Read Plautdietsch (Low German) – De Bibel 2. Kjennichs 24 Bible Online

2. Kjennichs 24 - Plautdietsch (Low German) – De Bibel bible

2. Kjennichs 24

¹Un en dee Tiet aus Jojakim Kjennich wia, kjeem Kjennich Nebukadnezar von Babel no am, un Jojakim must fa dree Joa Nebukadnezar deenen. Dan säd hee sikj loos von am.

²Un de HAR leet Reiba Baunden von Chaldäa, Aram, Moab un Amon äwa Juda komen, daut see venicht worden. Dit wort soo aus de HAR derch siene Profeeten, dee am deenden, haud weeten loten.

³Jeedenfauls, krakjt soo aus de HAR jesajcht haud, leet hee dit äwa Juda komen, daut hee an wäajen de Sinden, waut Manasse jedonen haud, von ver sikj utroden kunn.

⁴Un hee deed daut uk wäajen de oschuldje Menschen, dee Manasse aulawäajen en Jerusalem omjebrocht haud. Daut wull de HAR am nich vejäwen.

⁵Daut äwaje von de Jeschicht von Jojakim un aules waut hee deed, es en daut Buak von de Jeschicht von de Kjennichs en Juda jeschräwen.

⁶Un Jojakim storf un sien Sän Jojachin wort Kjennich no am.

⁷De ägiptischa Kjennich bleef gaunz en sien Launt, wiels de Kjennich von Babel haud am aules, waut hee von däm Ägiptischen Riefa bat am Eufrat Riefa jehaut haud, wajchjenomen.

⁸Jojachin wia 18 Joa oolt aus hee Kjennich wort, un hee wia fa dree Moonat de Kjennich en Jerusalem. Siene Mutta wia Nehuschta, Elnatan von Jerusalem siene Dochta.

⁹Un hee deed waut däm HARN schlajcht jefoll, soo aus sien Voda jedonen haud.

¹⁰Un en Jojachin siene Tiet kjeem de Armee von däm babelonischen Kjennich Nebukadnezar bat Jerusalem un sad sikj runtom de Staut.

¹¹Un aus siene Armee rom Jerusalem wia, kjeem Nebukadnezar selfst no Jerusalem.

¹²Un Jojachin, de Kjennich von Juda, jeef sikj opp, met siene Mutta un siene Deena, siene Leida un aunjestalde. De Kjennich von Babel neem an aula faust, aus hee en sien achtet Joa aus Kjennich wia.

¹³Hee neem uk aules, waut wieetvoll wia, von en däm HARN sien Hus un von en däm Kjennich sien Hus. Hee schluach uk aul de goldne Dinja twei, woone Salomo, de Kjennich von Israel haud fa dän HARN sien Tempel jemoakt. Dit wia krakjt soo aus de HAR daut jesajcht haud.

¹⁴Hee schlapt soo to sajen daut gaunze Jerusalem wajch, met aule Leidasch, un aul de aunjestalde un de Armee. Daut wieren 10.000 Menschen, dee hee faust neem un veschlapt. Hee neem aule bu Oabeida un aule Schmets un leet kjeenem äwa, buta de oamste Menschen.

¹⁵Nebukadnezar neem Jojachin no Babel met siene Mutta un siene Frues un siene aunjestalde, un de Leidasch en daut Launt. Hee neem dee aus Jefangne no Babel.

¹⁶Un de Kjennich von Babel neem aule baste Mana, bie 7.000, met sikj no Babel, un 1.000 utjelieede Oabeida un Schmets. Daut wieren aules Mana, dee jesunt un stoakj jenuach wieren toom en de Armee deenen.

¹⁷Un de Kjennich von Babel stald Matanja, dee een Onkel äwa Jojachin wia, aun aus Kjennich en Jojachin siene Städ. Un hee jeef am dän Nomen Zedekia.

¹⁸Zedekia wia 21 Joa oolt aus hee Kjennich wort. Un hee wia alw Joa Kjennich en Jerusalem. Siene Mutta wia Hamutal, Jirmeja von Libna siene Dochta.

¹⁹Un hee deed waut däm HARN schlajcht jefoll, soo aus Jojakim jedonen haud.

²⁰Un Zedekia stald sikj jäajen dän Kjennich von Babel opp. Un däm HARN sien Oaja wort soo groot, daut hee Jerusalem un Juda von ver sikj veschmeet.