Read Plautdietsch (Low German) – De Bibel 2. Kjennichs 4 Bible Online

2. Kjennichs 4 - Plautdietsch (Low German) – De Bibel bible

2. Kjennichs 4

¹Eene Fru, dee eene Fru von eenem von de Profeeten Jinja wia, kjeem no Elisa un säd: Dien Deena, mien Maun, es jestorwen. Un du weetst, daut hee dän HARN ferchten deed. Oba nu es eena jekomen, däm hee waut schuldich wia, un dee well miene beid Junges aus Sklowen nämen, jäajen de Schult.

²Un Elisa säd to ar: Waut kaun ekj fa die doonen? Waut hast du en dien Hus? Un see säd: Ekj hab nuscht en daut Hus buta eene Eelj Kruck.

³Un hee säd: Go rom un froag diene Nobasch no ladje Jefässa, un nich too weinich.

⁴Dan go en dien Hus met diene twee Säns, un moak de Däa hinja die too, un jeet Eelj en aul de Jefässa. Wan eent voll es, dan sat daut to Sied.

⁵See jinkj un deed daut soo. See muak de Däa too hinja sikj un äare Säns. De Säns brochten ar de Jefässa un see goot en.

⁶Aus de Jefässa voll wieren, säd see to äaren Sän: Brinj mie noch een Dinkj. Un hee säd: Doa es aul kjeent mea. Dan hieed de Eelj opp met ranen.

⁷Un see jinkj no däm Gottesmaun un vetald am aules. Dee säd: Go nu, un vekjeep de Eelj un betol däm wäm jie schuldich sent. Un du un diene Säns kjennen von daut, waut äwa blift, läwen.

⁸Een Dach jinkj Elisa no Schunem. En dee Jäajent wond eene rikje Fru. Dise Fru bleef doaropp stonen, daut hee bie an äten sull. Un emma, wan hee doa vebie kjeem, jinkj hee doahan un eet doa.

⁹Dan säd de Fru to äaren Maun: Horch emol. Ekj kaun daut seenen, daut dis Maun, dee hia emma vebie kjemt, een heilja Gottesmaun es.

¹⁰Well wie bowen eene kjliene Stow moaken met een Bad, een Stool un eene Laump, soo daut et siene kaun sennen, wan hee hia aun kjemt.

¹¹Een Dach aus Elisa doa wada hankjeem, jinkj hee en dee Stow un vereiwd sikj doa.

¹²Un hee säd to Gehasi, sienen Deena: Roop emol de Fru von Schunem. Un Gehasi jinkj ar sajen, un see kjeem un stunt ver am.

¹³Elisa haud to Gehasi jesajcht: Saj ar: Kjikj emol. Du hast ons aul disen Deenst jedonen. Waut kaun ekj fa die doonen? Wudd die daut halpen, wan ekj een goodet Wuat fa die enläd bie däm Kjennich, ooda biem Kommandaunt von de Armee? Oba see säd: Ekj won mank miene ieejne Lied.

¹⁴Un Elisa säd: Waut kaun ekj dan fa die doonen. Un Gehasi säd: Na see haft kjeenen Sän, un äa Maun es oolt.

¹⁵Un hee säd: Roop ar emol häa. Un aus hee ar roopt, kjeem see bat en de Däa.

¹⁶Un hee säd: Om dise Tiet, om een Joa, woascht du een Sänkje goot drekjen. Un see säd: Bitscheen, mien Har, du Gottesmaun, doo mie nich aunschmäaren.

¹⁷Un nich väl lota, wisten de Fru un äa Maun, daut see sullen een Kjint kjrieen. Un dan wia daut uk, daut om een Joa, soo en dee Tiet waut Elisa jesajcht haud, hauden see een Sänkje.

¹⁸Aus de Jung dan naun woss, jinkj hee een Dach no sienen Voda, dee bie de Oabeida wia, waut Jeträajd schneeden.

¹⁹Un hee säd to sien Voda: Oba mien Kopp, mien Kopp! Un de Voda säd to eenem von de Oabeida: Brinj am no siene Mutta.

²⁰Un hee brocht am nenn no siene Mutta, un see hilt dän Jung oppe Schoot bat Meddach, un dan storf dee.

²¹See druach am dan nopp un läd am opp däm Gottesmaun sien Bad, un muak de Däa hinja sikj too aus see rut jinkj.

²²Dan roopt see äaren Maun un säd: Schekjt mie emol eenen Oabeida un eenen Äsel. Ekj well schwind no däm Gottesmaun gonen un boolt trigjkomen.

²³Un äa Maun säd: Wuarom west du doahan gonen? Daut es vondoag nich Niemon un uk nich de Sabat. Oba see säd: Daut es eendoont.

²⁴Un see leet dän Äsel oppsodlen un säd to däm Oabeida: Joag dän Äsel goot, un lot nich wäajen mie no, buta wan ekj die saj.

²⁵Un soo fuaren see, un see kjeemen no däm Karmel Boajch no däm Gottesmaun. Aus de Gottesmaun ar komen sach, säd hee to sienen Deena, Gehasi: Kjikj emol. De Fru von Schunem kjemt doa.

²⁶Go ar schwind entjäajen un froag ar auf aules goot steit met ar, un äaren Maun, un äaren Sän. Un see säd: Daut es aula goot.

²⁷Aus see oba bat däm Gottesmaun opp däm Boajch kjeem, foot see am aun de Feet. Un Gehasi jinkj ar opptoo, un wull ar wieda schuwen. Oba de Gottesmaun säd: Lot ar toch. Kaust du nich seenen, woo bettalich see litt? De HAR haft daut von mie jehoolen un mie daut nich jesajcht.

²⁸Un see säd: Mien Har, hab ekj die no eenen Sän jefroacht? Säd ekj nich, du sust mie nich aunschmäaren?

²⁹Un Elisa säd to Gehasi: Rop diene Kjleeda om die, un nemm mienen Stock en diene Haunt, un go doa han. Un wan die wäa bejäajent, dan bejrees dee nich, un wan die wäa bejreest dan saj nuscht trigj. Un laj mienen Stock opp dän Jung sien Jesecht.

³⁰Oba de Mutta von däm Jung säd: Soo secha aus de HAR läft, un soo secha aus du läfst, ekj go nich wieda von die. Dan muak Elisa sikj opp un jinkj ar hinjaraun.

³¹Gehasi jinkj an oba aul veropp un läd dän Stock opp däm Jung sien Jesecht. Oba de Jung säd nuscht un muak nuscht von sikj. Un Gehasi jinkj Elisa wada entjäajen un säd to am: De Jung es nich too sikj jekomen.

³²Un aus Elisa en daut Hus nenn kjeem, lach de Jung doot opp Elisa sien Bad.

³³Un Elisa jinkj nenn un muak de Däa hinja sikj too, un hee bäd to däm HARN,

³⁴un hee läd sikj opp daut Kjint nopp un sad sien Mul opp daut Kjint sien Mul un sad siene Uagen opp daut Kjint siene Uagen, un siene Henj opp daut Kjint siene Henj. Soo strakjt hee sikj opp daut Kjint han. Dan wort daut Kjint woam.

³⁵Dan stunt hee opp un jinkj een mol han un trigj derch daut Hus. Dan strakjt hee sikj noch eemol opp daut Kjint nopp. Dan prust de Jung säwenmol, un no daut muak hee siene Uagen opp.

³⁶Un Elisa roopt Gehasi un säd: Roop de Fru. Un aus hee ar roopt, kjeem see nenn no am. Un hee säd: Doa, nemm dienen Jung.

³⁷Un see jinkj no Elisa un kjneed sikj ver siene Feet, un bekj sikj met äa Jesecht gaunz bat opp de Ieed. Un see neem äaren Sän un jinkj rut.

³⁸Aus Elisa dan wada no Gilgal kjeem, wia doa eene Hungaschnoot en daut Launt. Un aus de Profeeten äare Jinja doa ver am sauten, säd hee to sienen Deena: Sat emol eenen grooten Gropen opp, un koak waut Jreens fa de Profeeten äare Jinja.

³⁹Un eena jinkj oppe Stap waut to saumlen toom äten, un hee funk eene Rank un plock sien Kjleet voll von de wille Gurkjen, waut doa jewossen wieren. Am wieren dee nich bekaunt, oba hee schneet dee twei un schmeet dee en dän Gropen nenn.

⁴⁰Aus see de Mana daut dan toom äten väasaden, un see daut schmakjten, schrieejen see: Gottesmaun! Doa es Jeft en dis Gropen. Un see kunnen daut nich äten.

⁴¹Un Elisa säd: Brinjt mie waut Mäl häa. Un hee schmeet daut en dän Gropen nenn un säd: Sat de Lied daut väa, daut see daut äten. Un see hauden kjeenen Schoden von dän Gropenvoll.

⁴²Doa kjeem eemol een Maun von Baal Schalischa un brocht däm Gottesmaun waut Broot von de ieeschte Frucht von de Arnt. Doa wieren 20 Joaschtbrood un waut freschet Jeträajd en sien Sak. Un Elisa säd: Jeff de Lied dit to äten.

⁴³Oba de Deena säd: Woo saul ekj 100 Mana dit väasaten? Un hee säd: Jeff de Lied dit, daut see äten. De HAR sajcht: De Lied woaren äten un doa woat noch äwabliewen.

⁴⁴Un dan saden see an daut väa. Un see eeten un doa bleef noch waut äwa, krakjt soo aus de HAR jesajcht haud.