Read Plautdietsch (Low German) – De Bibel 2. Kjennichs 17 Bible Online

2. Kjennichs 17 - Plautdietsch (Low German) – De Bibel bible

2. Kjennichs 17

¹Aus Ahas en sien twalftet Joa aus Kjennich en Juda wia, wort Hoschea, Ela sien Sän, Kjennich äwa Israel. Hee wia fa näajen Joa de Kjennich en Samaria.

²Hee deed waut däm HARN schlajcht jefoll oba nich soo aus Kjennichs en Israel, dee ver am wieren jewast.

³Un de Kjennich Salmanasar von Assierien kjeem jäajen am, un Hoschea leet sikj von am väasajen un must am jieda Joa Jelt tolen.

⁴Dan wort de Kjennich von Assierien en, daut Hoschea eenen Plon jäajen am jemoakt haud. Hee haud Mana no däm ägiptischen Kjennich Soo jeschekjt, un haud nich siene jeweenelje Tolinj jemoakt. Dan leet de assierischa Kjennich am enstoppen un em Jefenkjnis faust hoolen.

⁵Un de assierische Kjennich kjeem met siene Armee derch daut gaunze Launt un uk no Samaria. Hee besad Samaria fa dree Joa.

⁶En Hoschea sien näajendet Joa aus Kjennich, neem de assierischa Kjennich de Staut Samaria en. Hee veschlapt de Israeliten no Halach, un no däm Habor Riefa en Gosan, un no de Städa von de Meeda.

⁷Oba dit haud sienen Grunt. De Israeliten hauden jäajen dän HARN äaren Gott jesindicht, dee an ut Ägipten un von unja däm ägiptischen Kjennich siene Macht jebrocht haud. See hauden aundre Jetta aunjebät,

⁸un de Sitten von de Velkja, dee de HAR ver de Israeliten haud utjerot, aunjenomen. Un see hauden daut Biespel von äare Kjennichs en Israel aunjenomen.

⁹De Israeliten deeden plietsche Dinja dee nich rajcht wieren ver däm HARN äaren Gott. See muaken sikj de huage Opfastäden bie jieda Staut, auf doa bloos een Woak Torm wia ooda eene Staut met eene Mia un Jewäa.

¹⁰See stalden steenane Denkjmol un Ascherabilda opp, opp jieda Boajch un unja jieda jreenen Boom.

¹¹See opfaden opp aul de huage Opfastäden, soo aus de Velkja hauden, dee de HAR ver an utjerot haud, un see deeden schlajchte Dinja, dee däm HARN onwellich muaken.

¹²See bäden Jetta aun, von dee de HAR jesajcht haud, daut see daut nich doonen sullen.

¹³Un de HAR haud Israel un Juda jewoarnt derch aul de Profeeten un dee waut besondre Ensecht jehaut hauden. Hee haud jesajcht, daut see met äare beese Wäaj opphieren sullen, un daut et nich rajcht wia, soo aus see läwden. See sullen aundasch läwen un sikj no de Jesazen, woone de HAR äare Vodasch oppjejäft haud, rechten, un no daut, waut de HAR väajeschräwen haud derch de Profeeten, dee am deenden, horchen.

¹⁴Oba dee horchten nich. Dee wieren soo stieekoppich aus äare Vodasch, dee uk nich no däm HARN äaren Gott horchten.

¹⁵See veachten siene Jebooten un sienen Bunt, dän hee met äare Vodasch jemoakt haud, un uk de Woarnungen, dee hee an jeef. See rechten sikj no de faulsche Jetta, bat daut nuscht von an jeef. See muaken met, met daut waut de Velkja rom an deeden, un deeden waut de HAR jesajcht haud, daut see nich doonen sullen.

¹⁶See jeewen nuscht rom om de Jebooten, dee see von däm HARN äaren Gott jekjräajen hauden. See muaken twee jegotne Kjalwa un een Ascherabilt un bäden de Stiernwelt aun un uk Baal.

¹⁷See muaken Brauntopfa von äare Säns un Dajchta, un jeewen sikj met Woasaja un Hakjsarieen auf. See jeewen sikj selfst opp daut see Dinja deeden, dee däm HARN schlajcht jefollen, un met waut see am vestalt muaken.

¹⁸Un doawäajen wort de HAR oajalich äwa Israel, un hee leet an nich mea ver am komen. Schlieslich wia nuscht jebläwen von an, buta noch de Staum Juda.

¹⁹Oba Juda hilt uk nich däm HARN, äaren Gott, siene Jebooten. See fieeden krakjt soon Läwen aus de Lied en Israel deeden.

²⁰Un dan jeef de HAR nuscht rom om aule Israeliten. Hee leet an lieden un jeef an äwa no dee, dee an utnuzten, bat hee an gaunz veschmeet von ver sikj.

²¹De HAR reet Israel ut de Henj von David siene Nokomen, un see muaken Jerobeam, Nebat sien Sän, toom Kjennich en Israel. Dee muak an gaunz wajch kjikjen vom HARN, un veleid an en growe Sinden nenn.

²²Daut Volkj Israel muak met, met aul de Sinden, dee Jerobeam deed, un see hieeden doa nich met opp,

²³bat de HAR Israel gaunz tosied schmeet, soo aus hee derch aul de Profeeten, dee am deenden, jesajcht haud. Soo kjeem daut, daut Israel veschlapt wort no Assierien, soo aus daut vondoag noch steit.

²⁴Un de Kjennich von Assierien brocht Menschen von Babel un Kuta, von Awa un Hamat un Sefarwajim un leet dee en de Städa en Samaria wonen. Enne Städ daut de Israeliten doa wonden, neemen jane Samaria en un wonden en de Städa.

²⁵Un aum Aunfank, aus see dort en Samaria wonden, weesen see däm HARN kjeene Forcht, un de HAR schekjt Leiws mank an un dee muaken eenje von an doot.

²⁶Dan säden see to däm Kjennich von Assierien, daut de Velkja, dee hee veschlapt un en Samaria aunjesiedelt haud, kjanden daut nich, woo see dän Gott von daut Launt ieren sullen. Un see vetalden am, daut de Gott Leiws mank de Lied jeschekjt haud un eenje von de Menschen doot jemoakt, wiels see nich wisten woo see dän Gott von daut Launt ieren sullen.

²⁷Un de Kjennich von Assierien bestald daut see eenen Priesta, däm see von doa veschlapt hauden, sullen trigj no dee Jäajent trakjen loten, soo daut hee de Lied belieed, woo see dän Gott von daut Launt ieren sullen.

²⁸Un eena von de Priesta, dee see von Samaria veschlapt hauden, kjeem un wond en Betel, un belieed de Menschen, woo see dän HARN aunbäden sullen.

²⁹Oba jieda Volkj muak sikj äare bekaunde Jetta un stald dee bie de huage Opfastäden opp, woone de Samarita ea jebut hauden, jieda Volkj en dee Staut, wua see wonden.

³⁰Un de Lied von Babel muaken sikj Sukkot Benot, dee von Kuta muaken sikj Nergal, dee von Hamat Aschima,

³¹dee von Awa Nibhas un Tartak, dee von Sefarwajim vebrenden äare Säns fa Adramelech un Anamelech, woont äare Jetta en Sefarwajim jewast wieren.

³²See hauden uk Forcht fa däm HARN, un stalden Priesta aun von veschiedne Menschen mank an. Dee muaken de Opfa opp de huage Opfastäden.

³³Un soo kjeem daut, daut see Forcht fa däm HARN hauden, oba uk de Jetta deenden, waut see jewant wieren von doa, von wua see jekomen wieren.

³⁴Un vondoag noch emma doonen see soo aus don: See haben nich Forcht fa däm HARN un hoolen uk nich de Ordnungen, soo aus wie daut jehaut haben. See rechten sikj nich no onse Jebooten un Jesazen, woone de HAR Jakob siene Nokomen oppjeef. Dit es de Jakob, däm de HAR dän Nomen Israel jeef,

³⁵un met wäm hee een Bunt muak un von am velangd, daut hee fa kjeene aundre Jetta Forcht sull haben, un dee uk nich aunbäden ooda deenen ooda een Opfa moaken.

³⁶Jie sellen bloos fa dän HARN Forcht haben, dee junt met eene stoakje Haunt un een Oarm, dee nich meed wort, ut Ägipten jebrocht haft. Bloos dän sell jie aunbäden un Opfa moaken.

³⁷Hoolt de Ordnungen un waut rajcht es, de Jesazen un Jebooten, dee hee junt leet oppschriewen. Paust emma opp no dee un habt kjeene Forcht fa aundre Jetta.

³⁸Un vejät nich dän Bunt dän hee met junt jemoakt haft un habt nich Forcht fa aundre Jetta.

³⁹Habt Forcht fa dän HARN, junen Gott. Dee woat junt von aul june Fiend raden.

⁴⁰Oba see horchten nich. See deeden waut see ea jedonen hauden.

⁴¹Dise Velkja hauden don Forcht fa däm HARN un deenden oba uk äare Jetta. Un äare Kjinja un Grootkjinja doonen krakjt soo aus äare Vodasch deeden, un soo doonen see daut uk noch vondoag.