Read Plautdietsch (Low German) – De Bibel 2. Kjennichs 20 Bible Online

2. Kjennichs 20 - Plautdietsch (Low German) – De Bibel bible

2. Kjennichs 20

¹Dan wort Hiskia emol krank, un daut leet soo aus wan hee stoawen wudd. Dan kjeem Jesaja, Amoz sien Sän, no am un säd: Dit es waut de HAR sajcht: Moak die opp aules reed. Du woascht nich läwen bliewen, du woascht stoawen.

²Dan dreid Hiskia sikj no de Waunt un bäd däm HARN aun un säd:

³HAR, du weetst doch, daut ekj tru un opprechtich ver die jewast sie, un woo ekj daut jedonen hab waut die jefelt. Un Hiskia hield sea.

⁴Oba ea Jesaja utem Meddelhoff rutjegonen wia, kjrieech hee een Wuat vom HARN:

⁵Drei om, un saj to Hiskia, dän Leida von mien Volkj: Dit es waut de HAR, dien Staumvoda David sien Gott, sajcht: Ekj hab dien Jebäd jehieet un diene Tronen jeseenen. Horch, ekj woa die jesunt moaken. Om dree Doag woascht du en däm HARN sien Hus gonen.

⁶Ekj woa die noch 15 Joa jäwen, un ekj woa die un dise Staut raden von däm assierischen Kjennich. Ekj woa dise Staut secha hoolen om mient haulwen, un om David, dee mie deenen deed, sient haulwen.

⁷Un Jesaja säd: Brinjt emol een Plosta von Fiejen. Un aus see daut brochten, läden see daut opp sien Schwäa, un hee wort jesunt.

⁸Un Hiskia säd to Jesaja: Waut von Tieekjen woat doa sennen, daut de HAR mie jesunt moakt un daut ekj om dree Doag wada woa nopp no däm HARN sien Hus gonen.

⁹Un Jesaja säd: Dit es daut Tieekjen, waut du vom HARN kjrichst, daut die daut soo woat woaren aus de HAR jesajcht haft: West du haben daut de Schauten aun de Sonnenklock tieen Sträakja verwoats gonen saul ooda tieen Sträakja trigjgonen saul?

¹⁰Un Hiskia säd: Daut es leicht daut de Schauten tieen Sträakja verwoats jeit. Lot daut tieen Sträakja trigjgonen.

¹¹Un de Profeet Jesaja roopt dän HARN aun un hee leet dän Schauten aun Ahas siene Sonnenklock tieen Sträakja trigj gonen, woone dee aul wia verwoats jegonen.

¹²Dan kjeem daut soo rom daut de Kjennich von Babel, Merodach Baladan, Baladan sien Sän, daut hieed daut Hiskia krank wia, un hee schekjt am een Jeschenkj un eenen Breef.

¹³Hiskia freid sikj daut dee jekomen wieren un wees an waut hee fa Schaza haud, Selwa, Golt, Kjriedarie, un feine Eelj, un daut Hus met daut Soldoten Jereetschoft, un waut hee sest noch wieetvollet haud. Doa wia nuscht en Hiskia siene Woninj ooda en daut Launt, waut Hiskia dee Mana nich jewäsen haud.

¹⁴Dan kjeem Jesaja, de Profeet, no däm Kjennich Hiskia un säd: Waut säden dise Mana? Un von wua kjeemen dee? Hiskia säd: Dee sent von een Launt daut wiet auf es, von Babel.

¹⁵Un Jesaja fruach: Waut haben dee en dien Hus jeseenen? Un Hiskia säd: Dee haben aules jeseenen waut en mien Hus es. Ekj hab kjeen Schauz, dän ekj an nich jewäsen hab.

¹⁶Dan säd Jesaja to Hiskia: Horch emol waut de HAR sajcht:

¹⁷Kjikj emol, de Tiet woat komen wua aules waut du hast un waut diene Vodasch bat vondoag haben toopjesaumelt, woat no Babel jenomen woaren. Doa woat nuscht hia bliewen. Dit sajcht de HAR.

¹⁸Un von diene ieejne Nokomen, dee waut diene Kjinja sent, woaren jeschnädne Deena en däm Paulaust von däm Kjennich en Babel sennen.

¹⁹Un Hiskia säd to Jesaja: Waut de HAR sajcht es goot. Hee freid sikj daut doa bestendich Fräd wudd sennen en siene Tiet.

²⁰Un daut äwaje, waut von Hiskia to sajen es, woo brow hee wia, un woo hee dän Wotaväarot un de Leidinj, met woone hee daut Wota no de Staut brocht, muak, es aules en daut Buak von de Jeschicht von de Kjennichs en Juda jeschräwen.

²¹Un aus Hiskia storf, begrowden see am wua siene Vodasch begroft wieren, un sien Sän Manasse wort Kjennich en siene Städ.