Read Plautdietsch (Low German) – De Bibel 2. Kjennichs 22 Bible Online

2. Kjennichs 22 - Plautdietsch (Low German) – De Bibel bible

2. Kjennichs 22

¹Josia wia acht Joa oolt aus hee Kjennich wort, un wia fa 31 Joa Kjennich en Jerusalem. Siene Mutta äa Nomen wia Jedida, un see wia Adaja von Bozkat siene Dochta.

²Un Josia haundeld soo aus daut ver däm HARN rajcht wia. Hee deed soo aus sien Staumvoda David jedonen haud. Hee dreid doa nich von wajch, nich no de rajchte ooda no de linkje Sied.

³Aus Josia en sien 18. Joa aus Kjennich wia, schekjt hee eene Norecht met däm Schriewa Schafan no däm HARN sien Hus. Schafan wia Azalja sien Sän un Meschullam sien Grootsän. Hee velangd:

⁴Go emol no däm Huagenpriesta Hilkija un lot am daut Jelt wiedajäwen waut de Wajchta bie de Schwal von de Lied jesaumelt haben fa däm HARN sien Hus.

⁵Jäft de Äwasechta daut, dee doa en däm HARN sien Hus aunjestalt sent, soo daut see de Oabeida betolen kjennen, om daut Hus trajcht to buen, wua daut fält.

⁶Doa sent de Bumeista un de Miera, un dee waut Holt un trajchtjehakte Steena kjeepen toom daut Jebied vebätren.

⁷Doa brukt oba kjeene Räakjnunk von daut Jelt jefieet waut an jejäft woat, wiels dee to vetruen sent.

⁸Un de Huagapriesta Hilkija säd to Schafan, dee de Schriewa wia: Ekj hab daut Buak met daut Jesaz en däm HARN sien Hus jefungen. Un Hilkija jeef Schafan daut Buak, un hee laus daut.

⁹Un Schafan de Schriewa kjeem no däm Kjennich un vetald am: Diene Oabeida haben daut Jelt, woont see en däm Tempel fungen utjeriemt, un haben de Äwasechta, waut en däm HARN sien Hus aunjestalt sent, daut jejäft.

¹⁰Un Schafan de Schriewa säd to däm Kjennich: De Priesta Hilkija jeef mie dit Buak. Un Schafan laus däm Kjennich ut daut Buak väa.

¹¹Un aus de Kjennich hieed waut daut en daut Buak met daut Jesaz säd, wia hee soo beschämt un veläajen, daut hee sikj siene Kjleeda tweireet.

¹²Hee schekjt Hilkija däm Priesta, un Ahikam, Schafan sien Sän, un Achbor, Michaja sien Sän, un Schafan dän Schriewa, un Asaja, däm Kjennich sien Aunjestalda, un säd:

¹³Got un froacht däm HARN fa mie un fa daut Volkj un fa daut gaunze Juda, äwa waut en dit Buak steit, waut nu jefungen es. De HAR mott sea vestalt sennen, daut onse Väavodasch daut nich jehoolen haben, waut en dit Buak jeschräwen steit.

¹⁴Un Hilkija de Priesta un Ahikam un Achbor un Schafan un Asaja jinjen no eene Fru, Hulda, dee een Profeet wia. See wond en daut niee Poat von Jerusalem met äaren Maun Schalum. Schalum wia äwa däm Kjennich siene Kjleeda aunjestalt un wia Tikwa sien Sän un Harha sien Grootsän.

¹⁵Un see säd to an: Dit es waut de HAR, Israel äa Gott sajcht: Sajcht däm Maun, dee junt no mie jeschekjt haft:

¹⁶Dit es waut de HAR sajcht: Horch emol, ekj woa Onheil äwa dise Staut un de Lied, waut hia wonen, brinjen, soo aus daut Buak sajcht, waut de Kjennich von Juda haft läsen loten,

¹⁷wiels see haben mie tosied jeloten un haben aundre Jetta Opfa jemoakt. Met de Dinja, dee see jedonen haben, haben see mie jereizt, un doawäajen woat mien Oaja äwa dise Staut aunjestekjt woaren un nich utjemoakt woaren.

¹⁸Oba de Kjennich von Juda, dee junt häa jeschekjt haft om von däm HARN to froagen, däm sell jie sajen: Dit es waut de HAR, Israel äa Gott sajcht, äwa de Dinja waut du en daut Buak jehieet hast:

¹⁹Ekj see, daut die daut bat em Hoat jegonen es, un daut du die ver däm HARN deemootjen deetst, aus du hieezhd, daut ekj äwa dise Städ un de Lied säd: See woaren enne Grunt komen un äa Nomen woat veacht woaren. Un wiels du diene Kjleeda en Ieaforcht twei reetst un ver mie jehielt hast, woa ekj horchen no waut du jefroacht hast.

²⁰Ekj woa daut Onheil, daut ekj äwa dise Städ brinjen woa, nich en diene Läwestiet komen loten. Du woascht en Fräd stoawen un begroft woaren. Un see säden däm Kjennich, waut an wia jesajcht worden.