Read Plautdietsch (Low German) – De Bibel 2. Kjennichs 16 Bible Online

2. Kjennichs 16 - Plautdietsch (Low German) – De Bibel bible

2. Kjennichs 16

¹En daut 17. Joa aus Pekach, Remalja sien Sän, Kjennich wia, wort Ahas, Jotam sien Sän, Kjennich von Juda.

²Ahas wia 20 Joa oolt aus hee Kjennich wort, un hee wia Kjennich en Jerusalem fa 16 Joa. Hee deed nich waut fa däm HARN rajcht wia, soo aus sien Staumvoda David rajcht jedonen haud.

³Hee haundeld soo aus de Kjennichs von Israel. Hee vebrend sienen ieejnen Sän en een Opfa, soo aus de Velkja, dee de HAR ver de Israeliten utroden deed, en äare oppscheiselje Sitten deeden.

⁴Hee brocht Opfa un Ruakopfa opp aul de huage Opfastäden, un opp jieda Boajch, un unja jieda jreenen Boom.

⁵Dan kjeemen Rezin, de Kjennich von Aram, un Pekach, Remalja sien Sän, de Kjennich von Israel, jäajen Jerusalem to kjamfen. See muaken äa Loaga rom Jerusalem, oba see kunnen de Staut nich ennämen.

⁶En dise Tiet neem de Kjennich von Edom de Staut Elat wada trigj un juach de Menschen von Juda doa wajch. Dan kjeemen de Edomita un wonden en de Staut, soo aus see vondoag noch doonen.

⁷Un Ahas schekjt eene Norecht no däm Kjennich Tiglat Pileser von Assierien. Hee säd: Ekj woa die deenen, un dien Sän sennen. Komm bat hia un halp mie jäajen de Macht von däm Kjennich von Aram un däm Kjennich von Israel. Dee sent jäajen mie jekomen.

⁸Ahas schekjt däm Kjennich von Assierien een Jeschenkj von Selwa un Golt woont hee ut däm HARN sien Hus un von daut, waut de Kjennich haud, neem.

⁹Un de Kjennich von Assierien horcht no am un trock met siene Armee jäajen Damaskus. Hee neem de Staut en un schlapt de Lied von doa wajch un brocht däm Kjennich Rezin om.

¹⁰Dan aus de Kjennich Ahas no Damaskus jinkj om Tiglat Pileser to trafen, sach hee en Damaskus dän Aultoa. Un Ahas schekjt däm Priesta Uria de Moten un dän Plon, krakjt woo de Aultoa jemoakt wia.

¹¹Un de Priesta Uria bud eenen Aultoa, krakjt soo aus de Kjennich Ahas am von Damaskus jeschekjt haud. Hee muak dän foadich ea Kjennich Ahas trigj kjeem von Damaskus.

¹²Dan aus de Kjennich von Damaskus kjeem, bekjikjt hee sikj dän Aultoa un jinkj nopp bat aun dän,

¹³un muak een Brauntopfa un Ätesopfa, un goot sien Drinkjopfa doa nopp un sprezt daut Bloot von de Dankopfa, dee hee brocht, aum Aultoa naun.

¹⁴Un hee neem dän bronsnen Aultoa, dee ver däm HARN stunt, wajch, soo daut dee nich tweschen sienen Aultoa un däm HARN sien Hus stunt. Un hee sad däm biesied sienen Aultoa, aun de nuadne Sied.

¹⁵Un de Kjennich Ahas säd däm Priesta Uria: Du saust daut Brauntopfa, waut du zemorjes brinjst, un daut Mälopfa, waut du zeowes brinjst, un uk däm Kjennich sien Brauntopfa un Ätesopfa, un daut Brauntopfa fa daut gaunze Volkj en daut Launt, un äa Ätesopfa un Drinkjopfa, opp disen grooten Aultoa vebrennen. Un du saust aul daut Bloot von de Brauntopfa un de aundre Opfa aun disen Aultoa spretzen. Oba dän bronsnen Aultoa woa ekj brucken, wan mie Rot fält.

¹⁶Un de Priesta Uria deed aules soo aus Ahas am säd.

¹⁷Un de Kjennich Ahas neem de Leesten un dän Foot von unja de Kommen wajch, un uk de bronsne Rinda, dee unja de groote Komm, woone see daut Mäa nanden, wajch, un stald dee opp eenen steenanen Foot.

¹⁸Un hee endad dän bedakjten Sabat Engank em Paulaust om, un uk dän Kjennich sien Engank aun däm HARN sien Hus, om däm assierischen Kjennich sient haulwen.

¹⁹Daut äwaje von de Jeschicht von Ahas un waut hee jedonen haft, es en daut Buak von de Jeschicht von de Kjennichs en Juda jeschräwen.

²⁰Un Ahas storf un wort begroft, wua siene Väavodasch en de Davidstaut begroft wieren. Un sien Sän Hiskia wort Kjennich no am.