staut Jokteel, soo aus dee vondoag noch heet.

⁸Amazja schekjt dan Mana no Joasch, Joahas sien Sän un Jehu sien Grootsän, dee Kjennich en Israel wia, met dise Norecht: Komm emol han daut wie waut unja vea Uagen beräden kjennen.

⁹Oba Joasch, de Kjennich von Israel, schekjt eene Norecht trigj no Amazja, dän Kjennich von Juda un säd: Doa wia eene Distel Stud en Libanon un dee schekjt eene Norecht no eenen Zeedaboom en Libanon: Jeff doch diene Dochta, daut see kaun mien Sän siene Fru sennen. Oba een willet Tia staupt opp de Distel un bruak dee auf.

¹⁰Du hast äwa de Edomita jewonnen, un nu jleefst wunda waut du kaust. Frei die to daut, waut du hast kunt doonen un sie tofräd. Wuarom west du waut aunstekjen, wuaderch du un dien Launt tosplät komen.

¹¹Oba Amazja horcht doa nich no. Dan neem Joasch de Kjennich von Israel siene Armee un jinkj jäajen Amazja, däm Kjennich von Juda. Un see bejäajenden sikj bie Bet Schemesch en Juda.

¹²Un Juda wort von Israel jeschloagen, un een jiedra rand no sien Hus.

¹³Joasch, de Kjennich von Israel, neem dän judschen Kjennich Amazja, dee Joasch sien Sän un Ahasja sien Grootsän wia, bie Bet Schemesch faust. Un hee jinkj bat Jerusalem un reet een Poat von de Mia rom Jerusalem dol. Daut wia daut Stekj von daut Efraimpuat bat daut Akjpuat, soo bie 200 Meeta.

¹⁴Un hee neem aul daut Golt un Selwa un Jereetschoft von en däm HARN sien Hus un waut en däm Kjennich sien Hus toopjelajcht wia. Hee neem uk faustjenomne, un jinkj trigj no Samaria.

¹⁵Daut äwaje von de Jeschicht von Joasch, von waut hee jedonen haft un woo brow hee wia, un woo hee met Amazja däm judschen Kjennich kjamfen deed, es aula en daut Buak von de Jeschicht von de Kjennichs en Israel jeschräwen.

¹⁶Aus Joasch storf, begrowden see am en Samaria, wua de Kjennichs von Israel begroft worden. Un Joasch sien Sän Jerobeam wort Kjennich no am.

¹⁷Amazja, Joasch sien Sän, dee Kjennich en Juda wia, läwd noch 15 Joa no daut Joasch, Joahas sien Sän, de Kjennich von Israel storf.

¹⁸Daut äwaje von de Jeschicht von Amazja es en daut Buak von de Jeschicht von de Kjennichs en Juda jeschräwen.

¹⁹Un en Jerusalem muaken see eenen Plon Amazja auftoschaufen. Aus hee von däm Plon to hieren kjrieech, rand hee wajch no Lachisch. Oba see schekjten am waut Mana hinjaraun no Lachisch, un muaken am doa doot.

²⁰See brochten am opp waut Pieed trigj, un begrowden am en Jerusalem, wua siene Vodasch begroft wieren en de Davidstaut.

²¹Un daut gaunze Volkj von Juda neem dän 16 joaschen Asarja un muaken am toom Kjennich, en sienen Voda Amazja siene Städ.

²²Hee bud de Staut Elat opp un muak daut wada to een Poat von Juda, no däm daut de Kjennich Amazja jestorwen wia.

²³Aus Amazja, Joasch sien Sän en sien 15. Joa aus Kjennich en Juda wia, wort Jerobeam, Joasch sien Sän, Kjennich en Israel. Hee wia 41 Joa Kjennich en Samaria.

²⁴Un hee deed waut däm HARN schlajcht jefoll. Hee hieed nich opp met de Sinden dee Jerobeam, Nebat sien Sän, jedonen haud, met dee hee Israel toom sindjen veleit haud.

²⁵Hee neem wada daut Launt en, waut ea wia een Poat von Israel jewast von Hamat bat daut Solt Mäa. Un dit wia krakjt soo aus de HAR, Israel äa Gott derch Jona, Amittai von Gat, Hefer sien Sän, jesajcht haud. Jona wia een Profeet un deend däm HARN.

²⁶De HAR sach, daut Israel daut sea schlajcht haud, un daut see sikj goanich met de Sach wisten, un doa wia kjeena dee an halpen kunn.

²⁷De HAR haud nich jesajcht, daut hee een Enj moaken wull met Israel opp de Ieed, un soo rad hee an derch Jerobeam, Joasch sien Sän.

²⁸Daut äwaje von de Jeschicht von Jerobeam, waut hee deed, un woo brow hee wia, uk woo hee de Armee leiden deed, un Damaskus un Hamat wada een Poat von Israel muak, daut es aula en daut Buak von de Jeschicht von de Kjennichs en Israel jeschräwen.

²⁹Aus Jerobeam storf, wort hee begroft wua de Kjennichs von Israel begroft wieren. Un sien Sän Secharja wort Kjennich no am.