Read Plautdietsch (Low German) – De Bibel 2. Kjennichs 19 Bible Online

2. Kjennichs 19 - Plautdietsch (Low German) – De Bibel bible

2. Kjennichs 19

¹Aus de Kjennich Hiskia daut hieed, reet hee siene Kjleeda twei un trock sikj een Sak äwa. Hee jinkj en däm HARN sien Hus,

²un schekjt Eljakim, dee de Oppsechta fa däm Paulaust wia, un Schebna, dee de Schriewa wia, un uk de Leidasch von de Priesta, aula en Sakj jekjleet, no däm Profeet Jesaja, Amoz sien Sän.

³Un see säden to am: Dit es waut Hiskia sajcht: Dit es een schlemma Dach. Wie sent jestroft un beschämt. Daut es aus wan een Kjint saul to Welt komen un doa nich de Krauft doatoo es.

⁴Veleicht haft de HAR, dien Gott, jehieet waut de Rabschake fa sienen Harn, dän assierischen Kjennich jesajcht haft, un woo hee dän läwendjen Gott toom Spott jebrukt haft. Veleicht bestroft de HAR, dien Gott, janem fa de Dinja waut hee von am jehieed haft. Fang aun fa dee to bäden waut noch en Jerusalem äwajebläwen sent.

⁵Un aus Kjennich Hiskia siene aunjestalde Mana no Jesaja kjeemen,

⁶säd Jesaja to an: Sajcht junen Harn, dän Kjennich Hiskia: Dit es waut de HAR sajcht: Habt nich Angst fa daut waut jie jehieet haben, daut met waut de aunjestalde von däm assierischen Kjennich mie jelastat haben.

⁷Horcht emol no dit. Ekj woa eenen Jeist äwa am komen loten, un wan hee woat jewesse Norecht kjrieen, woat hee trigj en sien Launt trakjen. Un ekj woa am en sien Launt met daut Schwieet dolschlonen.

⁸Un sea om dän Tiet hieed de Rabschake daut de assierischa Kjennich sikj haud von Lachisch trigjetrocken un wia met siene Armee jäajen Libna jegonen.

⁹De Kjennich von Assierien wia von Lachisch trigjetrocken, wiels hee haud jehieet daut de ätiopischa Kjennich Tirhaka met siene Armee jäajen am jekomen wia. Un de assierischa Kjennich schekjt wada Mana no Hiskia un bestald aun dee,

¹⁰see sullen Hiskia, dän Kjennich von Juda, sajen: Lot dienen Gott, opp dän du die velatst, die nich hinjat Licht fieren, wan hee vesproaken haft, daut Jerusalem nich woat unja de Macht von de assierische Armee jejäft woaren.

¹¹Horch emol, du hast jehieet, waut de assierische Kjennichs to aule Lenda aunjedonen haben, un woo see dee vedorwen haben. Jleefst du, bloos du woascht jerat woaren.

¹²Haben de Jetta von de Velkja woone miene Vodasch venichten deeden an jerat? Weetst du nich waut en Gosan, Haran, Rezef, un met de Lied von Eden dee en Telasar wieren jeworden es?

¹³Waut es nu noch jebläwen von däm Kjennich von Hamat ooda däm Kjennich von Arpad un de Kjennichs von de Städa Sefarwajim un Hena un Awa?

¹⁴Aus Hiskia dän Breef, woonen de Mana brochten, jekjräajen haud un jeläst haud, jinkj hee doamet no däm HARN sien Hus un läd dän ver däm HARN han

¹⁵un bäd: HAR, Israel äa Gott, dee du dienen Troon huach äwa de Cheruben hast, du best de eensja Gott äwa aule Kjennichrikjs oppe Ieed. Du best deejanja wäa dän Himmel un de Ieed jemoakt haft.

¹⁶HAR, brinj dien Ua een bät noda un horch; moak diene Uagen op un kjikj no de Norecht dee Sanherib jeschekjt haft. Kjikj, woo hee dän läwendjen Gott bespotten deit.

¹⁷Daut es soo, HAR, daut de Kjennichs von Assierien de Velkja un äare Lenda venicht haben.

¹⁸Daut es soo daut see dee äare Jetta haben em Fia jeschmäten. Oba daut wieren nuzloose Jetta. Daut wieren Dinja dee Menschenhenj von Holt un Steen jemoakt hauden. Un doawäajen haben see dee kunt venichten.

¹⁹Un nu, HAR ons Gott, bäd ekj, rad ons von siene Macht soo daut aule Velkja opp de Ieed enseenen woaren daut du HAR, auleen Gott best.

²⁰Dan schekjt Jesaja, Amoz sien Sän, eene Norecht no Hiskia un säd to am: Dit es waut de HAR, Israel äa Gott sajcht: Ekj hab jehieet, waut du jebät hast äwa Sanherib, dän assierischen Kjennich.

²¹Dit es waut de HAR äwa am to sajen haft: Daut oschuldje scheene Zion veacht die un spott äwa die. Daut scheene Jerusalem scheddat dän Kopp hinja die.

²²Äwa wäm hast du jespott un jelastat? Äwa wäm hast du soo lud jerät un opp wäm hast du soo rauf jekjikjt? Daut hast du jäajen dän Heiljen von Israel jedonen.

²³Du hast derch diene Mana dän HARN veacht un jesajcht: Ekj sie met aul miene Woages bat huach enne Boaj un bat em hinjaschten Woolt en Libanon jewast. Ekj hab de jratste Zeeda un de baste Taunenbeem doljehakt. Ekj sie bat de hinjaschte Woninj em Woolt, wua daut aum gaunz dichsten wia, jewast.

²⁴Ekj hab en framde Lenda no Wota jegroft un uk jedrunken, un ekj hab dän Ägiptischen Riefa met miene Schoo Solen utjezopt.

²⁵Hast du daut noch nienich jehieet, daut ekj mie lang doaropp reed jemoakt hab, un vom Aunfank doaropp jeplont hab, waut ekj nu äwadäl brinj, daut du Städa met Mieren dolbrakjst un en Steenaklompes ligjen latst.

²⁶Un dee waut doabennen wonden, hauden kjeene Krauft. See enjsten sikj un worden to nuscht jemoakt. See wieren soo aus daut Graus oppe Stap un daut jreene Krut. See wieren soo aus Graus, waut oppem Dak kjient un vedrieecht, ea daut groot es.

²⁷Ekj weet goot om, wua du blifst, un wanea du rut jeist un wanea du nenn kjemst, un daut du jäajen mie jetoopt hast.

²⁸Wiels du soo jäajen mie toopst un ekj nu jehieet hab, woo äwamootich du best, woa ekj die eenen Rinkj enne Näs nenmoaken un mien Jebett en dien Mul saten, un die trigj delenjd dän Wajch wiesen, woonen du kjeemst.

²⁹Un dan säd Jesaja to Hiskia: Dit saul daut Tieekjen fa die sennen, at dit Joa, waut von selfst waust, un daut näakjste Joa, waut dan noch waust, un en daut dredde Joa saust du seien un arnten, du saust Wiengoades aunplaunten un von dee äten.

³⁰Un daut, waut von daut Volkj Juda äwablift, woat unjen fresche Wartlen rutschmieten un bowen Frucht haben.

³¹Ut Jerusalem woaren dee rutgonen waut äwabliewen woaren, un vom Zion Boajch, dee waut jerat sent. De HAR, dee aules rejieet, dee daut nich vedrajcht daut see jenomen woaren, woat dit doonen.

³²Un dit es waut de HAR äwa dän assierischen Kjennich sajcht: Hee woat nich en dise Staut nenkomen un woat kjeene Feil doa nenn scheeten. Hee woat sien Schilt nich no junt dreien un woat kjeene Ieed jäajen june Mia oppschedden.

³³Hee woat schmock dän Wajch trigj gonen, woonen hee jekomen es, un woat nich en dise Staut nenkomen. De HAR sajcht dit.

³⁴Ekj woa dise Staut mienen Schutz jäwen un dee raden. Dit doo ekj om mient haulwen, un om David, dee mie deend, sient haulwen.

³⁵Un dee Nacht jinkj däm HARN sien Enjel un schluach 185.000 Maun en daut assierische Loaga. Un tiedich zemorjes, sagen dee, dee doa don wieren, daut aules voll Doodes lach.

³⁶Dan riemd Sanherib, de assierischa Kjennich, siene Sachen toop un jinkj wajch. Hee jinkj met aules no Hus un bleef en Ninive.

³⁷Un een Dach aus hee en däm Tempel fa sienen Gott Nisroch bäden deed, schluagen twee von siene Säns, Adramelech un Sarezer, am doot. See kjeemen met äa Läwen doavon un vestuaken sikj en daut Launt Ararat. Un sien Sän Asarhadon wort Kjennich no am.